June 2026

Normal lamang ang pagsalang ng Pilipinas sa universal periodic review ng United Nations o UN para ipaliwanag ang human rights record ng bansa.

Ayon kay Atty. Jackie De Guia, spokesperson ng CHR o Commission on Human Rights, regular na isinagawa ito ng UN tuwing ika-4 na taon.

Sa katunayan, ang rerepasuhin anya sa UN ay ang report na isusumite ng delegasyon ng Pilipinas na pinangungunahan ni Senador Allan Peter Cayetano.

PAKINGGAN: Pahayag ni Atty. Jackie De Guia, spokesperson ng CHR o Commission on Human Rights

Ayon kay De Guia, sa Oktubre ng taong ito ay nakatakda namang magsumite ng sarili nilang report ang CHR hinggil sa estado ng karapatang pantao sa Pilipinas.

Maliban sa CHR, magsusumite rin anya ng kani kanilang shadow report ang mga non-government organizations na inaasahang gagawing basehan ng u-n sa mga ilalabas nilang obserbasyon at rekomendasyon.

PAKINGGAN: Bahagi ng pahayag ni Atty. Jackie De Guia, spokesperson ng CHR o Commission on Human Rights sa panayam ng DWIZ

‘War on Drugs’ hindi epektibo para malinis sa illegal drugs ang isang bansa – UN Special Rapporteur

Nagkakaisa ang maraming world leaders na hindi epektibo ang giyera kontra droga para malinis sa illegal drugs ang isang bansa.

Ayon kay UN Special Rapporteur Agnes Callamard, nakapaloob ito sa joint commitment na nabuo sa isang special session na dinaluhan ng world leaders sa United Nations Headquarters noong Abril ng nakaraang taon.

Nagkakaisa anya ang world leaders na kalimitang hindi ang illegal drugs ang dahilan ng mga trahedya, krimen at disgrasya sa isang bansa kundi dahil sa negatibong epekto na bunga ng pangit at masamang mga panuntunan ng isang pamahalaan para labanan ang illegal drugs.

Napatunayan anya nila na lalong lumalala ang problema ng isang bansang talamak ang illegal drugs kapag mali ang ginawang sistema ng pagsupil dito, tulad ng extra judicial killings, torture, illegal detention at iba pa.

Sinabi ni Callamard na maraming mas epektibong paraan para masupil ang illegal drugs.

Hinikayat ni Callamard ang pamahalaan na balikan ang mga dokumento ng special session ng world leaders upang makakuha ng puntos kung paano ang tamang pagharap sa problema ng illegal drugs.

PAKINGGAN: Si UN Special Rapporteur Agnes Callamard sa pagdalo nya sa isang policy forum on illegal drug problem na pinangunahan ng Free Legal Assistance Group

By Len Aguirre

Nalantad na pinakiusapan ni US President Donald Trump si Pangulong Rodrigo Duterte para mamagitan sa kanila ng China hinggil sa problema  sa North Korea.

Ayon kay Pangulong Rodrigo Duterte, alam ng Estados Unidos na tanging ang China ang may kakayahang mamagitan sa pagpapakawala ng missile ng North Korea.

Sinabi ng Pangulo na ipina-abot naman nya kay Chinese President Xi Jinping ang mensahe ni Trump at ang posisyon ng Association of Southeast Asian Nation (ASEAN) na kung maaari ay mamagitan ang China upang mapahupa ang tensyon sa Korean Peninsula.

Nakahanda umano ang Pangulo na isapubliko ang naging pag-uusap nila sa telepono ni Trump at ni Xi Jinping dahil recorded naman anya ang lahat at alam ito ng White House.

By Len Aguirre

Pina-iimbistigahan na ni Philippine National Police o PNP Chief Director General Ronald Dela Rosa ang pagkamatay ng isang miyembro ng Abu Sayyaf sa Bohol, isang araw matapos syang maaresto.

Ayon kay Chief Supt. Noel Talinio, hepe ng PNP Region 7, inatasan na nya ang provincial office ng PNP sa Bohol na pangunahan ang imbestigasyon lalo na sa mga pulis na kasama ni Saad Samad Kiram nang ito ay mapatay.

Ipinaliwanag ni Talinio na walang kulungan sa provincial office ng PNP kaya’t dadalhin sana nila sa District Jail si Saad matapos itong sumalang sa imbestigasyon na nagtapos dakong 2:00 na ng madaling araw.

Napatay na miyembro ng Abu Sayyaf nang agaw umano ng baril

Napatay ng mga pulis ang miyembro ng Abu Sayyaf, isang araw matapos itong maaresto sa Tubigon Bohol.

Ayon kay Chief Supt. Noli Talinio, hepe ng PNP Region 7, inagawan ng suspect na si Saad Samad Kiram alias Saad ang isa nilang pulis kaya’t napilitang barilin ito ng mga pulis.

2:00 ng madaling araw ng Biyernes nakatakda sana anya nilang ilipat sa BJMP District Jail si Saad subalit nagpa-alam itong pupunta ng palikuran dahil sa sakit ng kanyang tiyan.

Gayunman, sa halip na sa comfort room magtungo ay tumakas na itong si Saad.

Halos dalawang (2) oras ring tumagal ang habulan bago nasukol ng mga pulis si Saad at dito na naganap ang pang-aagaw nya ng baril.

Militar may hawak nang mahalagang impormasyon hinggil sa Abu Sayyaf sa Bohol

May hawak nang mahalagang impormasyon ang militar hinggil sa Abu Sayyaf sa Bohol.

Nakuha di umano ng Armed Forces of the Philippines o AFP ang mga impormasyon kay Saad Samad Kiram alias Abu Saad, ang miyembro ng Abu Sayyaf na naaresto ng Huwebes pero napatay ng Biyernes matapos na magtangkang tumakas.

Boluntaryo di umanong ikinumpisal ni Saad ang hinggil sa kanilang mga plano, ang komposisyon ng kanilang grupo at kung ano ang mga kaya nilang gawin.

Nakumpirma rin umano ng militar at pulisya kay Saad na watak-watak na ang grupo nilang nagtungo sa Bohol dahil sa sunod-sunod na operasyon ng otoridad laban sa kanila.

Si Saad ang miyembro ng Abu Sayyaf na ire-rescue sana ni Supt. Maria Cristina Nobleza at lover nitong ASG member na si Renoor Lou Dongon subalit nahuli sila ng otoridad.

Sa ngayon, dalawang (2) sugatang Abu Sayyaf member na lamang sa Bohol ang pinaghahanap ng otoridad.

By Len Aguirre |With Report from Jonathan Andal

Itutuloy na ng VACC o Volunteers Against Crime and Corruption ang pagsasampa ng impeachment complaint laban kay Ombudsman Conchita Carpio – Morales.

Sinabi ni Atty. Ferdinand Topacio, tumatayong counsel ng grupo, kanilang isasampa ang reklamo sa Lunes, Mayo 8, 10:00 ng umaga.

Bagamat hindi idinitalye ang gagamiting grounds for impeachment, una nang sinabi ni Topacio na kanilang irereklamo si Morales dahil sa pagiging biased nito sa paghawak ng mga usapin katulad ng DAP o Disbursement Acceleration Program.

By Katrina Valle |With Report from Jill Resontoc