Ipinag-utos ng Korte Suprema sa lahat ng hukuman sa buong bansa na i-refer ang mga drug dependents sa bagong drug facility sa Nueva Ecija.
Sa ipinalabas na kautusan ni Court Administrator Jose Midas Marquez, dapat na irekomenda ng mga korte na sumailalim ang mga drug abuser at dependents na kinakailangan ng treatment sa mega drug abuse treatment and rehabilitation center sa Fort Magsaysay sa Palayan City.
Alinsunod na rin ito sa naging kahilingan ng Department of Interior and Local Government o DILG.
Ang naturang 10,000 bed rehabiliation facility ay kabilang sa mga prayoridad na proyekto sa ilalim ng administrasyong Duterte kasunod na rin ng inilargang kampanya ng gobyerno kontra iligal na droga.
By Rianne Briones
Nasungkit ni Rafael Nadal ang kampeonato sa French Open makaraang ilampaso ang kalaban si Stan Wawrinka.
Nakapagtala sina Nadal ng score na 6-2, 6-3, 6-1 para maselyuhan ang ikatlong taong grand slam title.
Si Nadal ang itinanghal na unang lalaking tennis player na nakakuha ng grandslam titile sa loob ng sampung (10) okasyon.
Nagpasalamat naman si Nadal dahil wala siyang naitalang injury sa kabuuan ng torneyo.
Samantala, naitala ng TNT Tropang Texters ang kauna-unahang panalo nito sa best of five ng PBA Commissioners’ Cup kontra sa Ginebra Gin Kings.
Bumida sa nasabing laban si TNT Star Joshua Smith na nakapagtala ng tatlumpu’t limang (35) puntos at siyang sumelyo sa 100-94 na kartada ng dalawang koponan sa laban.
By Jaymark Dagala
Nilinaw ni Pangulong Rodrigo Duterte na wala siyang alam sa hininging tulong ng Pilipinas sa Amerika para masugpo ang teroristang grupong Maute sa Marawi City.
Ito’y makaraang kumpirmahin ng AFP o Armed Forces of the Philippines ang presensya ng ilang tropang Amerikano para sa intelligence sharing nito sa mga sundalong Pinoy sa lugar.
Ayon sa Pangulo, hinahayaan niya lamang si Defense Secretary Delfin Lorenzana na gampanan ang kanyang tungkulin bilang ito ang itinalagang Martial Law administrator sa Mindanao.
PAKINGGAN: Bahagi ng pahayag ni Pangulong Rodrigo Duterte
May basbas ng ISIS
Muling binuweltahan ni Pangulong Rodrigo Duterte ang kanyang mga kritiko na kumukuwesyon sa idineklara niyang Martial Law sa Mindanao.
Sa kanyang pagbisita sa mga sugatang sundalo at pulis sa Camp Evangelista sa Cagayan de Oro City, sinabi mismo ng Pangulo na may basbas ni ISIS leader Abu Bakr Al-Baghdadi ang nasabing pag-atake sa Marawi City.
Natural lamang aniyang ipagtanggol ng pamahalaan ang seguridad ng bansa at tiyakin ang kaligtasan ng mga mamamayan nito lalo’t matagal nang nakapuwesto ang mga terorista sa Mindanao.
PAKINGGAN: Bahagi ng pahayag ni Pangulong Rodrigo Duterte
Kasunod nito, sinabi ng Pangulo na sa panahon ng higit na pangangailangan, wala aniya siyang ibang mapagpipilian kundi ang ideklara ang Batas Militar maging ito man ay labag o hindi sa kanyang kalooban.
PAKINGGAN: Bahagi ng pahayag ni Pangulong Rodrigo Duterte
By Jaymark Dagala
Handa na ang buong puwersa ng NCRPO o National Capital Region Police Office sa kanilang ilalatag na seguridad ngayong araw.
Kaugnay ito sa pagdiriwang ng ika-119 na anibersaryo ng Araw ng Kasarinlan na pangungunahan nila Pangulong Rodrigo Duterte at Vice President Leni Robredo.
Ayon kay NCRPO Spokesperson Kim Molitas, nananatili ang full alert status ngayong araw bilang bahagi ng paghihigpit nila ng seguridad.
Tiniyak din ni Molitas na masusunod ang inilatag nilang security protocol habang isinasagawa ang iba’t ibang aktibidad sa lungsod ng Maynila at iba pang panig ng Kamaynilaan.
