Dapat ipagdasal ng mga mananampalataya ang sinumang pumapasok sa pagpapari at sagradong pamumuhay.
Ito ang inihayag ni Manila archbishop Luis Antonio Cardinal Tagle sa kanyang circular na inissue sa mga kleriko at layko kasabay ng 54th World day of Prayer for Vocations at Good Sheperd Sunday.
Isang “Prayer for Vocations” ang babasahin matapos ang komunyon sa mga misa sa susunod na linggo, Mayo a-katorse upang mahikayat ang kabataan na ipanalangin ang mga nagpapari o pumapasok sa sagradong pamumuhay bilang paglilingkod sa Diyos.
Hinimok din ni Tagle ang mga pari sa lahat ng parokya na isama ang mga petisyon para sa nasabing religious vocations sa panalangin ng mga sumasampalataya sa mga misa.
Ang tema ngayong taon ng World Day of Prayer for Vocations ay “Led by the Spirit for Mission.”
By Drew Nacino
Plano ni Senador JV Ejercito na muling buksan ang imbestigasyon hinggil sa maanomalya umanong chopper deal na pinasok ng Department of National Defense (DND).
Ito’y matapos ang pag-crash ng isang Huey helicopter na ikinasawi ng tatlong miyembro ng Philippine Air Force sa Tanay, Rizal, noong Mayo a-kwatro.
Ayon kay Ejercito, magkahalong lungkot at galit ang kanyang nararamdaman sa pagbagsak ng UH-1d o Huey dahil maaari naman itong naiwasan.
Ang nabanggit anyang aircraft ay bahagi ng maanomalya umanong deal na kanilang inimbestigahan noong 16th congress.
Iginiit ng senador na limampung taon o masyado ng luma ang mga Huey helicopter at maiiwasan sana ang mga aksidente kung mas bagong aircraft ang binili ng DND.
Dagdag ni Ejercito, ang nabanggit na trahedya sa Tanay na ikinasawi ng tatlong sundalo ay patunay na nakamamatay ang katiwalian.
By Drew Nacino
Patuloy na inaalam ng National Capital Region Police Office ang pagkakakilanlan ng dalawang nasawi sa mga pagsabog malapit sa Golden Mosque, Quiapo, Maynila, kahapon.
Nasawi ang dalawang biktima sa unang pagsabog na naganap sa kanto ng Globo de Oro at Palanca streets, mag-a-ala sais ng gabi kahapon.
Kinilala naman ang ilan sa mga nasugatan na sina Jaber Gulam, residente ng Lanao del Sur at Hajhi Ali, residente ng Gunao street, Quiapo.
Samantala, nasugatan naman sa ikalawang pagsabog sina Chief Insp. Elisa Reyes Arturo, chief chemist ng Manila Police District Crime Laboratory at PO2 Aldrin Resos ng Explosives and Ordinance Division.
Indikasyon ng terorismo, pinabulaanan
Walang indikasyon na isang uri ng terorismo ang magkasunod na pagsabog sa Quiapo, Maynila, kahapon na ikinasawi ng dalawa katao at ikinasugat ng anim na iba pa.
Ayon kay NCRPO chief, Dir. Oscar Albayalde, isang partikular na tao ang target sa pagpapasabog na naganap sa kanto ng Globo de Oro at Palanca streets, dakong ala singko singkwenta ng hapon kahapon.
Maituturing anyang suspek ang lalaking nagdala ng package sakay ng motorsiklo na kanya namang ini-abot sa isang caretaker na kapwa nasawi naman sa pagsabog.
Dagdag ni Albayalde, maaaring may kaugnayan ang ikalawang pagsabog sa kanto ng Norzagaray at Elizondo streets pasado alas otso ng gabi sa naunang pagsabog.
Nagsasagawa na ng post blast investigation ang mga awtoridad habang naglagay na rin ng checkpoints ang mga pulis sa paligid ng Quiapo.
By Drew Nacino (Photo Courtesy: Philippine Red Cross)
Bukas si UN Special Rapporteur Agnes Callamard na magsagawa ng official visit sa Pilipinas basta’t aalisin lang ng gobyerno ang mga kondisyong inilatag nito noon sa kanya.
Sa panayam ng mga mamamahayag sa isang forum sa UP Diliman, sinabi ni Callamard na naghihintay lang siyang tanggalin ang mga tatlong kondisyon ni Pangulong Rodrigo Duterte.
Kabilang sa mga kondisyon ay dapat makipagdebate si Callamard sa Pangulo, dapat din puymayag si Callamard na matanong siya ni Duterte at gawin ito under oath.
Ayon kay Callamard gusto niya sanang isama ang UN Special Rapporteur for Health sa Pilipinas para makatulong sa pagbibigay ng impormasyon tungkol sa kalusugan at sa pagpigil sa extrajudicial killings o EJK.
