Ipinaiimbentaryo ng ilang opposition congressmen sa Malacañang ang P15.5-bilyong pondo na inilaan ng gobyerno sa katatapos lamang na ASEAN o Association of Southeast Asian Nations Summit.
Ayon kay Albay Representative Edcel Lagman, dapat na i-account ang nabanggit na ASEAN fund kung saan bahagi rin dito ang budget para sa Office of the President.
Iginiit naman ni Caloocan City Representative Edgar Erice na nararapat lamang na magpaliwanag ang administrasyong Duterte kung bakit ang laki ng iginugol na pera sa ASEAN, kung ikukumpara sa nagastos ng Aquino administration sa APEC o Asia Pacific Economic Conference Leader’s Summit noong 2015 kung saan host ang Pilipinas.
Binigyang diin ni Erice na mas malaking grupo ang APEC kumpara sa ASEAN.
Ang APEC ay binubuo ng 21 bansa, habang ang ASEAN ay binubuo ng sampung (10) bansa kabilang na ang Pilipinas, Indonesia, Malaysia, Thailand, Singapore, Vietnam, Laos, Cambodia, Myanmar at Brunei.
By Meann Tanbio
Inaprubahan na ng Senado sa ikatlo at huling pagbasa sa Senado ang panukalang batas na lilikha sa isang National Mental Health Policy.
Ipinasa ng mataas na kapulungan ng Kongreso sa unang araw ng pagbabalik sesyon nito ang Senate Bill 1345 o Philippine Mental Health Bill.
Umani ang naturang panukala ng landslide votes at walang abstention.
Ang bill ay inisponsoran ni Senador Risa Hontiveros, dating Senate Committee on Health Chairperson.
Layunin nito na isama ang mental health services sa public health system at magkaloob ng basic mental health services sa community level.
By: Drew Nacino / Cely Bueno
Isang kadete ng Philippine Military Academy (PMA) ang patay limang (5) araw matapos isugod sa Baguio General Hospital and Medical Center.
Kinilala itong si Cadet 4th Class Erwin Christian Vergara, 19 anyos na binawian ng buhay noong Lunes dahil umano sa Hemorrhagic Shock o Hypovolemia.
Ang Hypovolemia ay isang uri ng karamdaman kung saan kinakapos ng supply ng dugo o body fluid ang isang tao dahilan upang tumigil ang pagtibok ng puso.
Ayon kay P.M.A. Spokesman, Lt. Col. Reynaldo Balido, Abril 25 nang isugod sa ospital si Vergara pero wala namang indikasyon na minaltrato ito o sumailalim sa hazing.
Abril nang pumasok sa P.M.A. si Vergara na tubong-Alcala, Cagayan.
Samantala, napag-alaman ng mga doktor na may medical history ng pabalik-balik na pananakit ng tiyan sa nakalipas na tatlong taon ang kadete.
By Drew Nacino / Jonathan Andal (Patrol 31)
Muling sinupalpal ni Senador Leila de Lima si Pangulong Rodrigo Duterte sa patuloy nitong pag-atake sa dalawang malaking media organizations.
Tinawag ni De Lima si Duterte na “old man” na nagpapatakbo ng gobyerno pero mayroon umanong emotional quotient o E.Q. na pang-anim na taong gulang.
Ito, ayon sa Senador, ay dahil binabaliwala ng Pangulo ang constitutional principle sa press freedom at democratic governance ng mga professional civil service corps upang bigyang katuwiran ang kanyang pagganti sa pagiging biktima umano niya ng kasong estafa.
Sa halip anya na magsampa ng kasong estafa sa korte si Duterte laban sa ABS-CBN, handang gamitin ng Pangulo ang buong pwersa ng gobyerno upang makapaghiganti.
Iginiit ni De Lima na ang personal na issue ng punong ehekutibo ay nagiging public policy at maging siya ay isa sa mga biktima ng pang-anim na taong gulang na emotional quotient ng Pangulo.
By: Drew Nacino / Cely Bueno
Hindi pangungunahan ng PDP-Laban ang confirmation proceedings ni Environment Secretary Gina Lopez sa Commission on Appointments.
Ito ang inihayag ni PDP-Laban at Senate President Koko Pimentel makaraang igiit na walang ineendorso ang kanilang partido kapalit ni Lopez sakaling hindi ito makumpirma.
Ayon kay Pimentel, maaaring mayroon lamang regional council ang kanilang partido na nagsalita sa media kung saan inendorso ang isang Atty. Mark Tolentino pero hindi ito official stand ng PDP-Laban.
Tumanggi namang magsalita ng Senador hinggil sa tsansa ng kalihim na makalusot sa C.A. bagkus ay dapat hintayin na lamang anya ang desisyon ng komisyon, ngayong araw
By: Drew Nacino / Cely Bueno
Naghain na ng reklamong murder sa Department of Justice ang common-law wife ng pinatay na publisher ng pahayagang Catanduanes News now na si Larry Que.