Kapwa dadalo sina Panglong Rodrigo Duterte at Vice President Leni Robredo sa paggunita ng ika-119 na anibersaryo ng Araw ng Kalayaan ngayong araw.
Sa Luneta, Maynila at hindi sa isla ng Kalayaan itataas ng Pangulo ang watawat ng Pilipinas kasama ang Bise Presidente at sabay din silang mag-aalay ng bulaklak.
Ayon kay NHCP o National Historical Commission of the Philippines Chairman Rene Escalante, mahahati sa apat na bahagi ang pagdiriwang na sisimulan ng flag raising at pag-aalay ng bulaklak sa Rizal Park.
Bukod sa Maynila, pangungunahan naman ni Tourism Secretary Wanda Teo ang pagdiriwang sa Aguinaldo Shrine sa Kawit, Cavite; si Senadora Loren Legarda sa Barasoain Church sa Malolos, Bulacan; si Senador Sonny Angara naman sa Pinaglabanan Shrine sa San Juan at Budget Secretary Benjamin Diokno sa Rizal Residence sa Calamba, Laguna.
Si Supreme Court Associate Justice Mariano del Castillo ang mangunguna sa pagdiriwang sa Bonifacio Monument sa Caloocan City habang si OPAPP Asst/Sec. Rolando Asuncion sa Pamintuan Mansion sa Angeles, Pampanga.
Kabilang din sa mga aktibidad sa nasabing okasyon na may temang “Kalayaan 2017: Pagbabagong Sama-samang Babalikatin” ay ang Balik-Tanaw Heritage Tour sa Pasig River, cultural performances sa Paco Park, simultaneous jobs at trade fair sa buong bansa gayundin ang iba pang public exhibits.
By Jaymark Dagala
Kumpiyansa si Senate President Aquilino ‘Koko’ Pimentel na irerespesto ng Korte Suprema ang pasya ng Kongreso na hindi na magsagawa ng joint sesssion kaugnay sa idineklarang Martial Law sa Mindanao.
Ito ay sa gitna ng gaganaping oral arguments ng Korte Suprema para talakayin ang mga inihaing petisyon ng daan-daang mga abogadong humirit na magsagawa ng joint session ang Kongreso ngayong linggong ito.
Ayon kay Pimentel, positibong papabor ang Korte Suprema sa naging pasya ng mababa at mataas na kapulungan ng Kongreso kaya walang dapat na ipag-alala.
Matatandaang dumulog sa katas-taasang korte ang naturang mga abogado matapos na magkahiwalay na aprubahan ng Senado at Kamara ang deklarasyon ng Martial Law at ibasura naman ang hirit na joint session.
By Rianne Briones
Walang balak si Justice Secretary Vitaliano Aguirre na ipatigil ang ginagawang case build up ng National Bureau of Investigation o NBI laban sa pagkakasangkot ng oposisyon sa destabilization plot sa Duterte administration.
Ito ay sa kabila ng panawagan ng Liberal Party na itigil na ni Aguirre ang ginagawa nitong political harassment sa mga miyembro nito.
Ayon kay Aguirre, hindi niya babawiin ang naturang kautusan sa NBI dahil bahagi aniya ng mandato ng nito na imbestigahan ang mga alegasyon na may kinalaman sa kasong kriminal.
Una nang binanggit ni Aguirre na nakipagpulong at nagtungo sa Marawi City sina Senador Antonio Trillanes, Senador Bam Aquino at iba pa bilang bahagi umano ng destablisasyon laban sa gobyerno.
Kinalaunan ay huminge ng paumanhin si Aguirre kay Aquino sa matapos na lumutang na fake news lamang ang pinagbasehan ng Kalihim sa kanyang naging pahayag.
By Rianne Briones
Tiniyak ng BSP o Bangko Sentral ng Pilipinas na magiging patas ang makatarungan ang kanilang ipapataw na parusa sa BPI o Bank of the Philippine Islands.
Ito’y sakaling mapatunayan sa isinagawa nilang imbestigasyon na may pananagutan ang nasabing bangko sa nangyaring systems data error nito noong isang linggo.
Ayon kay incoming BSP Governor Nestor Espenilla Jr., hindi muna nila sinimulan agad ang kanilang imbestigasyon upang bigyang daan ang BPI na maisaayos ang anumang gusot sa kanilang mga kliyente.
Una nang inihayag ng BPI na gumagana na ang lahat ng kanilang electronic banking channels noon pang Biyernes ngunit umapela ito ng pang-unawa dahil sa may kabagalan pa rin ito.
