Pinayuko ng Golden state Warriors ang defending champion na Cleveland Cavaliers sa Game 1 ng NBA Finals.
Hindi nakaporma ang Cavs sa Warriors na hawak ang malaking kalamangan sa simula pa lamang.
Tinapos ng Warriors ang Game 1 sa iskor na 113 – 91.
Nanguna sa panalo ng Warriors si Kevin Durant na kumamada ng tatlumpu’t walong (38) puntos, walong (8) rebounds at walong (8) assists.
Samantala, hindi naman sumapat ang dalawampu’t walong (28) puntos ni Lebron James para iangat ang kanilang koponan.
By Ralph Obina
Nag-alok ng tigil-putukan ng National Democratic Front o NDF.
Ito ay sa kabila ng pagkaka-udlot ng ika-limang round ng usapang pang-kapayapaan sa The Netherlands.
Sa ipinalabas na pahayag ng NDF, kanila ring ipinangako na nakahanda silang tumulong sa pamahalaan para magupo ang mga teroristang grupong Maute.
Anila, nakahanda silang magdeploy ng mga miyembro ng npa sa Marawi City para tumulong sa bakbakan laban sa mga terorista.
By Krista de Dios
Umani ng iba’t ibang reaksiyon ang pasya ni US President Donald Trump na tuluyan nang umatras sa Paris climate agreement.
Ayon sa European Union, itinuturing nilang napakalungkot na araw para sa global community ang pagtalikod ni Trump sa kasunduan.
Sa iisang pahayag naman na ipinalabas ng France, Italy at Germany, kanilang lubos na ikinadismaya ang desisyon ni Trump at muling pinagtibay ang kanilang commitment sa Paris climate agreement.
Samantala, nakakuha naman ng suporta si Trump mula sa American Coalition for Clean Coal Electricity.
By Krista de Dios
Tinatayang mahigit tatlumpung (30) bangkay ang narekober ng mga awtoridad sa Resorts World Manila sa Pasay City.
Ayon sa Bureau of Fire Protection o BFP, narekober ang naturang mga bangkay sa ikalawa at ikatlong palapag ng Resorts World kung saan karamihan sa mga ito ay nasawi dahil sa suffocation dulot ng nasusunog na bahagi ng casino hotel.
Ang naturang bilang ay bukod pa anila sa limampu’t apat (54) na nasugatan sa insidente at kasalukuyang nasa iba’t ibang pagamutan.
Matatandaang ang lalakeng responsable sa pamamaril sa Resorts World Manila ay nagpakamatay sa pamamagitan ng pagsunog sa sarili nito kayat mabilis na kumalat ang apoy sa casino hotel na nagdulot ng napakakapal na usok.
Samantala, batay sa pinakahuling bilang ng PNP Crime Laboratory , umabot na sa tatlumpu’t anim (36) ang narekober na bangkay sa Resorts World Manila.
By Ralph Obina
Mahigpit na pinag-iingat ng gobyerno ng Australia ang kanilang mga mamamayan kasunod ng nangyaring pamamaril sa Resorts World Manila sa Pasay City.
Batay sa advisory, pinapayuhan ang lahat ng Australian citizen na maging alerto bunsod ng malaking banta umano ng terorismo sa Pilipinas.
Maliban dito, pinaaalalahanan din ng Australia ang kanilang mga mamamayan na nasa Pilipinas na sumunod sa mga ipinag-uutos ng mga kinauukulan at maging updated sa mga kaganapan sa bansa.
Una rito nagpalabas na rin ng travel advisory ang Estados Unidos kaugnay ng insidente sa Resorts World Manila.
By Ralph Obina
Nailigtas ng mga awtoridad ang apat (4) na menor de edad mula sa operasyon ng isang online child pornography site sa Iligan City.
Inilarga ang naturang operasyon sa pamamagitan ng PNP-Women Children Protection Center Mindanano Field Office, SWAT, DSWD at mga opisyal ng barangay kung saan naaresto ang limang (5) suspek.
Ayon kay Chief Supt. Villamor Tuliao, hepe ng PNP Women and Children Protection Center, nakakagulat na ang sexual show ng mga bata ay ginawa lamang ng mga suspek sa pamamagitan ng piso-net o computer unit na hinuhulugan ng papiso-piso.
Kasama sa nailigtas ang isang dalawang (2) taong gulang na bata na anak di umano ng isa sa mga suspek.
Pawang mga European nationals ang sinasabing mga suki ng naturang sindikato.
By Rianne Briones
Ipinatutupad na ngayon ang pinakamataas na antas ng seguridad sa Ninoy Aquino International Airport o NAIA.
Ito ay kasunod ng nangyaring pamamaril at panununog sa Resorts World Manila sa Pasay City.
Samantala, humingi naman ng paumanhin ang Cebu Pacific sa mga na-delay nilang flight dahil sa insidente.
Una nang kinalma ni Philippine National Police o PNP Chief Director General Ronald dela Rosa ang publiko at sinabing hindi maaaring ituring na terror attack ang insidente.
Aniya, mas malamang na pagnanakaw at pagkatalo sa sugal ang siyang motibo ng naging pag-atake ng isang gunman na sa huli ay sinunog ang sarili sa loob ng isang kuwarto sa hotel.
Sa gitna ng pangyayari, pinayuhan ni Dela Rosa ang publiko na maging kalmado at alerto.
Port security
Samantala, mahigpit ang ipinatutupad na seguridad ngayon sa lahat ng pantalan sa Cebu.
Ito ay dahil sa pangamba na lumipat at makapasok ng Visayas ang mga teroristang naghahasik ng karahasan sa Mindanao.
Ayon kay Cebu Governor Hilario Davide III, kanilang sineseryoso ang babala ng Pangulong Rodrigo Duterte hinggil sa posibilidad ng pagkalat ng Maute Group.
Batay sa report, ilang residenteng naiipit sa kaguluhan sa Marawi City ang naglalayag patungong Cebu City.
By Ralph Obina
Mahigit dalawandaang libo (200,000) katao na ang lumikas sa krisis sa Marawi City.
Ipinabatid ito ng ARMM-HEART o Autonomous Region in Muslim Mindanao Humanitarian Emergency Action and Response Team sa gitna nang patuloy na monitoring at relief distribution ng ARMM government.
Ayon sa ARMM, siyamnapu’t dalawang (92) public schools at siyamnapung (90) private schools and apektado nang bakbakan ng mga sundalo at Maute Group.
Samantala, naglagay na rin ng command and coordination center ang ARMM government mula sa Provincial Capitol ng Marawi City at Iligan City, Malabang, Lanao del Sur at Cotabato City para kaagad mabigyan ng tulong ang mga evacuee.
Bumuhos din ang tulong mula sa iba’t ibang grupo, sektor, LGU at mamamayan na dinala sa tanggapan ng ARMM-HEART sa Cotabato City.
Nagliligtas din ang ARMM-HEART ng mga naipit na sibilyan at retrieval operation sa mga labi sa Marawi City.
Sa gitna na rin ito nang patuloy na pag-aayuno ng volunteers dahil karamihan sa kanila ay mga kapatid na Muslim na nag-oobserba sa Holy Month ng Ramadan.
By Judith Larino
