Malabo nang makabalik pa sa puwesto si ERC o Energy Regulatory Commission Chairman Jose Vicente Salazar na una nang sinuspinde ng Malacañang.
Ito ang pagtitiyak ni Pangulong Rodrigo Duterte dahil malinaw na nasangkot si Salazar sa katiwalian na kabilang sa mga ikinakampaniyang sugpuin ng kaniyang administrasyon.
Una nang binigyan ng Office of the Executive Secretary si Salazar ng sampung (10) araw para magpaliwanag at sagutin ang mga akusasyong ibinibintang sa kaniya.
Nag-ugat ang mga kaso laban kay Salazar hinggil sa mga maanomalyang kontrata na pinasok ng ERC na siyang naging dahilan ng pagpapatiwakal ni dating Director Francisco “Jun” Villa Jr.
By Jaymark Dagala
Inaasahang darating na anumang oras mula ngayon sa Geneva, Switzerland ang labing anim (16) na miyembro ng delegasyon para dumalo sa isasagawang Universal Periodic Review ng United Nations Human Rights Council.
Pinangunahan nila Senador Alan Peter Cayetano at Deputy Executive Secretary Menardo Guevarra ang nasabing delegasyon upang idepensa ang war on drugs na inilunsad ng administrasyong Duterte.
Kabilang sa mga kasama sa delegasyon ang mga kinatawan mula sa Presidential Human Rights Committee, Deputy Speaker ng Kamara gayundin mula sa DFA o Department of Foreign Affairs, DOJ o Department of Justice, DOH o Department of Health, DILG o Department of Interior and Local Government at DSWD o Department of Social Welfare and Development.
Kasama rin nila Cayetano sa delegasyon ang mga kinatawan mula sa PNP o Philippine National Police, AFP o Armed Forces of the Philippines at PDEA o Philippine Drug Enforcement Agency para ilahad ang tunay na datos sa mga nasasawi bunsod ng kampanya ng gobyerno kontra droga.
Paliwanag ni Cayetano, maliban sa sampung (10) buwan ng administrasyong Duterte, kanila ring ilalahad ang mga datos sa kampaniya kontra droga ng nakalipas na administrasyong Aquino sa loob ng limang taon nito sa puwesto.
By Jaymark Dagala
Maaari namang pamunuan ni Pangulong Rodrigo Duterte ang DENR o Department of Environment and Natural Resources kapalit ni dating Secretary Gina Lopez.
Ito’y ayon kay Presidential Chief Legal Counsel Atty. Salvador Panelo sakaling walang makita ang Pangulo na maitatalaga kapalit ni Lopez matapos mabasura ang nominasyon nito sa Commission on Appointments o CA.
Ayon kay Panelo, bagama’t walang batas na nagbabawal sa Pangulo na gampanan ang trabaho ng isang kalihim ngunit mas mainam aniyang hindi na ito gawin ng Pangulo.
Una nang sinabi ni Lopez na kanyang inirerekomenda na si Pangulong Duterte na lamang ang pumalit sa kanya sa puwesto upang matiyak na maipagpapatuloy nito ang kanyang mga nasimulan.
Protests
Samantala, ikinakasa na ng mga environment conservation advocate ang kanilang kilos protesta bilang pagkondena sa pagbasura ng Commission on Appointments sa nominasyon ni dating DENR Secretary Gina Lopez.
Ayon kay Reuben Muni, Campaigner ng Greenpeace Philippines Climate and Energy, nagsasagawa na sila ng mga konsultasyon sa iba’t ibang grupo hinggil dito.
Dapat aniyang ipakita sa pamahalaan ang pagkadismaya ng taumbayan dahil sa anila’y walang awang pagbasura sa nominasyon ni Lopez bilang kalihim.
Si Lopez ang ikalawang miyembro ng gabinete ng Pangulong Duterte na hindi kinumpirma ng CA sunod kay dating Foreign Affairs Secretary Perfecto Yasay Jr.
By Jaymark Dagala
Pinaiimbestigahan na ni Justice Secretary Vitaliano Aguirre ang hindi pa pinapangalanang ahente ng National Bureau of Investigation o NBI na nagbigay ng impormasyon kay Charlie “Atong” Ang kaugnay sa plano umanong paglikida sa kanya gamit ang ilang NBI Personnel.
Ayon kay Aguirre, kilala na niya ang naturang NBI agent habang mayroon pa itong apat (4) na iba pang personnel na kanyang pina-iimbestigahan.
Sa oras anya na matapos ang imbestigasyon, gagawa siya ng ligal na hakbang upang papanagutin sa batas ang mga nasabing NBI agent.
Samantala, isiniwalat ng kalihim na mayroong pina-planong “ambush me” si Ang ngayong linggo kasabay ng ipatatawag na senate inquiry ni Senador Antonio Trillanes at ibunton ang pagsalakay.
Ibubunton umano ang naturang insidente kina Aguirre at National Security Adviser Hermogenes Esperon.
By Drew Nacino |With Report from Bert Mozo
Mas maraming mahalagang isyu at panukalang batas na dapat pagtuunan ng pansin tulad ng tax measure.
Ito ang binigyang diin ni Senate Majority Floor Leader Tito Sotto sa gitna ng patuloy na batikos na kanyang tinatanggap matapos ang naging biro nito sa pagiging solo parent ni Social Welfare Secretary Judy Taguiwalo.
