Pinayagan ng Department of Education o DepEd na magtaas ng tuition fee ang isang libo at labing tatlong (1,013) pribadong elementarya at high school sa darating na pasukan.
Ayon kay Education Secretary Leonor Briones, ang naturang bilang ay walong (8) porsyento lamang ng halos labing tatlong libong (13,000) mga paaralan sa buong bansa.
Pinakamarami sa mga paraalan na pinayagang magtaas ng singil sa tuition fee ay mula sa Metro Manila, Region 11 at Region 3.
Positibo naman si Briones na dahil sa naturang pagtataas ay maiiwasan na ang paglipat ng mga gurong nasa pribado sa public school dahil alinsunod sa batas ay 70 percent ng itataas ay dapat na mapunta sa mga teaching staff ng mga paaralan.
By Rianne Briones
Opisyal nang umurong ang Amerika sa Paris Climate Change Agreement ngayong araw na ito.
Mismong si US President Donald Trump ang nagpahayag nito sa kanyang pagharap sa media sa Rose Garden sa White House.
Ayon kay Trump, posibleng ikunsidera nya ang renegotiation kung magkakaroon ng mas magandang kasunduan pabor sa Amerika.
Ang Amerika ang siyang ikalawang pinakamalaking greenhouse gas emitter sa buong mundo sumunod sa China.
By Rianne Briones
Pinag-uusapan na ni Alex Gonzaga at kanyang non-showbiz boyfriend ang paglagay sa tahimik.
Ayon kay Alex, madalas na nilang pinag-uusapan ang pagpapakasal maging ang kanilang titirahang bahay.
Plano ni Alex na mag-asawa sa edad na 31-year old habang game naman dito ang kanyang boyfriend na si Mikee Morada.
Nagpapasalamat sa parating pangaral sa kanya ni Mommy Pinty na maghintay ng tamang lalaki at huwag magmadali tulad ng kanyang ate na si Toni Gonzaga.
By Rianne Briones
Photo: Screengrab from cathygonzaga / Instagram
Nabulabog ang mga guest at empleyado ng Resorts World Manila sa Pasay City makaraang pasukin ng isang armadong lalaki pasado alas-11:00 kagabi.
Ayon sa mga empleyado ng hotel, limang (5) putok ng baril ang narinig mula sa ikatlong palapag ng gusali bago sila abisuhan na lisanin na ang lugar.
Pinagsusunog umano ng gunman ang mga gambling tables sa bahagi ng casino habang sumisigaw at pinagbabaril rin ang mga TV at doorknobs sa loob.
Ilang guest din ang naitalang sugatan dahil sa stampede at nabasag na mga salamin ngunit agad silang nilapatan ng lunas at itinakbo sa mga pinakamalapit na ospital.
Kinalma naman ni Philippine National Police o PNP Chief Director General Ronald dela Rosa ang publiko at sinabing hindi maaaring iugnay sa international terrorist na ISIS ang insidente sa Resorts World Manila sa Pasay City.
Ito ay sa kabila ng pag-ako ng grupo sa naging pag-atake sa naturang casino hotel sa pamamagitan ng kanilang website.
Ayon kay Dela Rosa, isang tao lamang ang pumasok sa naturang casino hotel at hindi sampu (10) tulad ng unang napabalita.
Aniya, mas malamang na pagnanakaw at pagkatalo sa sugal ang siyang motibo ng naging pag-atake ng isang foreign looking na gunman.
Sa gitna ng pangyayari, pinayuhan ni Dela Rosa ang publiko na maging kalmado at alerto.
PAKINGGAN: Bahagi ng pahayag ni PNP Chief Ronald dela Rosa
Samantala, sa pinakahuling ulat ay nagpakamatay na ang di umano’y dayuhan na namaril at nanunog sa Resorts World.
Sa report ng DWIZ Patrol, sinunog di umano ng suspek ang kanyang sarili.
Inilarawan ang suspek na maputi, 6-footer at nagsasalita ng Ingles at posibleng wala sa tamang pag-iisip nang isagawa ang pag-atake.
Iniimbestigahan pa ng PNP ang pagkakakilanlan ng suspek.
By Jaymark Dagala / Rianne Briones / with report from Aya Yupangco , Gilbert Perdez and Jopel Pelenio
Binanatan ni dating Senador Rene Saguisag ang Kongreso na aniya’y sunud-sunuran lamang sa mga naisin ni Pangulong Rodrigo Duterte.
