Lusot na sa committee level ng Mababang Kapulungan ng Kongreso ang substitute bill kaugnay sa isinusulong na comprehensive tax reform package ng administrasyon.
Layon nitong mapababa ang income tax rates na ipinapataw ng mga manggagawa upang malaki ang kanilang maiuwing salapi mula sa kanilang tinatanggap na suweldo.
Labing pitong (17) mambabatas na miyembro ng House Committee on Ways and Means ang bumoto pabor sa nasabing panukala, apat ang bumoto kontra habang tatlo naman ang nag-abstain.
Ayon kay ACT-Teachers Partylist Rep. Antonio Tinio, miyembro ng komite, bumoto siya kontra sa panukala dahil kabilang doon ang pagpapataw ng excise tax sa produktong petrolyo gayundin ang pagpapalawak sa saklaw ng VAT o Value Added Tax sa lahat ng produkto at serbisyo.
Kabilang din aniya sa mga nakasama sa nasabing panukala ang pagpapataw ng buwis sa mga matatamis na inumin tulad ng mga softdrinks at juice.
By Jaymark Dagala
Lalo pang lumaki ang tiyansa ng koponang Meralco Bolts na makapasok sa PBA Playoffs dahil sa twice to beat advantage.
Ito’y makaraang pataubin ng Bolts ang koponang Phoenix Fuel Masters sa iskor na 81-66 kung saan bumida si Base Amer na nakapagbulso ng dalawampung (20) puntos.
Dahil dito, nasa pitong (7) panalo at isang (1) talo na ang kartada ng Bolts habang tatlong (3) panalo at limang (5) talo naman ang sa Phoenix.
Samantala, taob ang koponang NLEX Road Warriors sa kamay ng Blackwater Elite sa iskor na 104-98.
Bumida sa nasabing laban si Greg Smith ng Blackwater nang makapagbulso siya ng dalawampu’t apat (24) na puntos gayundin si KG Canaleta habang dalawampu’t dalawang (22) puntos naman ang naibuslo ni Mike diGregorio.
Dahil dito, dalawang (2) panalo at anim (6) na talo na ang kartada ng Blackwater habang bokya naman sa kartada ang NLEX sa nakalipas na walong (8) laban nito.
By Jaymark Dagala
Photo Credit: PBA Media Bureau
Pormal nang binuksan ang bagong paliparan sa Palawan.
Pinangunahan nina Transportation Secretary Arthur Tugade at Civil Aviation Authority of the Philippines (CAAP) Director General Capt. Jim Sydiongco ang pagpapasinaya sa bagong Puerto Princesa International Airport kahapon.
Dumalo rin sa nasabing inagurasyon sina Korean Ambassador Kim Jae-Shin, Puerto Princesa City Mayor Luis Marcaida III at aviation stakeholders.
By Meann Tanbio
Patay ang mataas na opisyal ng gobyerno ng Somalia matapos na mapagkamalang Islamist militant.
Ayon kay Mayoral Spokesman Abdifatah Omar Halane, pinaputukan ng mga pulis ang sasakyan ni Public Works Minister Abbas Abdullahi Sheikh Siraji na isa ring mambabatas sa Mogadishu na sentro ng naturang bansa.
Tinukoy ng mga pulis na humarang ang sasakyan ng opisyal sa nagpapatrolyang security forces kaya inakalang miyembro ito ng militanteng grupo na nagbabalak na maglunsad ng pag-atake.
Madalas umanong naglulunsad ng pag-atake ang grupong Al Shabaab militants na may kaugnayan sa Al-Qaeda dahil sa pagnanais ng grupo na mapabagsak ang gobyerno at mapaalis ang African Union Peacekeeping Forces sa lugar.
By Rianne Briones
Handa ang China na makipagtulungan sa ASEAN o Association of Southeast Asian Nations para sa pagpapatupad ng declaration on the conduct of parties sa South China Sea.
Ayon kay Chinese Foreign Ministry Spokesman Geng Shuang, handa rin ang China na mapasailalim pa ang maritime practical cooperation kasunod ng bubuing code of conduct na nauna nang napagkasunduan.
Inaasahang matatapos na pagbalangkas sa code of conduct sa kalagitnaan ng taon.
Kinilala naman ni Geng ang naging mahalagang papel ng Pilipinas bilang ASEAN chairman at ang pagsisikap nito na mas mapalago pa ang rehiyon.
Dahil aniya sa naging pahayag ni Pangulong Rodrigo Duterte sa kanyang chairman’s statement at sa pagkakaisang posisyon ng iba pang bansa sa ASEAN ay lumamig ang tensyon sa mga pinag-aagawang teritoryo.
By Rianne Briones
Umani ng batikos ang ginawang pagbibiro ni Senador Tito Sotto sa confirmation hearing ni Social Welfare Secretary Judy Taguiwalo.
