June 2026

Mas makatutulong ang publiko sa gobyerno na mapabilis ang pagresolba sa problema sa Mindanao kung hahayaan muna ang pamahalaan na gawin ang mga nararapat  na hakbang sa halip na batikusin.

Reaksyon ito ni  Senador Panfilo Lacson sa  naging kritisismo ni dating Pangulong Fidel Ramos sa  mga naging  desisyon at pahayag ni Pangulong Rodrigo Duterte kaugnay ng krisis sa Marawi City, partikular ang sinabi ng punong ehekutibo na maaari niyang ideklara ang Martial Law sa buong bansa.

Giit ni Sen Lacson, mahirap namang bumatikos na lang ng hindi naman nalalaman kung ano ang mga nakukuhang impormasyon  ng Pangulo hinggil sa tunay na mga  nangyayari sa Marawi.

Mas makabubuti aniya na maging mapagbantay na lamang ang publiko laban sa  posibleng pag-abuso sa implementasyon ng Martial Law.

Sa panig naman ni Senador Gringo Honasan, sinabi nito na bagamat karapatan ng sinuman na magsalita at magpahayag ng pananaw sa ilalim ng umiiral na demokrasya sa bansa, pero mas mainam aniya  kung kinausap na lang ni FVR ng personal at pribado ang Pangulo sa halip na sa harap ng media ito nagsalita.

Idinagdag pa ni Honasan na sa halip na bumatikos, makabubutingmakipagtulungan ang publiko sa gobyerno kung paano agarang mapapahupa  o mapapakalma ang sitwasyon sa Mindanao.

By: Meann Tanbio / Cely Bueno

Marami pa umanong residente sa Marawi City ang naiipit sa labanan ng militar at Maute group.

Napag alaman ito kay Vice Mayor Alden Maruhom ng bayan ng Marantao subalit may bahay sa Marawi City.

Tinukoy ni Maruhom ang mga Barangay Saduc Proper, Paggao Saduc at Lilod Saduc kung saan marami pa anya ang humihingi ng ayuda para maka-alis sa lugar.

Ayon kay Maruhom, mismong ang kanyang pamilya ay dalawang araw ring hindi kumain matapos maipit ng dalawang araw sa labanan.

Nang magkaroon ng pagkakataon, dinala na ni Maruhom sa kapitolyo ang tinatayang isandaan (100) katao sa kanilang barangay na naipit sa labanan kabilang ang kanyang pamilya.

“Tuloy pa po, tuloy pa po yung bakbakan. Marami pa pong sibilyan ang naipit so, gusto ko po sana humingi ng tulong, tulungan po natin yung sibilyan. Isa na po ako dun sa na-trap dun sa bakbakan, malayo sa amin yung bakbakan may mas malapit pa na tumatawag sa akin na ‘Vice tulungan nyo na po kami, hindi na po namin kaya”, ani Maruhom.

By Len Aguirre | Ratsada Balita Program (Interview)

Naghain ng petisyon para sa umento sa sahod ng mga manggagawa sa pribadong sektor sa National Capital Region (NCR) ang ALU-TUCP o Associated Labor Unions – Trade Union Congress of the Philippines.

Isandaan at walumput  apat na piso (P184.00) ang hiniling na dagdag sa minimum wage ng ALU-TUCP, mas mataas sa nauna nilang plano na P157.00.

Ayon kay Eva Arcos ng ALU-TUCP, ibinatay nila ito sa mga datos mula sa NWPC o National Wage and Productivity Commission.

Batay sa datos ng NWPC, malaki na ang ibinagsak ng purchasing power o kakayahang makabili ng mga manggagawang tumatanggap ng minimum wage.

Umaabot na lamang umano sa tatlong daan at limamput pitong piso (P357.00) ang tunay na halaga ngayon ng P491.00 na minimum wage sa NCR batay sa itinaas ng presyo ng mga bilihin at pangunahing serbisyo.

Nakapaloob rin sa petisyon ng ALU-TUCP ang limandaang piso (P500.00) kada buwan na subsidy para sa mga minimum wage earners sa loob ng isang taon upang makatulong sa kanilang budget para sa pagkain at kalusugan.

Kasabay nito, umaasa ang ALU-TUCP na matutupad ang pangakong follow-up meeting sa kanila ng Pangulong Rodrigo Duterte.

By Len Aguirre

Handang gamitin ng Armed Forces of the Philippines o AFP ang kapangyarihan nilang kitlin ang freedom of expression kung makakapagligtas ito ng buhay o kung malalagay sa alanganin ang kanilang operasyon laban sa mga terorista.

Gayunman, agad nilinaw ni Brig. General Restituto Padilla, spokesman ng AFP na hindi nila inirerekomenda ang pagkitil sa kalayaan ng pamamahayag kung hindi naman kinakailangan.

Dahil dito, hiniling ni Padilla ang kooperasyon ng taumbayan para sa maayos na maipatupad ang martial law at maibalik agad sa normal ang sitwasyon sa Mindanao.

Nakatakda rin anya silang maglagay ng checkpoints at magdeklara ng curfew sa ilang bahagi ng Mindanao.

“Such measures will be announced ahead of time, on that, we encouraged the public and asked them and request them to please extend your full cooperations to avoid any inconvenience. The AFP has not yet recommended the suspension of freedom of expression but will exercise the right to censure based on the following: One, to ensure the safety of lives; Second, to ensure operational security for the safety of our own men in uniform who are fighting; and for other national security considerations”, pahayag ni Padilla.

Kasabay nito, umapela sa publiko si Padilla na isumbong sa kanila ang anumang makikitang pang aabuso sa panig ng mga sundalo at iba pang tigapagpatupad ng martial law.

Tiniyak ni Padilla ang mabilis na aksyon upang mapanagot ang mga mang aabuso sa batas militar.

Gayunman, umapela rin si Padilla sa taumbayan na magtiwala sa sandatahang lakas ng bansa.

“There are many quarters who have been raising issues already. They are people living the past, I would like to state that under the new basis for this martial law is declared those of the past are very different from the way it is going to be implemented today. Our Armed Forces is a new Armed Forces that you should trust. We are the Armed Forces of the people whose oath is to protect the state and every citizen of this country and we will do that”, bahagi ng pahayag ni Brig. General Restituto Padilla.

By Len Aguirre