Patay ang labing dalawa (12) katao kabilang ang limang (5) bata at sugatan ang tatlumpung (30) iba pa sa pagsabog sa isang bahay na imbakan ng mga paputok sa Central Mexico.
Nangyari ang naturang pagsabog sa San Isidro, Chilchotla sa kasagsagan nang paghahanda para sa isang local festival sa susunod na linggo.
Ayon sa mga awtoridad ang sinindihang paputok ng isang lalaking nasa labas ng bahay ay bumagsak mismo sa area kung saan naroon ang iba pang paputok na naging dahilan nang pagsabog.
Kaagad nasawi ang siyam (9) katao at tatlo (3) naman ang namatay matapos isugod sa mga kalapit na ospital.
Magugunitang noong Disyembre ay tatlumpu’t lima (35) katao ang nasawi sa serye ng malalakas na pagsabog na sumira sa isang fireworks market sa labas ng Mexican capital.
By Judith Larino
Itinakda na ng Department of Education o DepEd ang opisyal na pagbubukas ng klase sa mga pampublikong elementarya at sekondarya sa Hunyo 5.
Ayon kay Education Secretary Leonor Briones, 195 na araw ang dapat ang ipasok ng mga estudyante para sa school year 2017-2018.
Samantala, maaari naman aniyang mahuli ng ilang araw ang pagbubukas ng klase sa mga pribadong paaralan ngunit hindi maaring mauna sa itinakdang araw.
Inimbitahan naman ng kalihim ang mga magulang at iba pang mga miyembro ng komunidad na makiisa sa Brigada Eskwela na itinakda sa Mayo 15.
By Rianne Briones
Personal na nakipagpulong si Pangulong Rodrigo Duterte sa mga magsasakang mula sa Tagum, Davao del Norte kahapon.
Noon pang Mayo 1 nagsimula ang kilos protesta ng mga magsasaka sa Mendiola upang ireklamo ang pananakot ng mga private armies at pagkamkam sa kanilang mga lupang sakahan.
Sinabi naman ng Pangulo na sisiguruhin nyang muling makuha ng mga magsasaka ang mga lupain na dati nang ini-award sa kanila.
Kasunod nito, nangako ang Pangulo na bibigyan ang mga magsasaka ng masaganang hapunan sa isang hotel at sasakay ng eroplano pauwi ng Davao.
PAKINGGAN: Bahagi ng pahayag ni Pangulong Rodrigo Duterte
By Rianne Briones
Sumuko sa gobyerno ang pitong (7) miyembro ng Abu Sayyaf Group sa Barangay Tandu Bato Luuk, Sulu noong Lunes ng gabi.
Ayon kay Joint Task Force Sulu Brig. General Cirilito Sobejana, lima (5) sa mga sumuko ay mga taga-sunod ni ASG Sub-leader Alhabsy Misaya habang ang dalawang (2) iba pa ay taga-sunod naman ni Sub-leader Tomas Idjas.
Nakuha sa mga ito ang ilang malalakas na baril tulad ng M-14, M-16 at M-1 garand rifles.
Nangako pa ang mga sumukong rebelde na tutulong sa gobyerno upang tuluyan nang mapulbos ang ASG.
By Rianne Briones
Bababa ang singil ng MERALCO o Manila Electric Corporation epektibo ngayong buwan ng Mayo.
Sinabi ni MERALCO Spokesperson Joe Zaldarriaga, bunsod ito ng mababang generation charge at pagbaba ng halaga ng kuryente sa mga supplier.
Dalawampu’t siyam na sentimo (P0.29) ang magiging bawas sa kada kilowatt hour na konsumo ng kuryente o katumbas ng 58 pesos sa kumukonsumo ng 200 kilowatt hour, 87 pesos sa mga kumukonsumo ng 300 kilowatt hour at 145 pesos sa mga kumukonsumo ng 500 kilowatt hour.
By Rianne Briones
Naglabas ng travel advisory ang Estados Unidos at United Kingdom dahil sa posibleng pagdukot ng mga terorista sa Palawan.
