Sumampa na sa dalawandaan siyamnapu (290) ang bilang ng namamatay sa mahigit tatlong linggong sagupaan ng mga tropa ng gobyerno at ISIS-Maute group sa Marawi City, Lanao del Sur.
Halos animnapu (60) na ang nalagas sa hanay ng pamahalaan at tinatayang apatnapu (40) ang nasawing sibilyan.
Pinakamarami namang namatay sa panig ng teroristang grupo na isandaan siyamnapu’t isa (191).
Tinatayang isandaan walumpung libong (180,000) residente naman ang apektado kabilang ang mga nagsilikas sa mga karatig lungsod at bayan.
Samantala, hindi pa rin natatagpuan o nakakausap ang nasa limampung (50) pulis sa Marawi City makaraang maipit sa bakbakan.
By Drew Nacino
Tiniyak ng Amerika na magpapatuloy ang kanilang pagtulong sa Pilipinas sa kampanya laban sa ISIS-Maute sa Marawi City, Lanao del Sur.
Ayon kay US Ambassador to the Philippines Sung Kim, bahagi ito ng sinumpaang tungkulin ng Amerika lalo’t matagal na nitong kaalyado ang Pilipinas.
Kahit hindi na anya humingi ng tulong si Pangulong Rodrigo Duterte ay awtomatikong sasaklolo ang Estados Unidos dahil na rin sa nilagdaang kasunduan ng dalawang bansa.
Gayunman, hindi na idinetalye ng embahador kung anong klase tulong ang ipinaabot nito sa gobyerno ng Pilipinas sa pagsugpo sa teroristang grupo.
By Drew Nacino
Isinailalim na sa inquest proceedings sa DOJ-Prosecutors Office sa Cagayan de Oro City si Ominta Tamano Farhana Maute, ina ng magkapatid na Abdullah at Omar Maute, dalawa sa mga leader ng ISIS-Maute.
Personal na nagtungo sa CDO si Justice Secretary Vitaliano Aguirre upang saksihan ang inquest proceedings sa kasong rebellion.
Inaresto si Farhana noong Biyernes sa bayan ng Masiu, Lanao del Sur at pinaniniwalaang financier ng Maute Group.
Samantala, inihain din ang isang complaint sa DOJ laban kay dating Marawi City Mayor Fahad Salic na inaresto naman sa Misamis Oriental.
Kabilang si Salic sa arrest order number 2 na inilabas ni Defense Secretary at Martial Law Administrator Delfin Lorenzana dahil sa kanya umanong kaugnayan sa teroristang grupo.
By Drew Nacino
Photo: PNP
Inilatag na ang mahigpit na seguridad sa gaganaping concert ng international pop singer na si Britney Spears sa Pasay City sa Hunyo 15.
Ayon sa National Capital Region Police Office o NCRPO, ito ay upang maiwasan ang kahalintulad na insidente sa nangyaring concert ni Ariana Grande sa Manchester, Great Britain kung saan nagkaroon ng terrorist attack.
Ipatutupad ang protocol sa concert at magkakaroon din ng coordinated conference ang mga security officers bilang paghahanda sa event.
Gayunman ay wala namang natatanggap na anumang pagbabanta ang mga awtoridad sa naturang event.
By Rianne Briones
Inilarga na ng mga kumpanya ng langis ang kanilang bigtime rollback, epektibo ngayong araw.
Unang nagpatupad ang Flying V at Seaoil ng tapyas presyo simula alas-12:01 kaninang hatinggabi.
Nobenta’y singko (P0.95) sentimos ang inilargang rollback ng dalawang kumpanya sa kada litro ng diesel; otsenta (P0.80) sentimos sa gasolina at uno bente (P1.20) sa kerosene.
Epektibo ala-6:00 naman kanina nagpatupad ng kahalintulad na presyo sa mga oil product ang Eastern Petroleum, PTT Philippines, Phoenix Petroleum, Petron at Shell.
By Drew Nacino
Tatangkain ng Golden State Warriors na agawin ang kampeonato sa Cleveland Cavaliers, sa Game 5 ng finals, mamaya.
