Nakalabas na ng Davao city ang mga miyembro ng Abu Sayyaf Group (ASG) na namonitor sa lungsod.
Ayon kay AFP o Armed Forces of the Philippines Chief of Staff General Eduardo Año, ang naturang mga miyembro ng Abu Sayyaf ay nagmamatyag umano sa rehiyon para sa mga susunod nilang bibiktimahin.
Gayunman, tiniyak ni Año na kanila pang pinalakas ang intelligence at security planning upang masigurong mapigilan ang ASG na makapag-operate sa Davao region.
Una nang sinabi ng AFP na malaking kawalan para sa Abu Sayyaf ang pagkakapatay sa kanilang sub leader na si Abu Rami.
By Ralph Obina
Ibinunyag ni Vice ganda Na makakasama niya sa isang bagong pelikula ng Star Cinema Movie si Miss Universe 2015 Pia Wurtzbach.
Ayon sa TV host, hindi siya nagdalawang-isip na umoo nang alukin siya ng producer para sa nabanggit na movie kung saan kabilang daw sa cast ang Miss Universe title-holder.
Sinasabing nakausap na raw nina Star Cinema Head Malou Santos at Director Olivia Lamasan si Wurtzbach hinggil sa naturang proyekto.
By Jelbert Perdez
Photo: Screengrab from piawurtzbach/ Instagram
Makabubuting laging nakikinig at bukas ang gobyerno sa lahat ng anumang kritisismo upang makatulong sa pagpapahusay ng mga umiiral na patakaran ng mga otoridad.
Ito ang inihayag ni Senador Chiz Escudero matapos ang batikos ni United Nations Special Rapporteur on Extra-Judicial, Summary at Arbitrary Executions Agnes Callamard sa isang forum sa UP o University of the Philippines na walang epekto ang anti-illegal drugs campaign ng gobyerno.
Ayon kay Escudero, walang gobyernong makakayang “isolated” kaya’t dapat itong maging bukas hindi lamang sa mga papuri kundi sa mga batikos at kritisismo.
Sa panig naman ni Senate Majority Floor Leader Tito Sotto, inihayag nito na baliwalain na lamang ng gobyerno ang puna ni Callamard.
Ang anuman anyang paraan ng paglaban sa iligal na droga ay laging nakabubuti sa bansa.
Sen. Escudero may paalala kay UN Special Rapporteur Agnes Callamard
Dapat ay higit na naka-aalam sa kahalagahan at pangangailangan ng due process si Dr. Agnes Callamard bilang United Nations (UN) Special Rapporteur dahil ito’y basic at inherent right ng tao at pamahalaan.
Ito ang ipinaalala ni Senador Chiz Escudero kay Callamard sa gitna nang bigla nitong pagdating sa bansa at hindi pakikipag-ugnayan sa pamahalaan bago bumisita.
Ayon kay Escudero, maaaring buo na ang isip ng UN Rapporteur hinggil sa mga napapabalita laban kay Pangulong Rodrigo Duterte na umano’y mga kaso ng paglabag sa karapatang pantao.
Umaasa naman ang senador na bibigyan ni Callamard ng due process ang Pangulo.
Hindi anya dapat kalimutan ng UN Rapporteur na anumang negatibong findings na kanilang ilalabas ay maka-aapekto sa buong bansa at sambayanang Pilipino.
By Drew Nacino |With Report from Cely Bueno
Inabsuwelto sa kasong panggagahasa ng Korte Suprema ang isang akusado dahil sa kawalan ng sapat na katibayan.
Sa desisyon ng 2nd Division ng Supreme Court (SC), pinagbigyan nito ang apela ni Juan Richard Tionloc at pinawalang bisa ang pasya ng Manila RTC Branch 37 at ng Court of Appeals o CA na nagpapataw ng guilty sa kasong rape.
Iniutos naman ng SC sa Bureau of Corrections (BuCor) ang agarang pagpapalaya kay Tionloc maliban na lamang kung may sentensya pa itong dapat bunuin kaya’t hindi ito mapalaya.
