Patuloy na bineberipika ng PNP o Philippine National Police ang impormasyon hinggil sa di umano’y planong pagdukot sa mga dayuhang nasa Palawan.
Tiniyak ito ni Senior Supt. Dionardo Carlos, Spokesman ng PNP kasunod ng inilabas na travel advisory ng United Kingdom at Canada para sa kanilang mga kababayan na iwasan munang magtungo sa Palawan kabilang na ang Puerto Princesa City.
Tiniyak ni Carlos na nakapaglatag na sila ng seguridad sa Palawan makaraang matanggap ng impormasyon mula sa US Embassy.
Matatandaan na ang US Embassy ang naunang naglabas ng kanilang babala sa lahat ng kanilang mamamayan na iwasan muna ang Central Visayas, lalo na ang Bohol at Cebu dahil sa bantang kidnapping ng mga teroristang grupo.
Dalawang araw matapos ilabas ng US Embassy ang babala ay napasok na ng Abu Sayyaf ang Bohol.
By Len Aguirre
Ipeprisinta ng Pangulong Rodrigo Duterte sa WEF o World Economic Forum on ASEAN o Association of Southeast Asian Nations ang kanyang economic agenda na tinaguriang Dutertenomics.
Alas-3:00 ngayong hapon tutulak patungo ng Cambodia ang Pangulo kung saan gaganapin ang WEF.
Nakapaloob sa Dutertenomics ang malakihang paggastos ng pamahalaan sa pagpapatayo ng mga inprastraktura.
Matapos ang WEF ay bibisitahin naman ng Pangulo ang mga Overseas Filipino Workers o OFWs sa Hong Kong mula May 11 hanggang 13 at magbabalik sa China para sa Belt and Road Forum for International Cooperation.
By Len Aguirre
Nakatali ang kamay ng NFA o National Food Authority para kontrolin ang pagtaas ng presyo ng bigas sa mga pamilihan.
Ayon kay Marietta Ablaza, Spokesperson ng NFA, masyadong manipis ngayon ang buffer stock ng NFA dahil halos labing pitong (17) porsyento lamang ng ani ng mga magsasaka ang kanilang nabili.
Sa ngayon anya ay umaabot lamang sa labing limang (15) araw ang buffer stock ng bigas ng NFA.
Sinabi ni Ablaza na kalimitang ginagawa nila kapag tumataas ang presyo ng bigas ay maglabas ng maraming suplay ng bigas sa mga pamilihan upang mapatatag ang presyo nito.
“Hindi kami makapamili ng palay ng husto dahil ang mga magsasaka ay ibinebenta sa mga traders ang kanilang palay dahil sa mas mataas na presyo, P19.80 sa monitoring namin ang average farm gate price ng palay, ang NFA P17.70 to P18.00 including incentive na po yun, so hindi po kami makapamili ng palay, konti lang, in fact po ang aming napamili lamang ay around 17 percent ng aming target from January to April.” Ani Ablaza
Nagpahayag ng pangamba si Ablaza na kapusin ang suplay ng bigas pagsapit ng lean months na nagsisimula sa buwan ng July.
Ito sana anya ang iniiwasan ng pamahalaan kayat minanduhan sila ng National Economic Development Administration o NEDA na paabutin ng tatlumpung (30) araw ang kanilang buffer stock simula sa Hulyo.
Binigyang diin ni Ablaza na ito ang dahilan kayat iginigiit nila sa NFA Council na payagan na silang makapag-import ng bigas.
“Ang humahawak po nun ay mga private traders na kung saan ang kanilang reason po or motive sa pag-import ay profit, whereas yung government to government na ang importation ay nasa amin lamang pong warehouses yun at hindi namin tuluyang ibebenta kung marami pang palay para hindi po ma-depressed ang presyo ng palay, ibebenta po namin yun ng marami kung June lean months po.” Pahayag ni Ablaza
By Len Aguirre | Ratsada Balita (Interview)
Kuwestyonable para sa Armed Forces of the Philippines ang kredibilidad ni Dr. Rohan Gunaratna, hepe ng International Centre for Political Violence and Terrorism.
Kaugnay ito sa pahayag at babala ni Gunaratna na test run ng ISIS ang pagpapasabog sa Quiapo at posibleng masundan pa ito.
Ayon kay General Restituto Padilla, spokesman ng AFP, hindi nila kinakagat ang mga analysis ni Gunaratna dahil kabaliktaran ang mga ito ng tunay na nangyayari.
“Isa po sa hindi pinaka-credible yan si Gunaratna kasi karamihan ng nagiging analysis niya ay talagang contrary sa mga nagiging findings natin sa Pilipinas.”
PAKINGGAN: Bahagi ng pahayag ni AFP Spokesman Brig. General Restituto Padilla
Iginiit ni Padilla na wala pang presensya ang ISIS sa bansa at kung kung meron mang naghahasik ng kaguluhan, ito ay mga tira-tirang miyembro ng Jemaah Islamiyah na pilit nagpapapansin para kilalanin ng ISIS.
Maliban dito, pinuna ni Padilla na iba ang trade mark ng ISIS sa mga nangyayari sa ngayon.