Kabilang sa inireklamo ni Ginang Edralyn Pangilinan sina PO1 Vincent Tacorda, Catanduanes Governor Joseph Cua, Prince Lim Subion at ilan pang john does na umano’y nasa likod ng pagpatay sa kanyang mister sa Virac noong December 2016.
Ayon kay Pangilinan, umanin mismo si Tacorda sa isang local radio anchor sa Catanduanes na siya at ang dalawang iba pa ang nasa likod ng pagpatay sa kanyang mister.
Isa si Tacorda sa itinalagang security detail sa kanilang pamilya noon at nakonsensya ito nang makita ang mga naulilang anak ni Que kaya umamin ito sa nagawang krimen.
Naniniwala ang complainant na pulitika at ang nadiskubreng shabu laboratory sa Catanduanes ang posibleng rason sa pagpatay sa mamamahayag.
Kasama ni Pangilinan na nagtungo sa DOJ ang radioman na si Marlon Suplig na tumatayong testigo sa kanilang isinampang reklamo laban kina Cua, Tacorda at iba pa.
By: Drew Nacino / Bert Mozo
Pinakilos na ng Department of Justice ang National Bureau of Investigation upang silipin ang lahat ng alegasyon ng gambling operator na si Charlie “Atong” Ang laban kay Secretary Vitaliano Aguirre at iba pa.
Sa Department Order 267 na pirmado mismo ni Aguirre, binigyan nito ng kapangyarihan ang N.B.I. na alamin ang katotohanan sa likod ng mga paratang ni ang kabilang na ang umano’y death threat sa buhay nito.
Una nang inakusahan ni ang na nakatatanggap siya ng mga death threat mula kay Aguirre, National Security Adviser Hermogenes Esperon at ilan pang heneral ng militar.
Ito’y dahil sa patuloy na operasyon ng numbers game na virtual jai-alai ng Meridien Vista Gaming Corporation – kung saan consultant at general manager si Ang.
Inakusahan ng gambling operator ang kalihim at ang kapatid nitong si Ogie Aguirre na umano’y may control sa operasyon ng small town lottery mula Batangas hanggang Bicol.
Hiniling naman ni Aguirre sa B.I.R. na silipin ang posibilidad na may nagawang paglabag sa Internal Revenue Code of 1997 o Tax Evasion si Ang.
By: Drew Nacino / Bert Mozo
Nagsama-sama ang iba’t ibang ahensya ng gobyerno upang itama umano ang mga numero sa likod ng kampanya kontra iligal na droga ng Administrasyong Duterte.
Ito’y sa pamamagitan ng real numbers PH forum na isinagawa sa isang hotel sa Ortigas center kung saan present ang mga kinatawan mula sa P.N.P., P.D.E.A., D.O.H., P.C.O.O. at Office of the President.
Partikular na nais itama ng administrasyon ang umano’y 7000 bilang ng mga biktima ng sinasabing extra judicial killings na ginagamit umano ng ilan para linlangin ang media at ang publiko.
Ayon kay PDEA Director-General Isidro Lapeña, mayroon nang naitatalang 9432 homicide cases sa bansa simula ng pumasok ang Duterte Administration noong July 1 hanggang nitong March 31, 2017.
Gayunman, mula sa naturang bilang ay 1,847 lamang anya ang mga namatay na may kinalaman sa iligal na droga habang 1,894 ang non drug related at 5,691 ang iniimbestigahan pa ng mga otoridad.
Inihayag naman ng P.N.P. na nasa 2,692 drug suspect na ang napatay ng mga pulis sa mga anti drug operations, hanggang noong April 20 na karamiha’y nanlaban umano sa mga otoridad.
By: Drew Nacino / Jonathan Andal
Nababahala ang Malakanyang sa posibleng idulot ng intra-corporate dispute sa Manila North Harbor Port Incorporated.
Ayon kay Presidential Spokesman Ernesto Abella, dapat ng madaliin ang pagresolba sa mga hidwaan sa loob ng Manila North Harbor upang maiwasang maulit ang naranasang port congestion noong nakaraang administrasyon.
Giit ni Abella, kilala ang Pangulo sa pagnanais nito ng agarang resolusyon sa anumang usapin kasama na ang hidwaan sa nasabing pantalan.
Bukod sa hidwaan sa loob ng M.N.H.P.I., may nakabinbin ding kaso sa Ombudsman laban sa opisyal ng Securities and Exchange Commission official na umano’y pumayag sa iligal na pagbenta ng shares ng nasabing terminal operator.
Hinihintay pa ngayon ang desisyon ng Ombudsman bagama’t una ng pinagbawalan ng Quezon City Regional Trial Court noong Enero si 1-Pacman Party-list Rep. Michael Romero sa pag-angkin sa Harbour Centre Port Terminal na pag-aari ng kanilang pamilya.
By: Drew Nacino / Aileen Taliping