Ito’y may kaugnayan sa pagsuporta ng dalawang kapulungan ng Kongreso sa idineklarang Martial Law ng Pangulo sa buong Mindanao bunsod ng pag-atake ng grupong Maute sa Marawi City.
Tanong ni Saguisag kung mayruon pa bang kongreso na dapat sana’y bumabalanse sa mga desisyon ng Pangulo.
Malaki aniya ang pagkakaiba ng kasalukuyang batas militar nuong panahon ni dating Pangulong Ferdinand Marcos dahil sa aniya’y kadalasang nagmumula sa defense chief ang rekumendasyon.
Ngunit batay aniya sa naging pahayag ni Defense Secretary Delfin Lorenzana, hindi sa kaniya nagmula ang rekumendasyon subalit tila ipinilit pa ito ng mga mambabatas sa pangulo na tinawag niyang mga “chuwariwariwap”.
By: Jaymark Dagala
Mahigpit pa ring pinagbabawalan ng militar ang mga residente sa Marawi City na pumasok sa lungsod bunsod ng patuloy na opensiba laban sa Maute Terror Group
Ito’y makaraang sitahin ng mga sundalo ang ilang mga residenteng nagtatangkang bumalik sa kanilang mga tahanan upang bisitahin ang kanilang mga ari-arian
Ayon kay Zia Alonto Adiong, Spokesman ng Provincial Crisis Management Committee ng Lanao del Sur, lubhang mapanganib pa rin sa loob ng marawi lalo’t maramig I.E.D o Improvised Explosive Device ang nakakalat sa lugar
Batay naman sa ulat ni lt/col. Jo-ar herrera, tagapagsalita ng 1st Infantry Division ng Army, marami pa rin sa mga residente ang piniling huwag lisinan ang kanilang mga tahanan ngunit nauubusan na sila ng mga kinakailangang suplay
By: Jaymark Dagala
Sinagot ni Pangulong Rodrigo Duterte ang banat sa kaniya ng mga kritiko hinggil sa pagdideklara ng Martial Law sa Mindanao
Sa panunumpa ng mga bagong talagang opisyal ng pamahalaan sa Malakaniyang kahapon, sinabi ng Pangulo na dapat makinig ang kongreso sa mga sundalo at pulis kung may pangangailangan pang palawigin ang nasabing deklarasyon
Ayon sa Pangulo, hindi lamang ang grupong ISIS ang kinahaharap ngayon ng pamahalaan kundi maging ang iba’t ibang lawless elements
Muling binigyang diin ng Pangulo na hindi siya nagmamadaling ideklara ang batas militar sa Mindanao kundi batay ito sa mga impormasyong ipinarating sa kaniya na para sa kaniya’y nangangailangan ng agarang solusyon
By: Jaymark Dagala / Aileen Taliping
Nanindigan si Pangulong Rodrigo Duterte na ISIS na at hindi ang Maute Group ang siyang utak ng mga nangyayaring gulo ngayon sa Mindanao
Inihayag ito ng Pangulo kasabay ng panunumpa ng mahigit isandaang bagong mga appointee ng pamahalaan sa palasyo ng Malakaniyang kahapon
Ayon sa Pangulo, ginagamit lamang ng ISIS ang magkapatid na Abdullah at Omar Maute na nagtungo pa ng Libya para lamamg makapaghasik ng terorismo sa Pilipinas
Pakingan : Pahayag ni Pangulong Duterte
Maliban sa International Terror Group, muling iginiit ng Pangulo na pinopondohan din ng iligal na droga ang Maute na siyang nasa likod ng mga pag-atake
Pakingan : Pahayag ni Pangulong Duterte
By: Jaymark Dagala / Aileen Taliping
Ipinagdiinan ngayon ni Senador Panfilo Lacson na hindi ito ang panahon para humanap ng masisisi sa mga sangkot sa operasyon sa Marawi City
Kasunod na rin ito ng pagkamatay ng labing-isang sundalo sa sariling air strike ng AFP.
Sinabi ni Lacson na ang dapat gawin muna ngayon ay ipanalangin at bigyang parangal ang lahat ng mga nasawing sundalo dahil sila ay mga bayani.
Idinagdag pa ni Lacson na makabubuting hayaan ang AFP at Department of National na tapusin ang fact finding investigation sa naganap na pagkasawi ng 11 sundalo dahil sa friendly fire.
By: Meann Tanbio / Cely Bueno