Nangangamba ang Pangulong Rodrigo Duterte na hindi magkaroon ng magandang resulta ang peace talks sa Moro Islamic Liberation Front o MILF at Moro National Liberation Front o MNLF.
Ayon sa Pangulo, kung dati ay positibo siyang magiging matagumpay ang usapang kapayapaan sa pagitan ng pamahalaan at MNLF at MILF, ngayon aniya ay may pag-aalinlangan na sa kanyang panig lalo’t patuloy aniya sa pag-aagawan ng kampo ang naturang mga rebeldeng grupo.
Sa kabila nito, pinaalalahanan ng Pangulo ang mga pulis na may kapayapaan man o wala ay ipagpatuloy lamang ang kanilang mga tungkulin.
Tiniyak naman ng Pangulo na pamahalaan ang bahala sa pamilya ng mga alagad ng batas na malalagay sa alanganin ang buhay sa pagbibigay proteksyon sa mamamayan.
By Ralph Obina
Hindi nababahala ang Malacañang sa plano ng ilang mambabatas sa Estados Unidos na limitahan ang pagbebenta ng armas ng Amerika sa Pilipinas.
Ayon kay Presidential Legal Counsel Salvador Panelo, hindi naman nangangailangan ng karagdagang armas ang Department of National Defense (DND) at Philippine National Police o PNP.
Ipinagmalaki pa ni Panelo na may mga bansang magdo-donate sana ng armas sa Pilipinas ngunit tinanggihan ng DND sa katwirang sapat pa ang kanilang mga kagamitan.
Una na ring sinabi ng Pangulong Rodrigo Duterte na walang dapat ikabahala lalo’t may alok naman ang China at Russia na magsuplay ng armas sa Pilipinas.
Matatandaang naghain ng panukala sina US Senators Benjamin Cardin at Marco Rubio na limitahan ang pagbebenta ng armas sa Pilipinas dahil sa nagagamit umano ang mga armas na ito sa extrajudicial killings ng war on drugs ng pamahalaan.
By Ralph Obina
Ang pagtangkilik sa cosmetic surgery sa Pilipinas: Mga positibong epekto nito at ang posibleng panganib din na dala nito sa buhay ng isang tao.
Listen To SIYASAT Part 1
Listen To SIYASAT Part 2
Gumamit ng matinding depensa ang Phoenix laban sa Globalport kaya’t nasungkit nila ang 84-72 victory.
Dahil dito, nananatili silang nakakapit sa ika-walong puwesto sa PBA Commissioner’s Cup makaraan ang laro nila sa Araneta Coliseum.
Matapos malamangan ng ilang puntos sa opening quarter ay nakabawi ang Phoenix sa Globalport sa pangunguna ni Jameel McKay na kumamada ng 22 points at 20 rebounds.
By Jelbert Perdez
Photo Credit: PBA Media Bureau
Nabastusan ang Malacañang sa walang abisong pagpunta sa bansa ni UN Special Rapporteur Agnes Callamard.
Ayon kay Presidential Spokesperson Ernesto Abella, binalewala ni Callamard ang protocol at ang naunang imbitasyon ng Malacañang.
Patunay lamang aniya ito na hindi interesado ang UN Special Rapporteur na magkaroon ng patas at kumprehensibong assessment at itinaon pa ang pagbisita sa bansa sa Universal Periodic Review ng United Nations Human Rights Council.
Matatandaang Setyembre ng nakaraang taon nang magpadala ang gobyerno ng imbitasyon kay Callamard para kausapin ang mga kinauukulang opisyal ng pamahalaan upang malaman ang problema ng iligal na droga sa bansa na hindi naman tinaggap ng UN Special Rapporteur.
Mariin namang itinanggi ni UN Special Rapporteur Agnes Callamard ang pahayag ng Malacañang na hindi ito nagpa-abiso sa pagbisita sa Pilipinas.
Iginiit ni Callamard, April 28 pa nang ipaalam niya sa gobyerno ng Pilipinas ang kanyang pagbisita at nilinaw din nitong hindi ito isang official visit.
Maliban dito, April 29 aniya ng i-acknowlegde ng pamahalaan ng Pilipinas na kanilang natanggap ang liham ni Callamard na nasundan pa ng palitan ng mensahe sa pamamagitan ng telepono, sulat at email.
Security
Samantala, hindi nababahala si UN Special Rapporteur Agnes Callamard para sa kanyang kaligtasan sa pagbisita nito sa bansa.
Ito ay kahit pa kilala siyang kritiko ng Duterte administration.
Ayon kay Callamard, hindi siya maaaring pigilan sa kanyang mga gawain dahil lamang sa mga banta.
Simula nang dumating sa bansa, inulan si Callamard ng batikos, banta at mura sa social media.
