June 2026

Walang plano si PBA Party-list Representative Jericho Nograles na mag endorso ng impeachment complaint.

Binigyang diin ito ni Nograles makaraang mailagay ang kanyang pangalan bilang endorser ng impeachment complaint laban kay Vice President Leni Robredo.

“Kung meron hong impeachment complaint na su-suportahan ko, kalian kong mag inhibit bilang miyembro ng committee on justice. Medyo mahirap din yun eh, yung sitwasyon na yun. Desisyon ko na hindi lang yung impeachment ni Robredo, eh yung impeachment ni Duterte, maski na sino pa. Hindi pu-pwedeng na ako ang mag endorse nyan dahil trabaho ang making sa lahat ng panig at magbibigay ng desisyon”, ani Nograles.

Gayunman, tinanggap na ni Nograles ang paghingi ng paumanhin ni Atty. Bruce Rivera, isa sa mga naghain ng impeachment complaint laban kay Robredo.

Sinabi ni Nograles na tumibay ang kanyang posisyon na walang i-e-endorsong impeachment case matapos aminin  ni Rivera na resulta ng miscommunication ang pagkakasama ng kanyang pangalan sa reklamo.

“First time ko ngang nakita itong si Atty. Bruce at si Atty. Trixie eh, nagkakilala na ba tayo? Pati sila nagulat. Ako, nirerespeto ko yung kanilang complaint pero hindi ko matanggap na nilalagay nila yung pangalan ko na walang pahintulot”, pahayag ni PBA Party-list Representative Jericho Nograles sa panayam ng DWIZ.

By Len Aguirre

Tiniyak ng PMA o Philippine Military Academy na walang foul play sa pagkamatay ni Cadet 4th Class Erwin Christian Vergara.

Ayon kay Dr. Shiela Marie Jardiolin, isang doktor sa  PMA, walang nakitang anumang marka ng pagpapahirap o kaduda-dudang mga marka sa katawan ni Vergara nang ipasuri  ang labi nito kaharap ang kanyang mga magulang.

Nasawi anya si Vergara dahil sa hindi naagapang pagdurugo na sanhi ng kanyang ulcer.

Ipinaliwanag ni Jardiolin na posibleng nasa quiet stage ang ulcer ni Vergara nang sumailalim ito sa physical examination bago pumasok sa PMA kaya’t hindi nakita ng mga doktor.

Nasundo na ng kanyang mga magulang ang labi ni Vergara at iniuwi sa Alcala, Cagayan.

Sinagot na ng PMA ang lahat ng gastos sa ospital ni Vergara pati ang gastos sa pagpapalibing nito.

Maliban dito, makukuha rin ng pamilya ni Vergara ang iba pang benepisyo na laan para sa isang kadete ng PMA.

“Kapag may karamdaman ho ma-aabsent sila sa klase, eh may allowable na 20% absences lang so, kapag lumagpas sila ng 20% na absences matu-turn back ho sila. Ibig sabihin next year na ulit, yun ang nabanggit ni Vergara bago siya mamatay na ayaw niya raw ma-turn back”, pahayag ni Dr. Shiela Marie Jardiolin sa panayam ng DWIZ.

By Len Aguirre | Ratsada Balita (Interview)

Gagawing prayoridad ng NBI o National Bureau of Investigation ang pagsisiyasat sa alegasyon ni Charlie Atong Ang na hina-harass at pinagbabantaan sya ng mga ahente ng NBI.

Ayon kay NBI Director Dante Gierran, mahirap paniwalaan ang mga bintang ni Ang dahil ginagawa lamang ng NBI ang trabahong ini-atas sa kanila na buwagin ang illegal gambling sa lalawigan ng Isabela kabilang na ang jueteng at jai alai kung saan kilalang operator si Ang.

Sinabi ni Gierran na malabong masabing harassment ang ginawang raid ng NBI sa mga iligal na pasugalan tulad ng jueteng dahil armado sila ng search warrant.

Ang raid ng NBI sa Isabela ay nagresulta sa pagsasampa ng kaso laban sa mahigit apatnapu (40) katao dahil sa paglabag sa batas na nagbabawal sa sugal tulad ng jueteng.

PAKINGGAN:Pahayag ni NBI Director Dante Gierran sa panayam ng DWIZ

By Len Aguirre | Ratsada Balita (Interview)

Kinatuwa ng Malakanyang ang pinakahuling survey ng Social Weather Stations (SWS) kung saan sinasabing bumaba ang bilang ng mga nagugutom na Pinoy.

Ayon kay Presidential Spokesman Ernesto Abella, indikasyon ito na nakakarating na sa pinakamahihirap na pamilyang Pilipino ang mga programang pang mahihirap ng gobyerno.

Kabilang sa mga programang pinakikinabangan ng lubos ng ating mga kababayang mahihirap ngayon ang conditional cash transfer, pagtataas ng pensyon ng mga senior citizen, libreng gamot at iba pa.

Sa mga nagtatrabaho naman sa gobyerno, sinabi ni Abella na nadagdagan na ang combat duty pay ng mga sundalo, gratuity pay sa mga job order at contract workers at pagregular sa libu-libong mga kawani ng pamahalaan.

By Ralph Obina |With Report from Aileen Taliping