Binigyan ng limang (5) araw ang BuCor upang i-report ang aksyong ginawa nila sa kautusan ng high court.
September 29, 2008 nang maganap ang panghahalay ni Tionloc sa biktima matapos ang kanilang inuman sa bahay ng akusado.
Gayunman, inihayag ng SC na nabigo ang prosekusyon na maglabas ng matibay na ebidensya na magpapatunay na pinagsamantalahan ang biktima ni Tionloc.
By Drew Nacino |With Report from Bert Mozo
Ipinalilipat na ng Department of Justice o DOJ sa ibang unit ng National Bureau of Investigation (NBI) ang isang ahente nito na nag-timbre umano kay Charlie “Atong” Ang ng sinasabing tangkang pagpapapatay dito nina Secretary Vitaliano Aguirre at National Security Adviser Hermogenes Esperon.
Ayon kay Aguirre, layunin nito na maiwasang maimpluwensyahan ng mga NBI agent na sinasabing protektor ng gambling tycoon ang kalalabasan ng imbestigasyon.
Mayroon pa anyang apat o higit pang NBI Agents ang posibleng may koneksyon kay Ang.
Dagdag pa ng kalihim, mayroon ng isinasagawang case-buildup laban kay Ang bukod pa ang gagawing imbestigasyon ng Bureau of Internal Revenue o BIR sa mga posibleng tax evasion case ng kumpanyang Meridien Vista Gaming Corporation ng negosyante.
Hirit ni Trillanes na paimbestigahan sa senado ang mga paratang ni Atong Ang welcome kay Aguirre
Welcome para kay Justice Secretary Vitaliano Aguirre ang hirit ni Senador Antonio Trillanes na paimbestigahan sa senado ang mga paratang ng big time gambling operator na si Charlie “Atong” Ang.
Ayon kay Aguirre, walang problema sa kanya kung imbestigahan sa senado ang akusasyon ni Ang dahil nauna naman niyang ipag-utos sa National Bureau of Investigation na siyasatin ang mga paratang ng negosyante.
Pinayuhan pa ng kalihim si Ang na kung duda ito sa integridad ng NBI dahil attached agency ito ng DOJ, maari naman siyang dumulog sa ahensya ng pulisya gaya ng PNP-CIDG at magdala ng testigo o ebidensya upang patotohanan ang kanyang bintang.
Nauna nang inakusahan ni Ang sina Aguirre at National Security Adviser Hermogenes Esperon na nais umano siyang ipapatay para ma-control ang operasyon ng Small-Town Lottery o STL sa ilang lalawigan na itinanggi naman ng kalihim.
By Drew Nacino |With Report from Bert Mozo
Hinamon ng Philippine National Police o PNP si United Nations Special Rapporteur on Extrajudicial, Summary, or Arbitrary Executions Agnes Callamard na magbigay ng suhestyon kung paano tutugunan ang problema sa iligal na droga ng Pilipinas.
Ito’y matapos ihayag ni Callamard sa isang forum sa University of the Philippines (UP) na hindi epektibo ang war on drugs gaya ng ipinatutupad ng administrasyong Duterte.
Ayon kay PNP Spokesman, Chief Supt. Dionardo Carlos, ginagawa na ng PNP ang lahat ng paraan upang maabot at mabigyan ng pagkakataong magbago ang nasa apat (4) na milyong drug user at pusher sa pamamagitan ng Oplan Tokhang at rehabilitasyon.
Gayunman, kung may mas maganda anyang rekomendasyon si Callamard upang resolbahin ang problema sa droga ay handang makinig ang PNP sa kanya.
Hinikayat din ni Carlos si Callamard na silipin ang Inter-Agency Committee on Anti-Illegal Drugs at National Anti-Drug Plan of Action ng Pilipinas para makita nito ang polisiya at direksyon ng gobyerno sa paglaban sa droga sa bansa.