Mga batikos kay UN Special Rapporteur Agnes Callamard balewala lang
Balewala lang kay UN Special Rapporteur Agnes Callamard ang mga natatanggap niyang batikos mula sa Malakanyang at sa kanyang mga bashers dahil sa kanyang ginawang academic visit dito sa Pilipinas.
Ayon kay Callamard sanay na siya sa mga batikos at mga puna.
Pero nalulungkot anya siya na mas pinapansin pa ng publiko ang ligalidad ng kanyang byahe sa Pilipinas kaysa sa kanyang pangunahing pakay sa pagbisita na magbahagi ng kanyang nalalaman sa usapin ng karapatang pantao.
Ayon kay Callamard, sa halip na mambatikos sana’y tumutok na lang ang publiko sa talakayan sa dinadaluhan niyang forum sa UP Diliman kung saan ibinabahagi ng mga eksperto mula sa iba’t ibang panig ng mundo ang mga alternatibong paraan sa pagsugpo sa iligal na droga sa isang bansa na maari anyang magamit ng Pilipinas.
By Jonathan Andal
Samantala, isa ng ganap na abogado ang anak ng komedyanteng si Joey Marquez na si Jowee Ann Marquez.
Anak ito ni Joey sa dating dating aktres na si Brenda Del Rio.
Sa Facebook post ni Jowee, puno sya ng pasasalamat sa mga taong tumulong sa kanya lalong-lalo na sa kanyang ama.
Nagpasalamat sya sa kanyang ama dahil sa mga itinuro nito sa kanya at sa patuloy nitong pagsuporta.
Nagtapos si Jowee ng kursong Political Science sa Ateneo De Manila University at nag-aral ng law sa San Beda College Alabang.
By Rianne Briones
Ipinagbubuntis na ni Pauleen Luna ang kanilang panganay ni Bossing Vic Sotto.
Sa pagdiriwang ng kaarawan ni Bossing sa noontime show na Eat Bulaga, inanunsyo nito na buntis na ang kanyang asawa ngunit hindi binanggit kung ilang buwan na.
Kasabay nito, nakiusap si Bossing na ipagdasal ang kanyang asawa at magiging anak upang maayos itong maipagbuntis.
Ikinasal si Vic at Pauleen noong Enero 30, 2016.
By Rianne Briones
Photo Credit: Pauleen Luna
Pinatitigil ng Food and Drug Administration o FDA ang isang pharmaceutical company at isang drug store chain mula sa pagsasagawa ng immunization activities.
Ayon kay FDA Director Nela Charade Puno, ito ay dahil hindi naman pinayagan ang mga kumpanyang Sanofi Pasteur Incorporated at Watson’s Personal Care Stores para magsagawa ng pagbabakuna sa kanilang mga tindahan.
Kasabay nito, pinagpapaliwanag din ang mga naturang mga kumpanya kung bakit hindi sila dapat na sampahan ng kasong kriminal at administratibo dahil sa kanilang naging paglabag.
Una rito ay inanunsyo ng Watson’s na magsasagawa sila ng immununization activities para sa dengue vaccine na dengvazia na gawa ng sanofi.
Tinukoy ng FDA na hindi dapat na over the counter lamang ang pagbili ng naturang dengue vaccine sapagkat ito ay itinuturing na prescription drug para sa edad 9 hanggang 45.
By Rianne Briones
Halos dalawang libong (2,000) preso ang nakatakas sa isang overcrowded na bilangguan sa Sumatra Island sa Indonesia.
Ayon kay Regional Office Law Ministry Head Ferdinand Siagian, nangyari ang pag-eskapo ng mga bilanggo nang payagang lumabas ang mga ito mula sa kanilang selda para magdasal.
Sa huling tala, umaabot na sa higit pitumpung (70) inmates ang naibalik sa kulungan habang nagpapatuloy ang operasyon para sa iba pang bilanggo.
Laan ang naturang bilangguan para sa pitong daang (700) mga preso ngunit higit isang libo at walong daan (1,800) ang nakakulong dito bago mangyari ang pagtakas.
By Rianne Briones
Sinabayan ni Jinkee Pacquiao ang kanyang asawang si Manny sa light training nito sa Cambridge Circle sa Forbes Park Makati City.
Ito’y bilang paghahanda ni Pacquiao sa napipintong niyang laban kay Undefeated Australian Boxer Jeff Horn kung saan idedepensa ni Pacman ang kanyang world welterweight title.
Ayon kay Pacman, light workout pa lamang ang kanyang ginagawa ngayon para ihanda ang kanyang katawan sa matinding training sa Wild Card Gym.
Se-sentro ang training ni Pacman sa bilis at stamina nito na kakailnganin umano para labanan ang mas batang si Horn.
By Jonathan Andal
Photo Credit: Jinkee Pacquiao Instagram