Nananatiling stable ang inflation o ang pagtaas ng presyo ng mga produkto at serbisyo sa bansa.
Ito ay makaraang maitala sa 3.4 percent ang inflation para sa Abril.
Mas mababa ito sa inaasahang 3.5 percent na inlation forecast ng mga ekonomista dahil sa nagbabadyang pagtataas ng interest rates ng Bangko Sentral ng Pilipinas o BSP.
Matatandaang 3.4 percent din ang naitalang inflation noong Marso.
By Ralph Obina
Inaasahang magagamit na simula sa 2020 o kaya sa 2021, ang mga istasyon na kasama sa extension project ng LRT o Light Rail Transit Line 1 o yuong bumibiyahe mula Roosevelt Avenue hanggang Baclaran.
Sinabi ni Transportation Undersecretary for Rails Cesar Chavez na sinimulan na noong Martes, Mayo 2, ang paglilipat sa mga informal settlers na maapektuhan ng mga bagong istasyon mula sa Parañaque patungo sa General Trias, Cavite.
“500 million para bumili po ng 20 hectares, magtayo ng 2,000 housing units, maglagay ng utilities sa magiging relocation ng mahigit 1,000 informal settlers, ang una nating inilipat ay yung mga nasa Parañaque sapagkat yung Baclaran to Cavite, 5 out 8 stations ay nasa Parañaque.” Ani Chavez
Maliban sa LRT Line 1, inaasahang matatapos na rin ang extension projects sa LRT Line 2 at MRT 7, sa 2021.
Tinatayang aabot sa walong daang libong (800,000) pasahero, aniya, ang makikinabang sa LRT Line 1 kapag natapos na ang extension project.
“Ngayon yung Roosevelt hanggang Baclaran yung pasahero niyan araw-araw ay nasa 500,000 kapag operational na hanggang Bacoor magiging 800,000 na, imaginin mo na yung 300,000 idi-divide mo sabihin mo nang 20 bawat isang jeep, ganun kadami ang jeep na katumbas ng mga pasaherong yan.” Pahayag ni Chavez
PNR extension project
Tiniyak ni Transportation Undersecretary for Rails Cesar Chavez na makukumpleto bago matapos ang termino ng Pangulong Rodrigo Duterte, ang extension project ng PNR o Philippine National Railways sa bahagi ng tutuban patungo sa Bulacan.
Sinabi ni Chavez na naaprubahan na sa ilalim ng administrasyon ng dating Pangulong Noynoy Aquino ang 105 billion pesos loan agreement para rito at magsisimula na rin ang konstruksyon nito sa ikalawang quarter ng 2018.
Tinatayang aabot sa tatlong daang libong (300,000) pasahero mula sa Bulacan, ang makikinabang sa naturang extension project.
By Katrina Valle | Balitang Todong Lakas (Interview)
Nakaalerto ang militar at pulisya sa lalawigan ng Cagayan kasunod ng pagkakahuli sa isang mataas na lider ng NPA o New People’s Army sa Peñablanca, Cagayan.
Bunga ito ng pangamba na umatake ang NPA upang sagipin ang kanilang lider na kinilalang si David Soriano alias Jerome Antonio y Sabban, kalihim ng Northern Front, Komiteng Rehiyon Hilagang Silangang Luzon ng NPA.
Kasamang nadakip ni Soriano ang kanyang driver na nakilalang si Jude Malana Cipriano.
Naglagay na ng checkpoints ang Philippine National Police sa mga posibleng daanan ng mga rebelde sa mga bayan ng Sto. Niño at Amulung sa Cagayan.
Si Soriano ay number one sa target list ng awtoridad sa Region 2 dahil sa limampung (50) kaso ng panununog, pagpatay at iba pa.
Suspek din umano si Soriano sa pagpatay kay Mayor Carlito Pentocostes, Jr. noong 2015 at pag-ambush sa mga kagawad ng PNP sa Baggao Cagayan noong Pebrero ng nakaraang taon na ikinasawi ng anim (6) na pulis at ikinasugat ng sampung (10) iba pa.
By Len Aguirre
Nilinaw ng CHR o Commission on Human Rights na walang isinasagawang imbestigasyon sa bansa si UN Special Rapporteur Dr. Agnes Callamard.
Ayon kay Atty. Jackie de Guia, Spokesperson ng CHR, dumadalo lamang si Callamard sa isang seminar na pinangunahan ng Free Legal Assistance Group (FLAG).
Ipinaliwanag ni De Guia na hindi puwedeng magsagawa ng imbestigasyon si Callamard sa extrajudicial killings sa bansa kung walang pagsang-ayon ang gobyerno.
Matatandaan na naglatag ng mga kondisyon si Pangulong Rodrigo Duterte bago niya payagang makapag-imbestiga sa EJK ang UN Rapporteur.
“Nasa bansa po ngayon si Ginang Agnes Callamard pero ang primary purpose niya ay pag-attend ng isang seminal ng Free Legal Assistance Group, isa lang po siya sa mangilan-ngilang participant sa seminar na yan. Wala pong nangyaring initial talks (EJK investigation) para magkausap-usap ang lider ng komisyon at ang kanyang grupo, yung pagbisita niya ngayong panahon na ito ay hindi bilang Special Rapporteur na nagsasagawa ng investigation, kailangan talaga muna ng official invitation mula sa awtoridad.” Pahayag ni De Guia
United Nations Human Rights
Samantala, normal lamang ang pagsalang ng Pilipinas sa Universal Periodic Review ng United Nations o UN para ipaliwanag ang human rights record ng bansa.