Liyamado ang Golden State sa kartadang 3-1 ng best of seven series bukod pa sa homecourt advantage kaya’t pursigido ang team na sungkitin ang kanilang ikalawang NBA championship.
Inaasahan namang ipamamalas ng Cavs ang kanilang buong lakas lalo’t ito na ang magsisilbi nilang do-or-die game.
Samantala, kampante ang Warriors na matatapos na ang serye mamaya basta’t maiiwasan lamang ang mga foul trouble ng kanilang mga star player at injury na maaaring maging hadlang sa kanilang paghahabol sa championship.
By Drew Nacino
Sadyang hindi umalis ang puwersa ng mga sundalong Amerikano.
Ayon ito kay Bayan Party-List Representative Carlos Isagani Zarate matapos aminin ng militar na nagbibigay ng technical support ang US troops sa pakikipag bakbakan ng gobyerno sa Maute Group sa Marawi City.
Sinabi sa DWIZ ni Zarate na hindi naman talaga pinull-out ang tropa ng mga sundalong Amerikano kahit noong 2001 at sa katunayan ay mayroong mga kabilang pa sa mga nasawi noong Mamasapano Massacre.
“Hindi umaalis itong mga dayuhang Amerikano. Ang mga Amerikano dyan, in fact, kahit pumunta ka dyan sa Marawi, merong parte ng kampo dyan hindi pwedeng pasukin kahit ng ordinaryong Pilipinong sundalo, ‘yan ay exclusive sa mga Amerikano at kahit na dyan sa, pumunta ka rin sa Western Mindanao Command sa Zamboanga City meron din sila dyan.”
“Hindi sila dyan umaalis, ‘yun nga ang nakakapagtaka dyan. Since 2001, after silang mapaalis sa Clark and Subic noong 2001 noong malagdaan yung visiting forces agreement, hindi naman talaga bisita yung ginawa nila, nandiyan na sila lahat”, paliwanag ni Zarate.
Binigyang diin pa ni Zarate na ang nasabing hakbang ng US troops ay patunay lamang nang pagpapalakas ng kampanya nito kontra terorismo partikular sa Souteast Asia na Pilipinas ang ginagamit.(zarate 2)
“Despite all these support, technical assistance and alam naman natin yang technical assistance na ‘yan kapag pupunta ka ng Sulu at iba pang bahagi ng Mindanao at kahit na sa mainland Mindanao, sa Zamboanga, sa Lanao, kasa-kasama talaga sila.”
“Yan ang sinasabi natin na habang nandyan sila, dahil part ito ng kanilang war of terror ay para nang naging kadena ng kanilang maduming gyera dito sa Southeast Asia ang Mindanao, ang Pilipinas, lalong-lalo na ang Mindanao”, ani Zarate.
By Judith Larino
Patay ang dalawang (2) sundalo at sugatan ang anim (6) na iba pa sa bakbakan sa pagitan ng mga sundalo at NPA o New People’s Army sa Davao City.
Ayon kay Major General Noel Clement, commander ng 10th Infantry Division, kaagad rumesponde ang mga tauhan ng Eastern Mindanao Command sa Sitio Bajada sa Paquibato District matapos makatanggap ng report hinggil sa presensya ng mga armadong kalalakihan sa lugar nang magpaputok sa mga sundalo.
Umatras naman ang mga rebelde nang sumugod ang mga sundalo na nakakuha ng M653 colt rifle at isang magazine, dalawang (2) jungle bags, electric wire at iba pang personal na gamit.
Hindi pa tinukoy ni Clement ang identity ng mga sundalo dahil hindi pa nasasabihan ang pamilya ng mga ito.
By Judith Larino
Mahigit piso (P1.00) ang tapyas sa presyo ng oil products ngayong Lunes.
Epektibo 12:01 ng hatinggabi ang tapyas presyo ng Flying V sa gasolina nito sa walumpung (80) sentimo kada litro, uno beinte sa kerosene at siyamnaput limang (95) sentimo sa diesel.
Sa kaparehong presyo rin o rollback ang ipatutupad ng Shell sa oil products nito, epektibo naman ngayong Martes ng 6:00 ng umaga.
By Judith Larino