June 2026

Sumalakay ang mga hinihinalang miyembro ng New People’s Army o NPA sa isang security agency sa Valencia City, Bukidnon.

Ayon sa ulat, nasa tatlumpung (30) rebelde ang pumasok sa tanggapan ng Dasia Security Agency kung saan sinamsam ng mga ito ang mga baril gaya NGF AK 47 rifles, M-16 rifle, tatlong (3) shotgun at tatlong (3) calibre 38 revolvers.

Sinasabing nagpanggap na pulis ang naturang mga rebelde at dinis-armahan ang mga rumespondeng pulis at saka tumakas sakay ng isang Toyota Hilux na pick up, dalawang (2) motorsiklo at dalawang (2) armored van ng nasabing security agency.

By Ralph Obina

Lusot na sa ikatlo at huling pagbasa sa Kamara ang pagdagdag ng parusa sa mga ospital at klinika na nagpapabayad ng cash deposit o advance payment bago tanggapin ang mga pasyente.

Ito ay ang House Bill No. 5159 na naglalayong paigtingin ang emergency health care service at pagbabawal ng cash deposit sa mga ospital pagdating sa emergency cases.

Sa ilalim ng panukala, responsibilidad ng naka-duty na doktor o medical staff na alamin kung emergency o nasa seryosong kondisyon ang pasyente.

Sakaling hindi tumugon sa batas, mula sa dating P20,000.00, pagbabayarin ang tumangging hospital personnel ng P100,000.00 hanggang P300,000.00 o maaaring makulong ng 6 buwan hanggang 2 taon.

Kung naging batayan naman ang polisiya ng ospital, mula sa P100,000.00, makukulong ang hospital officer ng 4 hanggang 6 taon o pagmumultahin ng P500,000.00 hanggang P1-M na maaaring ibigay ng Korte sakaling lumala ang kondisyon ng pasyente.

By Meann Tanbio

Tuluyan nang sinibak sa serbisyo ang dalawang (2) kilalang police colonel sa Cagayan de Oro City.

Ito’y matapos mapatunayang guilty ng Ombudsman sina Police Colonel Michael Deloso, dating hepe ng Cagayan de Oro City Police Traffic Division at SPO3 Ernesto Galleto sa kasong Anti-Graft And Corrupt Practices Act at Administrative Complaint for Serious Dishonesty and Grave Misconduct.

Nag-ugat ang kaso ng mangikil si Deloso kasama ang kanyang accessory sa krimen na si Galleto laban sa assosasyon ng mga jeepney drivers ng Brgy. Lumbia.

Kasabay ng pagkakasibak ng dalawa (2) sa serbisyo, kanselado na rin ang kanilang retirement benefits at civil service eligibility.

By Meann Tanbio

Pumalag ang ilang miyembro ng Commission on Appointments (CA) sa alegasyong tumanggap ng lobby money ang mga ito kaya’t naibasura ang appointment ni Gina Lopez bilang kalihim ng DENR o Department of Environment and Natural Resources.

Ayon kay Isabela Representative Rodito Albano, malinis ang kanilang konsensya at ibinase ang kanilang desisyon sa appointment ni Lopez sa merito ng mga isyu na nakapaloob sa kabuuang kapakanan ng kagawaran.

Iginiit naman ni Iloilo Representative Jerry Treñas na walang lumapit sa kanilang kahit isang mining firm upang impluwensyahan ang kanilang desisyon sa appointment ni Lopez.

Binigyang-diin ni Treñas na walang conflict of interest dahil sa wala naman aniyang minahan sa Iloilo.

Matatandaang sinabi ng Palasyo na handa silang kasuhan ang mga miyembro ng makapangyarihang CA na mapapatunayang tumanggap ng lobby money para harangin ang kumpirmasyon ni Lopez.

By  Meann Tanbio 

Photo Credit: @DENR_Official

Umusad na ang imbestigasyon ng CHR o Commission on Human Rights ukol sa pagkamatay ng Abu Sayyaf member na nabaril matapos umanong mang-agaw ng armas sa mga pulis sa Bohol.

Ayon kay CHR Region 7 Director Arvin Odron, dapat magpaliwanag ang mga opisyal ng Tagbilaran City PNP sa sinapit ng ASG member na si Saad Samad Kiram alyas Abu Saad.

Binigyang diin ni Odron na masyado nang gasgas ang anggulong pang-aagaw ng baril kayat napatay ang suspek.

Matatandaang habang ibinibiyahe patungong bohol district jail, bigla na lamang umanong nang-agaw si Saad ng baril sa escort nito kayat binaril ng mga awtoridad hanggang sa mapatay.

Kabilang si Saad sa mga miyembro ng ASG na sumalakay sa bayan ng Clarin kung saan marami sa mga kasamahan nito ang napatay ng militar.

By  Meann Tanbio