Ayon kay Atty. Jackie de Guia, Spokesperson ng CHR o Commission on Human Rights, regular na isinagawa ito ng UN tuwing ika-apat na taon.
Sa katunayan, ang rerepasuhin anya sa UN ay ang report na isusumite ng delegasyon ng Pilipinas na pinangungunahan ni Senador Allan Peter Cayetano.
“Isinasagawa ito every four years, hindi lamang magre-report ang gobyerno tungkol sa extrajudicial killings kundi pangkalahatang sitwasyon ng karapatang pantao sa bansa. Tinitignan ng Human Rights Council ang ating assurance sa ating international treaty agreement sa karapatang pantao, kung isinagawa natin ang mga rekomendasyong inihain nila sa atin, at ating mga improvement.” Ani De Guia
Ayon kay De Guia, sa Oktubre ng taong ito ay nakatakda namang magsumite ng sarili nilang report ang CHR hinggil sa estado ng karapatang pantao sa Pilipinas.
Maliban sa CHR, magsusumite rin anya ng kani-kanilang shadow report ang mga non-government organizations na inaasahang gagawing basehan ng UN sa mga ilalabas nilang obserbasyon at rekomendasyon.
“Yung report namin ay base sa mga naging konsultasyon sa maraming mga grupo at ibang sektor, ang mga NGO ay magsuusmite ng sarili nilang shadow report na magiging basehan ng UN Human Rights Council sa paglalabas nila ng observation report. Binibigyan po tayo ng pagkakataon na magsumite at pakinggan ang ating ihahaing report. ” Dagdag ni De Guia
Matatandaang tumulak na papuntang Geneva, Switzerland ang 16-man delegation ng Pilipinas upang ilatag ang human rights record ng bansa sa UN.
By Len Aguirre | Ratsada Balita (Interview)
Dalawang buwan bago ang showdown sa pagitan nina Manny Pacquiao at Jeff Horn, mabentang-mabenta na ang tickets sa nabanggit na laban.
Ayon sa impormasyon mula sa Australia, agad na-sold out ang tickets sa boxes at suites tickets.
Ang Pacquiao-Horn fight ay gaganapin sa Suncorp Stadium sa July 2.
Una nang hinuhulaan ng mga promoter na ang laban ni Pacquiao sa Queensland, Australia ang magiging biggest crowd ngayong taon sa nasabing bansa.
By Meann Tanbio
Sa botong 419-1, inaprubahan ng US House of Representatives ang isang legislation na naglalayong higpitan ang sanction o parusa sa North Korea sa harap ng posibilidad ng paglulunsad nito ng panibagong nuclear program.
Ilan sa mga sanction na ikinukunsidera ng US ay ang pagharang sa mga shipping industry at company na nakikipag-transaksyon sa NoKor.
Kinakailangan pang maaprubahan sa Senado ang nabanggit na measure, bago ito ipadala sa White House para sa lagda ni US President Donald Trump.
By Meann Tanbio
Nakatakdang bisitahin ngayong araw ni Pangulong Rodrigo Duterte ang police headquarters sa ARMM o Autonomous Region in Muslim Mindanao sa bayan ng Parang sa Maguindanao.
Pangungunahan ni Pangulong Duterte ang closed-door meeting, kasama ang senior officers ng ARMM Police na isasagawa sa Camp SK Pendatun.
Kaugnay nito, nagpakalat na ang 6th Infantry Division ng Philippine Army at Police Regional Office-ARMM ng mga pulis at sundalo sa paligid ng Camp SK Pendatun bilang bahagi ng seguridad sa pagdating doon ng Pangulo.
By Meann Tanbio
Napatay ng mga pulis ang miyembro ng Abu Sayyaf, isang araw matapos itong maaresto sa Tubigon Bohol.
Ayon kay Chief Supt. Noli Taliño, hepe ng PNP Region 7, inagawan ng suspect na si Saad Samad Kiram alias Saad ang isa nilang pulis kayat napilitang barilin ito ng mga pulis.
Alas-2:00 ng madaling araw ng Biyernes nakatakda sana anya nilang ilipat sa BJMP District Jail si Saad subalit nagpaalam itong pupunta ng palikuran dahil sa sakit ng kanyang tiyan.
Gayunman, sa halip na sa comfort room magtungo ay tumakas na itong si Saad.
Halos dalawang oras ring tumagal ang habulan bago nasukol ng mga pulis si Saad at dito na naganap ang pang-aagaw niya ng baril.
Kaugnay nito, may hawak nang mahalagang impormasyon ang militar hinggil sa Abu Sayyaf sa Bohol.
Nakuha di umano ng Armed Forces of the Philippines o AFP ang mga impormasyon kay Saad Samad Kiram alias Abu Saad, ang miyembro ng Abu Sayyaf na naaresto ng Huwebes pero napatay ng Biyernes matapos na magtangkang tumakas.
Boluntaryo di umanong ikinumpisal ni Saad ang hinggil sa kanilang mga plano, ang komposisyon ng kanilang grupo at kung ano ang mga kaya nilang gawin.
Nakumpirma rin umano ng militar at pulisya kay Saad na watak-watak na ang grupo nilang nagtungo sa Bohol dahil sa sunod-sunod na operasyon ng awtoridad laban sa kanila.
Si Saad ang miyembro ng Abu Sayyaf na ire-rescue sana ni Supt. Maria Cristina Nobleza at lover nitong ASG member na si Renoor Lou Dongon subalit nahuli sila ng awtoridad.
Sa ngayon, dalawang (2) sugatang abu sayyaf member na lamang sa Bohol ang pinaghahanap ng awtoridad.
By Len Aguirre | with report from Jonathan Andal (Patrol 31)