Nanguna pa ngang topic sa Pilipinas si Sotto sa social media platform na Twitter dahil sa pag-ungkat ng Senador sa pagiging single mom ni Taguiwalo.
Sa pagsalang ni Taguiwalo sa pagdinig ng Committee on Labor, Employment and Social Welfare ng Commission on Appointments, inungkat ni Sotto ang pagkakaroon ng dalawang anak ng kalihim subalit wala naman itong asawa.
PAKINGGAN: Bahagi ng mga pahayag nina Senator Tito Sotto at DSWD Secretary Judy Taguiwalo sa CA hearing
Nanawagan naman ang ilang grupo kabilang ang Gabriela na dapat na mag-public apology si Sotto dahil sa pambabastos nito sa kalihim.
Matapos na pupugin ng mga negatibong komento ay agad ding nag-sorry ang Senador sa kanyang naging pahayag.
PAKINGGAN: Bahagi ng pahayag ni Senator Tito Sotto
Confirmation hearing
Ipinagpaliban sa susunod na linggo ng makapangyarihang Commission on Appointments (CA) ang confirmation hearing para kay Social Welfare and Development Secretary Judy Taguiwalo.
Ito’y makaraang suspendehin ng Committee on Labor ng CA ang pagdinig kahapon dahil marami sa miyembro nito ang nagpahayag ng kanilang pagnanais na makapagtanong sa kalihim.
Kahapon, itinanggi ni Taguiwalo na miyembro siya ng NDF o National democratic Front subalit aminado siya na ang nasabing grupo ang nagsulong upang maitalaga siya ni Pangulong Rodrigo Duterte sa nasabing posisyon.
Bukod sa pagiging miyembro ng makakaliwang grupo, inusisa rin si Taguiwalo sa kanyang mga paninindigan hinggil sa usapin ng mahihirap, kapakanan ng mga bata at babae gayundin yaong mga nakararanas ng pang-aabuso.
By Rianne Briones / Jaymark Dagala
Hindi palalampasin ng pamahalaan ang panibagong pag-atake ng mga rebeldeng komunista sa La Panday Food Corporation sa Davao City gayundin sa bayan ng Maddela sa lalawigan ng Quirino kamakailan.
Ito ang dahilan ayon kay Government Peace Panel Chief at Labor Secretary Silvestre Bello III kaya’t maghahain sila ng kaso sa Norwegian government laban sa NDF o National Democratic Front na siyang kumakatawan sa Partido Komunista ng Pilipinas – Bagong Hukbong Bayan o CPP-NPA.
Paliwanag ni Bello, nagsisilbi kasing third party facilitator ang bansang Norway sa umuusad na usapang pangkapayapaan sa pagitan ng pamahalaan at ng mga rebeldeng komunista kaya’t doon nila ihahain ang reklamo.
Bagamat sinabi ni Bello na ipinag-utos na ni Pangulong Rodrigo Duterte ang imbestigasyon sa naturang mga insidente, wala naman itong pahiwatig hinggil sa kung ipagpapatuloy pa o hindi ang usapang pangkapayapaan.
By Jaymark Dagala
*OPAPP Photo
Umusad na ang impeachment process laban kay Pangulong Rodrigo Duterte sa Mababang Kapulungan ng Kongreso.
Ayon kay House Majority Floor Leader at Ilocos Norte Rep. Rodolfo Fariñas, nai-transmit na ni House Speaker Pantaleon Alvarez sa Rules Committee ang isinampang reklamo ni Magdalo Partylist Rep. Gary Alejano.
Sa ilalim ng impeachment rules, mayroong sampung (10) araw si Alvarez para maisama sa order of business ng Kamara ang nasabing reklamo para mai-refer sa House Committee on Justice.
Gayunman, aminado si Fariñas na magiging paspasan ang pagtalakay sa nasabing reklamo gayung labing dalawang (12) araw na lamang ang nalalabi para sa kanila bago mag-adjourn sine die ang ika-labing pitong Kongreso.
Kaugnay nito, kumpiyansa naman ang Malacañang na malabnaw at sa basurahan lamang didiretso ang impeachment complaint na inihain ni Magdalo Partylist Rep. Gary Alejano laban kay Pangulong Rodrigo Duterte.
Ayon kay Presidential Chief Legal Counsel Atty. Salvador Panelo, tila nakakalimutan ni Alejano na mayorya ng mga mambabatas sa Kamara ay pawang kaalyado ng Pangulo.
Maliban pa aniya ito sa milyun-milyong Pilipino na patuloy na sumusuporta at nakikiisa sa Pangulo lalo na sa paglaban sa droga, krimen at katiwalian sa pamahalaan.
Muling iginiit ni Panelo na propaganda lamang ang inihaing reklamo ni Alejano laban sa Pangulo upang makakuha ng simpatiya mula sa international community bunsod ng isinampa nilang kaso sa ICC o International Criminal Court.
By Jaymark Dagala
