June 2026

Kakasuhan ang mga pulis na inakusahan ng pagtatanim ng bala at tangkang pangingikil sa American missionary na si Lane Michael White.

Sinibak na sa puwesto ang 4 na pulis mula sa PNP Aviation Security Group na natukoy na syang nagtangkang nangikil umano kay White.

Kinilala ang mga sinibak na pulis na sina SPO1 Rolando Clarin, SPO2 Romy Navarro, Chief Insp. Adriano Junio at Chief Insp. Eugene Juaneza, ang head ng investigation unit.

Sina Clarin, Navarro at Junio ang itinurong nanghingi ng P30,000 kay White para hindi na siya kasuhan ng illegal posession of ammunition.

Si White kasama ang ama at stepmother ay papunta sana ng Coron Palawan nang mahuli sa airport dahil sa natagpuang bala sa kanyang bagahe.

By  Len Aguirre 

Handang tumulong ang bansang Colombia sa laban ng Pilipinas kontra sa illegal drugs.

Ito ang ipinabatid ni Colombian President Juan Manuel Santos nang magkaroon ito ng bilateral meeting kay Pangulong Benigno Aquino III sa Malacañang kahapon.

Ang Colombia, isang bansa sa South America ay isa sa top producer ng illegal drugs tulad ng cocaine at marijuana.

Ayon kay Presidential Communications Operations Office (PCOO) Secretary Herminio Coloma Jr. nag-offer ng tulong si President Santos sa bansa sa pamamagitan ng pagbabahagi ng karanasan nito sa anti-insurgency at anti-illegal drugs campaign.

By  Mariboy Ysibido  

Umaasa si Cotabato Archbishop Orlando Cardinal Quevedo na matatalakay sa APEC Summit ang poverty issue sa bansa.

Ayon kay Quevedo, may positibong idudulot ang pagtitipon ng iba’t-ibang lider para sa pagpapaunlad ng mga bansa katulad ng Pilipinas.

Kung ipatutupad aniya ang tinatawag na “trickledown theory”, mararanasan ng mga nasa grassroots ang pag–unlad sa ekonomiya.

Umaasa rin ang arsobispo na magiging mapayapa sa kabuuan ang APEC 2015 kung saan nakataya umano ang pangalan hindi lamang ng pamahalaan kundi ng buong bansa.

By  Meann Tanbio 

Idineklara ni Pangulong Noynoy Aquino ang November 25 bilang “National Day for Youth in Climate Action”.

Alinsunod na rin ito sa presidential proclamation number 1160 na nilagdaan ng Pangulong Aquino noong November 12.

Itinuturing na major breakthrough ng National Youth Commission o NYC ang nasabing deklarasyon lalo pa’t makatutulong ito sa kanilang advocacy campaign na #nowph (not on our watch) na naglalayong mapataas ang public consciousness patungkol sa climate change.

Bunsod ng naturang deklarasyon, inaatasan ang NYC na makipag-ugnayan sa climate change commission at iba pang stakeholders para sa taunang aktibidad may kaugnayan sa “National Day for Youth in Climate Action”.

By  Meann Tanbio  

Tiniyak ni U.S. President Barack Obama na makakaasa ng suporta ang Pilipinas sakaling mangailangan ito ng tulong sa usaping pang-depensa.

Sa kanyang talumpati kahapon, sinabi ni Obama na pinagtibay na ng panahon ang pagtutulungan ng Amerika at Pilipinas patungkol sa usaping depensa dahil sa mga kasunduang ilang taon na nilang pinaiiral.

Ayon pa kay Obama, binibigyang diin ng kanyang pagbisita ang pagtutulungan ng Amerika at iba pang bansa upang matiyak ang seguridad ng karatagan at freedom of navigation sa rehiyon ng Asya Pasipiko.

Tumagal lamang ng kalahating oras si Obama sa loob ng BRP del Pilar kung saan tinignan niya ang mga pasilidad doon.

Nakipag-usap din ang presidente ng Amerika kina AFP Chief of Staff General Hernando Irriberi at Defense Secretary Voltaire Gazmin sa loob ng BRP Alcaraz.

Military Ships

Samantala, nangako si U.S. President Barack Obama na magdo-donate ang Amerika ng dalawang military ships sa bansa.

Sa kanyang talumpati kahapon sa Pier 13 sa South Harbor, sinabi ni Obama na nais nilang magbigay ng isang research ship na magagamit sa pamamapa sa karagatan at isang U.S. Coast Guard cutter o barkong pandigma na katulad ng BRP Del Pilar.

Ayon kay Obama, layon ng hakbang na ito na mapataas pa ang maritime assistance ng Amerika sa kanilang mga kaalyadong bansa.

By  Meann Tanbio | Jonathan Andal  

Nagtalaga ang mga otoridad ng public assistance hotlines para ma-accommodate ang anumang security threats at reklamo may kaugnayan sa APEC Summit.

Hinihikayat ang publiko na tumawag sa hotline numbers 0949-729-0082 para sa smart subscribers at 0906-216-3615 para naman sa Globe subscribers.

Ang mga nasabing hotline numbers ay pangangasiwaan ng mga kinatawan mula sa APEC Multi-Agency Security Task Force.

Samantala, nagtalaga rin ang security task force ng hotline number para sa mga mamamahayag na nagko-cover sa nasabing summit.

Ang APEC media hotline ay 0995-459-3939.

By  Meann Tanbio 

Tama lamang ang naging desisyon ng Senate Electoral Tribunal (SET) sa pagsasabing natural born Filipino si Senadora Grace Poe.

Ito ang opinyon ng kilalang election lawyer na si Atty. Romulo Macalintal.

Ayon kay Macalintal, iba’t iba ang pananaw ng mga justices na mga abogado at ng mga senador na hindi abogado. Bagamat abogado sumama naman sa pananaw ng majority decision si Senadora Pia Cayetano.

Naniniwala si Macalintal na tama ang naging desisyon ng SET na ibinase sa will of the people na siya namang magiging batayan ng mga foundlings sa bansa.

“Para magkaroon tayo ng batayan kaugnay ng mga foundlings, kasi alam kapag ganyan na uncertain o hindi nakakasiguro kung ano talaga ang dapat i-apply na batas, yung tinatawag na will of the people shall prevail.” Pahayag ni Macalintal.

By  Mariboy Ysibido | Balitang Todong Lakas