By Drew Nacino |With Report from Jonathan Andal
Sinimulan na ng mga Katolikong Layko at Civil Society Group ang kanilang martsa mula Mindanao patungong Maynila upang himukin ang mga senador na bumoto laban sa death penalty bill.
Huwebes nang lumarga ang “Lakbay Buhay Laban Sa Death Penalty” Caravan sa Cagayan de Oro City na layuning makarating ng senate building sa Pasay City, sa Mayo 24.
Labing-apat (14) na lungsod ang daraanan ng caravan at magiging highlight nito ang pagtitipon sa Rizal Park, Maynila sa Mayo 19 na inaasahang dadaluhan ng nasa tatlumpung libong (30,000) anti-death penalty advocates kabilang ang mga estudyante mula sa mga catholic school.
Ayon kay Fr. Edwin Gariguez, National Secretariat for Social Action ng Catholic Bishops Conference of the Philippines (CBCP), nais nilang iparating sa mga mambabatas na hindi lamang mga Katolikong Layko maging ang mga Civil Society Group ang tutol sa pagbabalik ng parusang kamatayan.
Nakadidismaya anya ang mabilis na pag-usad ng nabanggit na panukalang batas sa Kamara dahil lamang sa pamba-braso ng liderato ng mataas na kapulungan ng kongreso.
By Drew Nacino
Umabot na sa dalawampu’t tatlong (23) miyembro ng Abu Sayyaf ang sumuko sa militar sa Basilan at Sulu nitong nagdaang linggo.
Ayon kay AFP-Western Mindanao Command Spokesperson, Capt. Joan Petinglay, sumuko ang mga bandido matapos ang mga operasyon ng militar.
Noong Huwebes anya sumuko sina ASG Sub-Leaders Nur Hassan Lahaman alyas Hassan at mudz-Ar Angkun alyas Mapad Ladjaman kasama ang labintatlong (13) iba pang mga tagasunod nito sa Barangay Tumahubong, Sumisip, Basilan.
Isinuko rin ng mga ASG member ang kanilang matataas na kalibre ng armas at mga pampasabog.
Samantala, apat (4) pang bandido ang sumuko rin sa Sulu noong nakaraang linggo na mga tagasunod umano ni Abu Sayyaf Sub Leader Hairulla Asbang.
CHR-Visayas kinuwestyon ang pagkakapatay ng mga pulis sa Abu Sayyaf member sa Bohol
Kinuwestyon ng Commission on Human Rights-Central Visayas ang misteryoso umanong pagkakapatay ng mga pulis sa Abu Sayyaf member na si Saad Samad Kiram alyas Abu Saad sa Bohol.
Ayon kay CHR-7 Director Arvin Odron, nakapagtataka ang pahayag ng mga pulis kaya’t dapat imbestigahan ang naturang insidente.
Magugunitang naaresto si Kiram sa Barangay Tan-Awan, sa bayan ng Tubigon noong Huwebes subalit tatlong (3) oras matapos dalhin sa kustodiya ng pulisya ay tinangka umano ng bandido na tumakas kaya’t pinagbabaril ng mga otoridad.
Hindi anya dapat pinagbigyan ng mga pulis ang ASG member na makatakas kung totoong tinangka nito.
Samantala, nagsimula ng mangalap ng mga impormasyon ang CHR hinggil sa pagkamatay ni Kiram.
By Drew Nacino |With Report from Jonathan Andal
Itinakda na sa mayo 24 ng Vatican, ang pagkikita nina Pope Francis at US President Donald Trump.
Gagawin ang pulong sa Apostolic Palace, ang official residence ng Santo Papa.
Una nang nagkainitan ang dalawang lider, matapos tawagin ng Santo Papa na “hindi maka – krsitiyano” ang planong pagtatayo ni Trump ng border wall sa Mexico.
Pagkatapos ng pakikipag pulong sa Santo Papa ay sunod namang pupunta sa Brussels, Belgium si Trump para sa Nato Summit.
By Katrina Valle