June 2026

Inamin ni Senador Bam Aquino na bahagyang naapektuhan ang kredibilidad ng C.A. o Commission on Appointments dahil sa ipinatupad na secret voting.

Sa panayam ng programang “Balita Na, Serbisyo Pa”, sinabi ni Aquino na ito ang nag-udyok sa kanya para maghain ng resolusyon sa C.A. kahapon na humihiling na repasuhin o amyemdahan ang alintuntunin hinggil sa secret voting.

Sa harap na rin ito ng pagpuna ng ilan sa kawalan ng transparency sa ginawang botohan sa pagkakabasura ng C.A. sa appointment ni dating DENR Secretary Gina Lopez dahil hindi tugma ang bilang ng boto at ng mga inanunsyong boto ng Senador.

Si Aquino, na miyembro ng C.A. ay bumoto ng “yes” sa confirmation ni Lopez.

Kasabay nito, sinabi rin ni Aquino na wala siyang alam na may umikot na lobby money sa confirmation ni Lopez.

By: Meann Tanbio / BNSP

Itinalaga ni Pangulong Rodrigo Duterte si Margaux Justiniano Uson o mas  kilala  bilang  Mocha Uson bilang  Assistant Secretary ng PCOO o Presidential Communications Operations  Office.

Pirmado ni Pangulong Duterte  ang appointment  ni Mocha  na may petsang  May 8, 2017.

Una nang itinalaga si Mocha  bilang board member ng MTRCB noong Disyembre 2016.

Pero, sinabi ni Executive Secretary Salvador  Medialdea  na  dahil may bagong  posisyon si Mocha,  hindi na  ito konektado sa  MTRCB.

Inaasahang  makakahalubilo ni Mocha  sa  Malacanang  ang  mainstream media  na  naunang  tinawag  nitong  mga  “Presstitutes”.

Sinabi ni Presidential Communications  Secretary Martin Andanar na si Uson ay magiging  Asst. Secretary for  Social Media ng PCOO dahil  ito ang forte  nito.

By: Meann Tanbio / Aileen Taliping

Inihayag ng Malakanyang na ang  pagkakaroon  ng  “sense  of objectivity and  balance” ang  nakitang  katangian ni Pangulong  Rodrigo Duterte  kay Ret. Gen. Roy  Cimatu  kaya  siya  itinalaga bilang bagong kalihim ng DENR.

Sinabi ni Presidential Spokesman Ernesto Abella na  naramdaman ng  Pangulo  na  mayroong  kakayahan si Cimatu na  balansehin ang environmental concerns at  mining  operations kaya  siya inilagay sa  nabanggit  na  tanggapan.

Hindi naman  sinagot  ng  palasyo ang  tanong  kung  ikinukunsidera  ng Pangulo si Lopez  na  maging  undersecretary  ng DENR  matapos  itong  hindi makalusot sa  Commission on Appointments.

Ipinabatid ni Abella na  walang  mungkahi sa palasyo at  hindi napag-usapan ang  posibilidad  na   maging  undersecretary  ng  DENR si Gina Lopez.

By: Meann Tanbio / Aileen Taliping

Kinumpirma ni Presidential Spokesman Ernesto Abella na hindi napag-uusapan sa  mga  pulong  sa Malakanyang ang  posibilidad na  gawing  state  witness  si PDAF Scam Queen  Janet Lim Napoles laban sa mga kasalukuyan at dating  opisyal na  nakinabang sa Pork Barrel Fund.

Ayon kay Abella, ang tanging natanggap lamang  nilang  pahayag mula sa Office  of the  Solicitor General ay walang  matibay na ebidensiya  kay Napoles  sa naibasurang kaso  nito sa  korte.

Wala  rin aniyang  nababanggit  si Pangulong Rodrigo Duterte  hinggil kay Napoles  kaya  hindi nila alam kung saan nanggaling ang patungkol sa  state  witness.

Si Napoles ay  pinawalang  sala  ng  Court  of  Appeals sa  kasong  serious  illegal detention at  binaligtad  ang  hatol  ng  Makati Regional Trial Court  na  habambuhay na pagkabilanggo.

By: Meann Tanbio / Aileen Taliping

Ikinalugod ni Senador Francis Escudero ang pagkakatalaga kay Nestor Espenilla bilang bagong Governor ng Bangko Sentral ng Pilipinas.

Ayon kay Escudero, maganda na insider ang bagong BSP Governor para magkaroon ng kinakailangang fiscal at monetary backbone na siyang  sisiguro ng patuloy na paglakas at paglago ng ekonomiya ng bansa.

Tiniyak din ni Escudero na bilang chairman ng Senate Committee on Banks, Financial Institutions and Currencies, masusi siyang nakikipagtulungan sa Central Bank sa pagbuo ng panukalang batas na mag-aamyenda sa bank secrecy law, anti money laundering act at BSP charter.

By: Meann Tanbio / Cely Bueno