Naniniwala si Sotto na mayroon lamang nanggagapang upang palakihin ang naturang issue.
Una ng humingi ng paumanhin ang senador sa mga nasaktan o nainsulto sa kanyang sinabi at ipinaliwanag na marami ng gumagamit sa terminong “naano lang” upang bigyan ng “comic description” ang sitwasyon ng mga may anak pero walang asawa.
By Drew Nacino |With Report from Cely Bueno
Nanghinayang si Pangulong Rodrigo Duterte sa kabiguang makalusot ni dating ni Environment Secretary Gina Lopez sa Commission on Appointments o CA.
Ayon kay Pangulong Duterte, umiral ang demokrasya subalit nanaig at gumana ang “lobby money” kaya hindi nakalusot sa makapangyarihang komisyon si Lopez.
Aminado si Pangulong Duterte na hanga siya sa marubdob na adbokasiya ni Lopez sa pangangalaga sa kalikasan subalit hindi niya kontrolado ang lahat sa gobyerno.
“Sayang si Gina (Lopez) I really like her passion but hindi ko talaga kontrolado. Gusto ko, may mga tao ako na gusto ko pero I share power, and that is the presence of checks and balancing. The President appoints but the appointee has to undergo the Commission on Appointments (CA) which is the combination of a committee from the lower house, the congressman, and the upper house, the senate”, bahagi ng talumpati ni Pangulong Rodrigo Duterte.
By Drew Nacino |With Report from Aileen Taliping
Itinalaga na ng Malakanyang si Commissioner Alfredo Non bilang Officer-in-Charge (OIC) ng Energy Regulatory Commission o ERC matapos suspendihin si ERC Chairman Jose Vicente Salazar ng siyamnapung (90) araw.
Ayon kay Executive Secretary Salvador Medialdea, itinalaga si Non makaraan ang rekomendasyon ng apat (4) na ERC Commissioners.
Si Salazar ay sinuspinde batay sa reklamong serious dishonesty at grave misconduct.
Una nang nagpulong ang apat (4) na commissioners ng ERC upang pagpasyahan kung sino ang tatayong OIC ng komisyon.
By Drew Nacino |With Report from Aileen Taliping
Malakas umano ang probable cause o ebidensya laban kay Energy Regulatory Commissioner Chairman Jose Vicente Salazar kaya’t posibleng matanggal din ito sa pwesto.
Ito ang inihayag ni Senate Energy Committee Chairman Sherwin Gatchalian makaraang sabihin nitong mas maiging tanggalin na lamang sa pwesto si Salazar sa halip na suspendihin.
Ayon kay Gatchalian, mahalaga ang agarang imbestigasyon sa sinasabing mga iregularidad o kasong administratibo laban kay Salazar upang magkaroon ng “stability” sa power sector.
Ngayon anyang suspendido na ang ERC Chairman ay malayang makapag-iimbestiga ang ehekutibo at madetermina upang maging mas maayos at mahusay na regulator ang ERC at maisulong ang interes ng publiko.
Iginiit ng senador na mayroong kapangyarihan ang Malakanyang upang magsuspinde ng mga opisyal nito bilang appointive authority sa ERC upang maprotektahan ang interes ng mga mamamayan.
Tatayong Officer-in-Charge pagpapasyahan ng 4 na commissioners ng ERC
Pagpapasyahan na ng apat (4) na commissioners ng Energy Regulatory Commission o ERC kung sino ang tatayong Officer-in-Charge (OIC) matapos suspendihin ng siyamnapung (90) araw ni Executive Secretary Salvador Medialdea si ERC Chairman Jose Vicente Salazar.
Ayon kay Presidential Spokesman Ernesto Abella, magpupulong ang apat (4) na commissioners sa lalong madaling panahon upang pagpasyahan kung sino ang pansamantalang hahalili kay Salazar.
Gayunman, karaniwan anyang ang pinaka-senior sa komisyon ang itinatalagang OIC.
Ang apat (4) na ERC Commissioners ay sina Atty. Gloria Victoria Taruc, Josefina Patricia Aspirit, Alfredo Non at Geronimo Santa Ana.
Si Salazar ay sinuspinde batay sa reklamong serious dishonesty at grave misconduct.
By Drew Nacino |With Report from Cely Bueno / Aileen Taliping
Welcome kay Philippine National Police o PNP Chief, Director General Ronald “Bato” Dela Rosa ang ipatatawag na senate investigation hinggil sa nadiskubreng secret jail sa Manila Police District (MPD) Station 1 sa Tondo, Maynila.
Ayon kay Dela Rosa, dadalo siya sa pagdinig sakaling imbitahan upang maiparating sa mga mambabatas ang mga problema sa kakulangan ng detention facility ng PNP para sa kanilang mga nahuhuli.
Magugunitang idinahilan ng hepe ng MPD Station 1 na ikinukong nila ang labing-isang (11) suspek sa isang sikretong selda sa likod ng isang cabinet dahil puno na umano ang kanilang orihinal na kulungan.
Anya, umaasa siyang sa tulong ng imbestigasyon ay makabubuo ng batas ang mga senador upang madagdagan ang mga kulungan ng piitan sa bansa.
By Drew Nacino |With Report from Jonathan Andal