By Rianne Briones
Patay ang labing isa (11) bilanggo habang nakatakas naman ang siyamnaraang (900) iba pa matapos na atakihin ng mga armadong kalalakihan ang isa sa mga pinakamalaking detention facility sa Congo.
Ayon sa governor ng probinsya ng North Kivu, kabilang sa mga nasawi ay walong (8) mga security ng kulungan matapos mainit na bakbakan sa dalawang panig.
Matapos umano ang pag-atake, tatlumpung (30) preso na lamang ang natira sa loob ng kulungan.
Kasunod nito ay inilarga ng militar ang manhunt operation laban sa mga salarin at sa mga takas na bilanggo.
By Rianne Briones
Nagpapasalamat sa panalangin at sa mga ipinaparating na tulong para sa ating mga tropa na lumalaban sa Marawi si Army 1st Infantry Division Spokesman Lt. Col. Jo-ar Herrera.
Sinabi ni Herrera na napakahalaga ng panalangin dahil ito ang nagbibigay lakas sa ating mga sundalo na nakikipagbakbakan sa mga terorista.
Kanila aniyang gagawin ang lahat upang mailigtas ang mga sibilyan at tuluyang mapalaya ang Marawi mula sa kamay ng mga terorista.
Sa ngayon aniya ay umaabot na sa isang libo at anim na raang (1,600) sibilyan ang kanilang nailigtas.
“Isalba yung buhay ng mga tao na nandun. Umaabot na po sa 1,600 ang ating naisalba, marami na tayong casualties, marami na tayong sundalo na talagang nagbuwis ng buhay para i-liberate ang Marawi.”
“Nagpapasalamat din po kami sa mga tao, sa ating mga kababayan dahil lubos ho yung suporta nila at dasal, yun po yung nagpapalakas sa amin ngayon na despite na mahirap”, ani Herrera.
Maliban sa pagkakaligtas sa mahigit isang libong (1,000) residente ay napakalaking accomplishment aniya para sa kanila ang pagkaka-aresto sa ina ng magkakapatid na Maute na si Farhana.
“Nakakalungkot kasi taga-Marawi sila, inaccept nila yung bulok na ideology. Karamihan po ay ipinanganak dito, nagtayo sila ng mga negosyo nila dito, andito mga pamilya nila pero hindi nila inisip yun, inisip parin nila yung corrupt ideology.”
“Itong si Farhana, ito’y ginagalang ng terrorist, malakas ang impluwensya nya. Siya pa nagpo-provide ng finance, at mga iba’t ibang koleksyon dahil ang Maranao malaki yung role ng babae”, paliwanag ni Herrera
Morale ng mga sundalo nananatiling mataas sa kabila ng bakbakan sa Marawi
Nananatiling mataas ang morale ng mga sundalo na patuloy na nakikipag bakbakan sa Maute sa Marawi City.
Sinabi ito ni Lt. Col. Jo-ar Herrera, matapos ang madugong bakbakan kung saan nasawi ang labing tatlong (13) sundalo at nasugatan ng apatnapung (40) iba pa.
Sa ngayon aniya ay tuloy ang kanilang pakikipaglaban upang tuluyan nang mabawi ang nalalabing sampung porsyento (10%) ng marawi na hawak pa rin ng teroristang grupo.
“Nakita na rin yung grand plan na gustong i-cease, gustong sunugin ang buong Marawi City. Mataas parin ang fighting spirit sa ating mandato na i-clear yung Marawi City. Yung nangyari po noong isang araw ito ay isang temporary set-back po ng ating military.”
“Nakakalungkot nga po dahil isang tenyente na siya ring nag lead sap ag-clear ng isang sector kung saan meron tayong narekober na mahigit P70-M na worth, millions of check sa position ng Maute Group. Kabilang sya sa mga namatay”, ani Herrera.
Tiniyak din ni Herrera na nasa Marawi pa si Isnilon Hapilon at kanila pa rin aniyang biniberipika ang ulat na napatay na ang tatlong (3) magkapatid na Maute.
“Meron tayong bini-verify na isang report na patay yung 3 Maute Brothers. 7 po ito na magkakapatid, 2 po yung kinikilalang leader, isa ay isang sub-leader, yung alyas Madie at alyas Omar.”
“Until now kailangan natin ng validation. We want evidence na sila ng apo yung namatay”, paliwanag ni Herrera.
By Katrina Valle