June 2026

Naglabas ng advisory ang DTI Agusan Del Norte hinggil sa ipinatupad na price freeze, kasabay sa pagdedeklara ni Pangulong Rodrigo Duterte ng Martial Law sa Mindanao.

Ipinabatid ni Wyn Palma, Consumer Welfare Division Chief ng DTI Agusan Del Norte, otomatikong ipatutupad ang prize freeze sa lugar na isinailalim sa Martial Law sa loob ng 60 araw.

Sa ngayon, aniya ay patuloy ang kanilang monitoring sa presyo ng mga pangunahing bilihin gaya ng bigas.

Umaasa si Palma na tatalima ang mga negosyante kasabay ng paalala na may kaukulang penalty ang lalabag dito.

By: Meann Tanbio

Isinampa na ng Department of justice sa Bureau of Internal Revenue ang ikatlong tax evasion case laban sa Mighty Corporation.

Batay sa reklamo ng BIR, nabigo ang Mighty Corporation na magbayad ng P1.39 Billion na halaga ng tax na nag-ugat sa pagsalakay ng gobyerno sa warehouse ng kumpanya sa Barangay Lagao, General Santos City noong Marso 24.

Nadiskubre sa naturang raid ang 4.7 million na pakete ng sigarilyo na may pekeng tax stamps.

Kabilang sa mga sinampahan ng kaso sina Mighty President at dating Armed Forces Deputy Chief of Staff Edilberto Adan, Mighty Corporation Vice President for External Affairs at Assistant Corporate Secretary Alex Wongchuking, Executive Vice President at retired Judge Oscar Barrientos at Treasurer Ernesto Victa.

Sa ikatlong reklamo, papalo na sa P37.884 Billion ang umano’y tax na hindi Nabayaran ng mighty Corporaton sa pamahalaan.

By: Meann Tanbio

Umapela ang AFP o Armed Forces of the Philippines sa mga residente sa Mindanao na may hawak na loose firearms isuko na ang mga ito sa otoridad.

Ayon kay AFP Spokesman Brig. Gen. Restituto Padilla na tumatayo ring tagapagsalita ng implementation ng Martial Law sa Mindanao, kung hindi man isusuko ang mga loose firearms, gumawa na ng inisyatibo na gawing legal o ikuha ng permit ang kani-kanilang armas.

Binigyang-diin ni Padilla na layon nito na hindi na maabala ang mga residente ngayong nasa ilalim ng batas militar ang Mindanao.

By: Meann Tanbio

Ipinagtanggol ng  Malakanyang ang  puna  ni dating  Pangulong Fidel Ramos  na  “junket” ang   biyahe  ni Pangulong  Rodrigo Duterte sa  Russia  dahil dala  nito ang  halos  lahat  ng  kanyang  miyembro ng  gabinete at  halos  walang  naiwang  opisyal sa  bansa.

Iginiit  ni  Presidential Spokesman Ernesto Abella, na  ang  official visit  ng  Pangulo sa Moscow, Russia ay mahalaga  at  strategic move para  lalo pang  palawakin ang  saklaw   ng independent  foreign policy  ng  gobyerno.

Dagdag pa ni Abella, ang pinakamainam na  pamantayan sa  naging  biyahe  ng  Pangulo ay ang  resulta  at  pakinabang  na  makukuha  ng  Pilipinas,  bukod pa dito ang   pagbuhos  ng  pamumuhunan  at  ang   hindi matawarang  suporta  na  ibinibigay  ng  mga  Pilipino  na  indikasyong ginagawa  nito ang  tama  para sa  bansa.

Matatandaang pinuna  ng  mga  kritiko ang  maraming   bilang  ng  delegasyon  ng  Pangulo sa   kanyang  biyahe sa  Russia, kabilang  na  ang  mga  miyembro ng  gabinete,  mga   assistant  secretaries  ng   ilang  tanggapan,  mga  asawa umano   ng  heneral ,  ilang  mga  dating  supporters  sa  kampanya  gaya  ni Sandra Cam  at  mga  artistang  tulad  nina  Robin  Padilla, Cesar Montano  at  iba  pa.

By: Meann Tanbio / Aileen Taliping

Ibinunyag  ng  pamahalaan na planong  sakupin ng  Maute  Terrorist  Group ang  Mindanao  sa  tulong  ng  mga  dayuhang  terorista  para  itatag ang  ISIS province sa  Mindanao.

Ayon Solicitor General Jose Calida,  ito ang  isa sa  mabigat  na  dahilan  kaya  idineklara  ni Pangulong  Rodrigo Duterte ang  Martial Law sa  buong  Mindanao at  hindi dahil lamang dahil sa  kaguluhan sa  Marawi City.

Na-monitor  aniya ng  security at  intelligence  units  ng  gobyerno  ang  plano ng  ISIS at Maute  para  atakehin ang  gobyerno at itatag  ang  “Wilayat” o ISIS Province  of  Mindanao.

Sinasabing ang  planong  pag-atake  ay  hindi lamang  nakatutok sa  gobyerno kundi maging  sa  mga  taong  hindi  naniniwala  sa  relihiyon , maging  ang  mga ito man ay  Muslim o Kristiyano  na  nasa  Marawi, Cagayan de  Oro, Davao, Zamboanga, Cebu, Manila  at  iba  pang  lungsod sa  bansa.

Ang nakababahala, ayon kay Calida ay  marami ng mga  kabataang  Muslim ang  nasailalim sa doktrina ng  ISIS, patunay dito ang  nangyaring  Davao City Bombing  noong  September 2016 kung  saan mga kabataan ang  sangkot sa  pagpapasabog.

Ipinabatid ni Calida si Isnilon Hapilon ang  itinalaga  ng  ISIS  bilang  Emir  o lider  nila sa  Pilipinas at gawin ang  Mindanao bilang  Islamic state  o “Daulah Islamiya”

By: Meann Tanbio / Aileen Taliping