June 2026

Narekober ng mga otoridad sa isang raid sa bahagi ng Carlos Palanca sa Maynila, ang isang bag na naglalaman ng mga sangkap ng paggawa sa bomba.

Ito ay sa serye ng pagsalakay sa mga hinihinalang pinagtataguan ng mga suspek sa pagpapasabog sa bahagi ng Quiapo, noong nakaraang linggo kung saan labing apat (14) ang nasugatan.

Ayon kay Chief Insp. Rosalino Ibay, ang bag ay natagpuan sa isang bahay malapit sa Muslim center.

Kabilang sa laman ng bag ay ang isang piraso ng GI5, isang 454 gun powder, dalawang (2) pirasong shotgun empty shell, mga turnilyo, electric wire, bolts at speaker.

By Katrina Valle |With Report from Aya Yupangco

Paiimbestigahan sa senado ni Senador Grace Poe, ang problemang kinakaharap ng mga immigration officers.

Sinabi ito ng senadora, matapos masaksihan kahapon, ang mahabang pila sa immigration counters sa NAIA Terminal 2 at nang makausap ang ilang naka-duty sa immigration desk.

Maliban sa marami nang immigration officers na nagbitiw sa trabaho, sinabi ng mga nakapanayam ng senadora na mahaba ang pila sa counters dahil narin sa dami ng flights sa terminal.

By Katrina Valle |With Report from Raoul Esperas

Hindi kumbinsido si Genuine Minority Congressman Teddy Baguilat na isang daang porsyentong (100%) sinuportahan ng Pangulong Rodrigo Duterte si dating Environment Secretary Gina Lopez.

Ayon kay Baguilat, ito ay dahil hindi nila naramdaman sa Kamara ang sana ay pagmamalaki ng mga miyembro ng super majority sa pagsalang ni Lopez sa Commission on Appointments (CA).

Kung sinuportahan aniya si Lopez ng administrasyon, ay maaring mabilis itong nakapasa sa confirmation hearing, katulad ng nangyaring pamba–braso sa death penalty bill na kaagad naaprubahan.

Gina Lopez dapat na ipagpatuloy ang adbokasiya – De Lima

Hinimok ni Senador Leila De Lima si dating Environment Secretary Gina Lopez na ipagpatuloy ang kanyang adbokasiya, kahit na hindi pinaburan ng CA o Commission on Appointments ang kanyang pagkakatalaga bilang kalihim.

Sinabi ni De Lima na maaring nanalo ang mga mining company sa pag – impluwensya sa CA pero hindi dapat magpaapekto si Lopez sa pagkakabasura sa kanyang appointment.

Hindi rin aniya mananatiling “unrealistic” ang mga adhikain ni Lopez, kung kanyang itutuloy ang mga proyektong tutulong sa pagtitiyak sa pagkakaroon ng ligtas at malusog na kapaligiran.

By Katrina Valle |With Report from Jill Resontoc / Cely Ortega – Bueno

Walang nakikitang masama si United Natioins o UN Special Rapporteur Agnes Callamard sa pagmomonitor ng pamahalaan, sa kanyang pagdalaw sa bansa.

Sinabi ito ni Callamard, sa kanyang pagdalo sa dalawang (2) araw na Policy Forum na iniayos ng FLAG o Free Legal Assistance Group sa University of the Philippines (UP), hinggil sa usapin sa iligal na droga.

Magbibigay lang aniya siya ng maikling pahayag hinggil sa usapin, at hindi ito maituturing na official visit.

Sinabi ni Callamard na mahalaga ang conference at kanyang hinihikayat ang ibang grupo, kabilang ang pamahalaan na makiisa rito.

Una nang kinuwestyon ng Department of Foreign Affairs (DFA) ang motibo at sinseridad ni Callamard sa kanyang pagdalo sa naturang conference, na nataon nakatakdang UPR o Universal Periodic Review ng Pilipinas sa Geneva, Switzerland.

By Katrina Valle

Takot ang posibleng nananaig sa mga ikinulong sa secret jail kaya’t binawi nila ang nauna nilang testimonya na hinihingan sila ng pera ng mga pulis kapalit ng kanilang kalayaan.

Reaksyon ito ni Atty. Jackie De Guia, spokesperson ng CHR o Commission on Human Rights matapos sabihin na di umano’y umamin ang mga bilanggo kay Philippine National Police o PNP Chief Director General Ronald Dela Rosa na, nagsinungaling lamang sila sa CHR.

Ayon kay De Guia, sa ngayon ay nagpapatuloy ang kanilang ginagawang imbestigasyon sa natuklasang secret jail sa Tondo, Maynila.

Inatasan na rin anya ng pamunuan ng CHR ang kanilang regional offices na alamin kung may mga sikretong kulungan rin sa mga lalawigan sa kanilang taunang pagbisita sa mga bilangguan.

“Kaya naman po sinasabi sa batas RA 9745 na kinakailangan magbigay ng sufficient government protection ang otoridad at siguraduhin po ang transfer, from the custody of the police authority dahil hindi po malayong mangyari na habang nasa kustodiya sila ng mga taong inaakusahan nila ay nananaig ang takot kaya naman po malaki ang prababilidad na hindi po nila panindigan yung un apo nilang pahayag”, pahayg ni Atty. Jackie De Guia ang spokesperson ng CHR sa panayam ng DWIZ.

By Len Aguirre | Ratsada Balita Program (Interview)