Una nang sinabi ng UN Special Rapporteur na bukas siyang imonitor ng pamahalaan ang kanyang mga aktibidad sa buong pananatili nito sa bansa para patunayang hindi siya magsasagawa ng imbestigasyon ukol sa extrajudicial killings.
By Ralph Obina
Dalawampu’t walo (28) katao na ang tinamaan ng isang misteryosong sakit sa Sinoe, Liberia.
Ayon kay Chief Medical Officer Francis Kateh, nakapagtala sila ng dagdag na pitong (7) kaso kaya’t umabot na ito sa nasabing bilang habang labing tatlo (13) naman ang nasawi.
Sinasabing hindi pa matukoy ng mga eksperto kung ebola o lassa fever ang naturang sakit.
Karamihan umano sa mga biktima ay nakaranas ng matinding pananakit ng tiyan bago namatay.
Matatandaang pumalo sa halos limang libo (5,000) katao ang nasawi sa Liberia noong 2014 dahil sa tumamang ebola outbreak sa mga bansa sa West Africa.
By Jelbert Perdez
Bumaba ang bilang ng mga Pilipinong sumusuporta sa pagpapanumbalik ng parusang bitay.
Batay sa pinakahuling survey ng Pulse Asia, pumalo sa 67 percent ang nagpahayag ng suporta sa death penalty na mas mababa ng labing apat (14) na porsyento kumpara sa 81 percent noong nakaraang taon.
Dalawampu’t limang (25) porsyento naman ng respondents ang tutol sa death penalty samantalang wala namang posisyon ang walong (8) porsyento ng mga Pinoy.
Isinagawa ang naturang survey mula March 15 hanggang 20 sa may isanlibo dalawandaang (1,200) respondents.
Death penalty bill
Samantala, kumpiyansa ang Malacañang na tuluyang makalulusot sa dalawang (2) kapulungan ng Kongreso ang panukalang ibaling ang parusang bitay.
Ayon kay Presidential spokesperson Ernesto Abella, susi ang death penalty upang makamit ng Pilipinas ang pagiging drug free na bansa.
Binigyang diin ng Palasyo na ang pagbabalik ng parusang kamatayan ang pinakamahalagang elemento para magkaroon ng matatag na gobyernong mangangalaga sa mga mamamayan lalo na sa mga kabataan laban sa kriminalidad at iligal na droga.
Sa kasalukuyan, lusot na sa kamara ang death penalty bill pero nakabinbin pa ito sa Senado.
By Ralph Obina
Photo: Amnesty International
Tiniyak ng Malacañang na walang kakampihan ang Pilipinas sa pagitan ng Amerika at North Korea kaugnay ng tumitinding tensyon sa Korean Peninsula.
Ayon kay Presidential Spokesperson Ernesto Abella, mananatiling neutral ang Pilipinas lalo’t nagdeklara ang Pilipinas ng independent foreign policy na siya ring ipinatutupad sa NoKor.
Ito ay sa kabila ng pagiging tulay ng Pangulong Rodrigo para mamagitan ang China sa sigalot ng naturang dalawang bansa matapos na tawagan ang Punong Ehekutibo ni US President Donald Trump.
China-US-PH
Kinumpirma ng China na tumawag si President Xi Jinping kay US President Donald Trump para pag-usapan ang tumataas na tensyon sa pagitan ng Amerika at North Korea.
Ayon kay Chinese Foreign Ministry Spokesman Geng Shuang, batay aniya ito sa kahilingan ni Pangulong Rodrigo Dutrerte sa Pangulo ng China.
Matatandaang tinawagan ni Trump si Pangulong Duterte matapos ang ASEAN Summit para hilingin na kausapin ng Punong Ehekutibo ang China na mamagitan sa iringan ng Amerika at NoKor.
Tumamis ang relasyon ng Pilipinas at China sa kabila ng pinag-aagawang mga teritoryo nang makipagmabutihan dito ang Pangulong Duterte.
By Ralph Obina
Photo: PPD
Nanawagan ngayon ang Commission on Human Rights o CHR kay PNP o Philippine National Police Chief Ronald ‘Bato’ dela Rosa na ilabas ang audit ng mga kulungan sa bansa.
Ito ay makaraang sabihin ni Dela Rosa na wala nang sikretong kulungan sa bansa maliban sa napaulat na secret cell sa Manila Police District Station One.
Ayon kay CHR Chair Chito Gascon, dapat ipakita ng PNP Chief ang mga nakalap na impormasyon ng field offices ng Pambansang Pulisya.
Iginiit ni Gascon na dapat payagan ang CHR at iba pang mga interesadong non-government organization na magkapagsagawa ng independent audit.
Matatandaang nag-ugat ito sa sikretong kulungang natuklasan ng CHR sa station one ng MPD kung saan nakakulong ang labing isa (11) katao.
By Ralph Obina
*Palace Photo