“Ito’y pagpipilit na sila ay makita, ma-recognize at makakuha ng ayuda sa mga grupong ito, yun pong bagay na naka-establish na ba sila dito, narito na ba talaga sila? Yan po talaga ay subject to debate dahil hindi po kami naniniwala na naka-establish sila sa mga ginagawa nating proactive measures, so pagsapilitan ang ating maihahambing sa mga grupong ito ay yung umaasa at sumasabay sa uso.” Pahayag ni Padilla
Foreign terrorists
Samantala, tiniyak ng Armed Forces of the Philippines na hindi nakakakilos ang mga namonitor nilang teroristang banyaga na nasa bansa.
Ayon kay AFP Spokesman, General Restituto Padilla, proactive ang ginagawang hakbang ng militar kayat bago pa nila maisagawa kung anuman ang kanilang mga plano ay nahaharang na ito ng militar.
Hindi rin anya puwedeng iugnay sa mga pagpapasabog ang mga dayuhang terorista na matagal nang narito sa Pilipinas.
PAKINGGAN: Bahagi ng pahayag ni AFP Spokesman Brig. General Restituto Padilla
By Len Aguirre | Ratsada Balita (Interview)
Muling nabulabog ang Quiapo dahil sa dalawang tila abandonadong bagahe sa may Manila Golden Mosque and Cultural Center.
Walang sinuman sa mga residente sa lugar ang makapagsabi kung kanino ang isang itim na backpack at pink na maleta na iniwan malapit sa puwesto ng mga pulis sa Manila Police District o MPD.
Gayunman, ayon kay Senior Supt. Santiago Pascual, Station Commander ng Station 3 ng MPD, wala namang kahina-hinalang laman ang mga naiwang bagahe.
Kalaunan anya ay lumitaw na ang mga bagahe ay pag-aari ng mga taong nakikitulog sa golden mosque.
Samantala, sinabi ni Santiago na tinatayang apat na raang (400) pulis ang nakalatag ngayon sa Quiapo area upang mangalaga sa seguridad.
Naka-puwesto pa rin anya sa mga istratehikong lugar ang mga checkpoints.
Una rito, hiniling ng mga residenteng Muslim ng Quiapo na higpitan pa ang seguridad sa kanilang lugar lalo na sa panahon ng Ramadan.
By Len Aguirre | with report Aya Yupangco (Patrol 5)
Pormal nang nagsimula ang light training ni Senador Manny Pacquiao para sa nakatakdang laban kay Australian Boxer Jeff Horn.
Ipinabatid ni Nonoy Neri, conditioning coach ni Pacman na isang oras tumagal ang panimulang training ng Pambansang Kamao.
Kahapon ng umaga ay nag-jogging si Pacman sa Forbes Park sa Makati City habang bandang hapon naman ay bumalik ito sa gym para sa basic training tulad ng punch mitts, punching bag, speed ball at iba pa.
Sinabi ng Team Pacquiao na habang nasa light training pa ay nakatutok pa sila sa jogging at ladder para muling makondisyon ang mga binti ni Pacman.
Inamin naman ni Neri na bahagyang nadagdagan ang timbang ng senador na dahilan kayat bumagal ang pagtakbo nito.
By Judith Larino
Halos isanlibo (1,000) katao ang naitalang apektado ng HIV/AIDS noong March 2017 kung kailan nakapagrehistro ng pinakamaraming kaso simula noong 1984.
Ayon sa HARP o HIV/AIDS and Art Registry of the Philippines, naitala nila ang siyam na raan at anim naput walong (968) indibidwal na nagtataglay ng nasabing sakit at limampu’t siyam (59) ang Overseas Filipino Workers o OFWs dito.
Ang nasabing bilang ay tatlumpu’t dalawang (32) porsyento ng mga naiulat na kaso kumpara sa parehong panahon noong isang taon.
Siyam na raan at dalawampu’t anim (926) sa mga may HIV/AIDS ay kalalakihan at apatnapu’t dalawa (42) naman ang babae na kapwa nasa edad na dalawampu’t lima (25) hanggang tatlumpu’t apat (34) at kinse (15) hanggang beinte kuwatro (24) anyos.
Sexual contact partikular ng lalaki sa lalaki ang nangungunang paraan nang paglilipat ng nasabing sakit sa karamihan ng mga lalaking biktima.
Ang NCR o Natioal Capital Region o Metro Manila ang nakapagtala ng pinakamaraming kaso ng HIV/AIDS noong Marso at mula January 1984 hanggang March 2017.
By Judith Larino
May bago nang pangulo ang South Korea makaraang patalsikin sa pamamagitan ng impeachment ang dati nilang pangulo na si Park Geun Hye.
Wagi via landslide victory sa katatapos lamang na eleksyon si Moon Jae In na kilalang leftist human rights lawyer.
Nakakuha si Moon mula sa Democratic Party ng 41.4 percent ng boto habang ang kalaban niyang sina Hong Joon Pyo ng Conservative ay nakakuha ng 23.3 percent at si Ahn Cheol Soo ng Centrist Party ay nakakuha naman ng 21.8 percent ng mga boto.
Kabilang sa mga plataporma ni Moon ay ang muling pagsasaayos ng ugnayan sa pagitan ng South at North Korea.
By Jaymark Dagala