Sa inilabas na travel advisory ng U.S. Embassy sa Maynila, nakasaad na nakatanggap sila ng impormasyon na plano umano ng mga teroristang grupo na magsagawa ng kidnapping activities sa Palawan, kabilang na ang Puerto Princesa City at Puerto Princesa Subterranean River National Park, kung saan target ang mga foreign national.
Pinapayuhan naman ng United Kingdom ang kanilang mamamayan na maging mapagmatyag at i-reconsider ang kanilang travel plans.
By: Meann Tanbio
Umaabot na sa 30 ang bilang ng EJK o Extra-Judicial killings na nakabinbin sa mga hukuman.
Ito ang nakasaad sa ulat ni DOJ Usec. Reynante Orceo sa United Nations Human Rights Council na nagsasagawa ng pag-aaral tungkol sa sitwasyon ng karapatang pantao sa bansa.
Ayon kay Orceo, sakop nito ang kabuuang 1,089 na mga insidente na dumaan sa validation ng binuong inter-agency committee nuong 2012 na tumututok sa mga kaso ng EJK.
Paliwanag ni Orceo, ang gobyerno sa ilalim ni dating Pangulong Noynoy Aquino ay bumuo ng inter-agency committee sa ilalim ng administrative order number 35 na tututok sa mga kaso ng EJK na tumutukoy sa mga pagpatay sa mga miyembro ng Cause Oriented Group o di kaya’y myembro ng media, labor group at environmental advocate.
Samantala, ang mga pagpatay naman sa ilalim ng war against drugs ng administrasyong Duterte ay kasalukuyang iniimbestigahan ng DOJ at NBI, sa bisa ng Department Order no. 120 na inilabas ni Justice Secretary Vitaliano Aguirre.
By: Meann Tanbio / Bert Mozo
Sinampahan ng BIR sa Department of Justice ang Mighty Corporation ng panibagong tax evasion case.
Ito’y dahil umano sa kabiguan ng Mighty Corporation na magbayad ng excise tax na nagkakahalaga ng P26.93 Billion.
Nag-ugat ang panibagong reklamo sa ikinasang operasyon ng Bureau of Customs nuong March 24 sa mga warehouse ng Mighty Corporation sa San Ildefonso, Bulacan kung saan nasamsam ang mahigit 81.5 Million cigarette packs o mahigit 163 Libong master cases ng sigarilyo.
Kasama sa mga sinampahan ng reklamong paglabag sa section 263 at section 265, paragraph C, ng National Internal Revenue Code of 1997 sina Mighty Corporation President Edilberto Adan na isang retiradong heneral ng Armed Forces of the Philippines; Executive Vice President Oscar Barrientos na isang retiradong hukom; Vice President for External Affairs at Assistant Corporate Secretary Alexander Wongchuking; at Treasurer Ernesto Victa.
Ang unang reklamong tax evasion laban sa Mighty corporation ay inihain ng BIR nuong March 22 dahil sa hindi rin nabayarang excise tax na nagkakahalaga ng mahigit 9 Bilyong Piso.
By: Meann Tanbio / Bert Mozo
Ipinababasura ni Vice President Leni Robredo sa Korte Suprema na tumatayong PET o Presidential Electoral Tribunal ang mosyon ng kampo ni dating Senador Bongbong Marcos na nagpapabasura sa counter-protest ng Bise Presidente kaugnay ng umano’y dayaan sa halalan 2016.
Ayon kay Robredo, dapat na ituring ng PET ang mosyon ni Marcos bilang isang “sham pleading” na dapat ibasura na o tanggalin sa records ng PET.
Una nang dumulog sa PET si Marcos, na humihirit na ibasura ang counter-protest ni Robredo dahil sa kabiguan nitong magbayad sa orihinal na deadline ng unang installment ng hinihinging halaga ng PET nuong April 14 sa kampo ni Robredo.
Noong Mayo 2 na nakapaglagak si VP Robredo ng P8-milyong paunang bayad ng kabuuang hinihingi ng pet para sa kanyang counter-protest.
Naniniwala ang Bise Presidente na dahil nagawa naman nilang makasunod sa kautusan ng PET, maituturing na ring moot and academic ang mosyon ni Marcos.
By: Meann Tanbio / Bert Mozo