Inilabas na ng Korte Suprema ang listahan ng mga pumasa sa 2016 bar examination.
Ayon sa SC, mataas ang passing rate ngayong taon na nasa 59.06 percent mula sa 26.21 percent noong 2015 bar exams.
Katumbas ito ng tatlong libo pitongdaan at apatnaput pitong (3,747) law graduates na pumasa mula sa mahigit animnalibot dalawandaang (6,200) kumuha ng naturang pagsusulit.
Nasa dalawanlibo limandaan at siyamnaput pito (2,597) naman ang lumalabas na hindi pinalad na makapasa sa bar exam.
Nanguna sa 2016 bar exam si Karen Mae Calam ng University of San Carlos sa Cebu na nakakuha ng average na 89.05 percent.
Sinundan ito ni Alanna Gayle Ashley Khio ng Silliman University.
Pumapangatlo sina Fiona Cristy Lao ng University of San Carlos at Athalia Liong ng Andres Bonifacio College.
Pang apat si Allana Mae Babayen-On habang panglima si Justin Ryan Morilla ng Ateneo de Davao University.
Pasok din sa top ten sina Mark Dave Camarao ng Northwestern University, Anne Margaret Momongan ng University of San Carlos, Jefferson Gomez ng University of San Carlos, Nia Rachelle Gonzales ng University of Batangas, Marie Chielo Ybio ng Silliman University at Andrew Stephen Liu ng Silliman University.
By Ralph Obina with report from Bert Mozo (Patrol 3)
Inilunsad na ng Department of Health o DOH ang programang tutugon sa problema ng malnutrisyon sa bansa.
Ayon kay Health Secretary Paulyn Ubial, sa ilalim ng Philippine Plan of Action for Nutrition, target ng ahensya na mabawasan ang iba’t ibang uri ng malnutrisyon sa bansa gaya ng micronutrient deficiencies, overweight at obesity.
Batay sa tala ng DOH, nasa 3.8 milyong bata ang nagugutom sa bansa habang nasa labing walong (18) milyong Pinoy naman ang overweight at obese.
Lumalabas na nasa tatlongdaan at dalawampu’t walong (328) bilyong piso ang nawawala sa ekonomiya ng bansa dahil sa malnutrisyon.
By Ralph Obina
Bumubuti na ang produksyon ng sibuyas sa bansa.
Ayon kay Agriculture Secretary Manny Piñol, ang higit na kailangan ngayon ng mga magsasaka sa Nueva Ecija ay karagdagang cold storage lalo’t isang beses lamang sa isang taon umaani ng sibuyas.
Hindi naman aniya agad-agad naibebenta ang sibuyas sa merkado kung kaya’t kinakailangan na itabi ang mga ito.
Ipinabatid ni Piñol na kapag nasa cold storage ang sibuyas, karagdagang gastos ulit ito at pagnagkataon, may epekto ito sa presyo ng sibuyas sa merkado.
By Meann Tanbio
Welcome para sa mga opisyal ng militar at defense ang plano ni Pangulong Rodrigo Duterte na magsagawa ng joint military exercises ang Pilipinas at China.
Matatandaang inihayag ng Pangulo ang nasabing plano matapos na inspeksyunin nito ang isang Chinese warship na nakadaong sa Davao City nitong Lunes.
Ayon kay Armed Forces of the Philippines o AFP Chief of Staff General Eduardo Año, maraming bagay ang maaaring matutunan ng China sa Pilipinas at ganun din naman ang Pilipinas sa China tulad ng humanitarian assistance and disaster response, anti-piracy at counter terrorism scenarios.
Ngunit para magawa ito ay dapat na nakapaloob ito sa isang VFA o Visiting Forces Agreement upang maging malinaw ang protocol at kung tumatalima ito sa mga umiiral na kasunduan sa mga kaalyadong bansa.
Gayundin ang naging posisyon ni Defense Secretary Delfin Lorenzana, aniya, kung sakali ay ito ang kauna-unahang pagkakataon na tatapak ang mga sundalong Tsino sa Pilipinas kaya’t marapat na mayroong VFA na maipasa ang Kongreso ukol dito.
By Rianne Briones
Pansamantalang hindi matutuloy ang taas-singil sa kontribusyon sa SSS o Social Security System ngayong buwan.
Ayon kay SSS President at Chief Executive Officer Emmanuel Dooc, ito ay dahil hindi pa naglalabas si Pangulong Rodrigo Duterte ng opisyal na kautusan ukol dito.
Kinakailangan rin aniyang i-upgrade ang sistema ng SSS para sa ipatutupad na dagdag singil sa kontribusyon.
Enero nang i-anunsyo ang pagtataas ng singil sa kontribusyon ng mga miyembro upang makaagapay sa ipinatupad na dagdag na isang libong piso (P1,000) sa mga SSS pensioner.
By Rianne Briones
Wagi ang La Salle Lady Spikers matapos talunin ang Ateneo Lady Eagles sa Game 1 ng UAAP o University Athletics Association of the Philippines Season 79 Women’s Volleyball Tournament Finals sa Smart Araneta Coliseum kagabi.
Ipinamalas ni Kim Fajardo ang kanyang husay kung saan nailista nito ang 37 excellent sets kasama ang 10 puntos na tinampukan ng pitong (7) aces para dalhin ang Lady Spikers sa 1-0 bentahe sa best-of-three championship series.
Pinangunahan naman ni open hitter Ernestine Tiamzon ang attack line matapos magpako ng 15 hits, habang nag-ambag ng 14 puntos si Season 78 Finals MVP Kim Kianna Dy para sa solidong opensa ng La Salle.
Sampung (10) puntos naman ang idinagdag ni Desiree Cheng at pinagsamang 15 puntos nina middle hitters Mary Joy Baron at Aduke Ogunsanya.
Samantala, bumandera sa hanay ng Lady Eagles si Jhoana Maraguinot na may 16 puntos, gayundin sina Bea de Leon na umukit ng 14 markers at Michelle Morente na gumawa ng 11 kills.
By Meann Tanbio
Photo Credit: GoArchers / Facebook
Patay ang 32 katao sa pag-atake ng Islamic State sa lugar na kinaroroonan ng US-backed Syrian democratic forces sa northeast Syria.
Ayon sa Syrian Observatory for Human Rights, nangyari ang pag-atake sa Rajm Al-Salibi kung saan matatagpuan ang checkpoint at refugee camp na malapit sa border ng Iraq.
Ilan sa mga namatay ay mga sibilyan kabilang na ang ilang indibidwal na tumatakas sa Islamic State sa Deir Al-Zor sa Syria at iraq.
Ang SDF ay nakikipagbakbakan sa Islamic State sa Hasaka Province na kontrolado ng Kurdish Forces.
By Meann Tanbio
