June 2026

Pinulong ni Pangulong Noynoy Aquino ang mga opisyal ng Department of Transportation and Communications (DOTC).

Sa harap na rin ito ng sunud-sunod na insidente ng tanim bala sa Ninoy Aquino International Airport o NAIA kung saan, kadalasang biktima rito ay ang mga Overseas Filipino Worker (OFW) gayundin ang mga turista.

Ayon kay Presidential Spokesman Edwin Lacierda, binigyang ng briefing ng mga taga-DOTC ang Pangulo hinggil sa usapin.

Nagbigay na rin aniya ng kautusan ang Pangulong Aquino para mapaigting ang mga pagsisikap na matigil ang ganitong insidente.

Pinupuna ngayon ng mga kritiko ang palasyo dahil sa tila pagiging malamiya sa pagtugon nito sa problema sa paliparan.

Gayunman, sinabi ni Lacierda na ang DOTC ang siyang inatasang maghayag sa publiko hinggil sa mga gagawing hakbang para mapawi ang pangamba ng mga pasahero sa NAIA at maalis ang pangit na impresyon sa mga tauhan ng NAIA.

By  Jaymark Dagala | Aileen Taliping (Patrol 23) 

Tatapatan ng grupo ng mga Overseas Filipino at migrant workers ang umiiral na laglag bala modus sa NAIA.

Ito’y bilang tugon sa dumaraming kaso ng mga nabibiktima ng nasabing modus na karamiha’y mga OFW.

Ayon kay John Leonard Monterona, Regional Coordinator ng Migrante Middle East, nakikipag-ugnayan na sila sa ibang grupo upang ilunsad ang laglag o bawas padala gayundin ang laglag boto.

Aniya, maihahalintulad ang laglag o bawas padala sa zero remittance day na makailang beses na nilang ginawa.

Habang ang laglag boto naman aniya ay maituturing na no vote campaign sa lahat ng mga kaalyado ni Pangulong Noynoy Aquino na tatakbo sa darating na 2016 elections.

By  Jaymark Dagala | Allan Francisco  

Lubhang mapanganib ang paglalayag ng mga sasakyang pandagat partikular na sa mga baybayin ng hilagang Luzon.

Ito ang ibinabala ng PAGASA dahil sa malakas na hanging dulot ng northeast monsoon o hanging amihan.

Bagama’t umiiral na ang amihan, sinabi ng PAGASA na ang easterlies o ang hangin namang nagmumula sa silangan ang siyang umiiral sa silangang bahaging bansa.

Kaya payo ng PAGASA, manatiling nakatutok sa kanilang mga abiso upang magabayan hinggil sa lagay ng panahon.

By Jaymark Dagala 

Nanindigan ang PNP Aviation Security Group na walang modus na tanim bala sa NAIA at wala ring sindikatong nasa likod nito.

Ito ang iniahayg ni PNP AVESEGROUP Spokesman Supt. Jean Panisan, batay sa isinagawa nilang sariling imbestigasyon sa kanilang hanay.

Giit ng opisyal, malabong mataniman ng bala ang bagahe ng mga pasahero dahil tanging sila lamang ang may hawak nito hanggang makaabot sa first screening ng airport.

Ang mga pasahero din aniya ang naglalagay ng kanilang bagahe sa conveyor belt sa x-ray machine maliban na lamang kung may porter na nakaalalay dito.

Ngunit aminado si Panisan na hindi isinama sa imbestigasyon ang mga tauhan ng Office for Transport Service na siyang nagsisilbing screener sa mga bagahe ng mga pasahero sa paliparan dahil wala silang hurisdiksyon sa mga ito.

By  Jaymark Dagala | Jonathan Andal  

Pinaplantsa na ng Philippine Coast Guard ang kanilang ilalatag na seguridad partikular na sa Manila Bay.

Ito’y may kaugnayan sa nalalapit na Asia Pacific Economic Cooperation o APEC Summit na gagawin sa bansa dalawang linggo mula ngayon.

Ayon kay Rear Admiral William Milad, Officer in Charge ng Coast Guard, ilan sa kanilang posibleng ipatupad ay ang no sail zone sa ilang piling lugar at oras malapit sa venue ng APEC.

Ganito rin ang kanilang ipatutupad sa Manila Bay kung saan mananatili lahat ng mga delegado at heads of state sa nabanggit na pagpupulong.

Kasunod nito, nakikipag-ugnayan na rin ang Coast Guard sa philippine Navy sa kung ilang floating assets at tauhan ang kanilang ipakakalat para mapanatili ang kaayusan sa panahon ng APEC Summit.

By Jaymark Dagala | Aya Yupangco (Patrol 5)  

Tiniyak sa Malakanyang ni Senate President Franklin Drilon na maipapasa ng senado ang panukalang 3 trilyong pisong pambansang budget sa 2016 nang naaayon sa iskedyul nito tulad ng mga nakalipas na taon.

Ayon kay Drilon, malapit nang simulan ng senado ang deliberasyon sa plenaryo ukol sa proposed national budget makaraang matanggap ang 2016 General Appropriations Act Version ng kamara na nakapasa sa ikatlong pagbasa noong Oktubre 19.

Maliban dito, sinabi Drilon na maliban sa 2016 budget, kabilang din sa pangunahing agenda ng senado ang panukalang Bangsamoro Basic Law upang ito aniya ay maipatupad na sa susunod na linggo.

Nangako si Drilon na magsisikap ang senado upang maipasa ang naturang mga panukalang batas bago pa matapos ang taong 2015.

By  Ralph Obina

Inilagay na ngayon sa half mast ang watawat ng Pilipinas sa Court of Appeals (CA) bilang pagluluksa sa pagpanaw ni dating presiding Judge Salome Montoya.

Pumanaw si Montoya nitong Biyernes ng nakalipas na linggo sa edad na 84 sanhi ng stroke.

Kuwento ng adopted son ni Montoya na si John, Martes pa isinugod sa ospital ang kaniyang ina at tuluyan na itong binawian ng buhay makalipas lang ang tatlong araw.

Nanungkulan bilang presiding judge si Montoya mula Enero 1990 hanggang 2001 kung saan, hinangaan ito dahil sa pagpapatupad ng panalangin bago ang flag raising ceremony.

Tumanggap din si Montoya ng cross of honor award noong 1993 na ibinigay ni dating pope at ngayo’y Saint John Paul II na siyang pinakamataas na parangal na iginagawad ng Simbahang Katolika.

Kasalukuyang nakaburol ang labi ni Montoya sa kanilang tahanan sa Marikina City at nakatakdang ihatid sa huling hantungan sa Loyola Memorial Park sa darating na Huwebes.

By  Jaymark Dagala | Bert Mozo (Patrol 5)  

Nanganganib na maapektuhan na ang turismo sa bansa dahil sa usapin ng laglag bala modus sa mga paliparan.

Ayon kay Nenette Aguirre – Graf, Vice President ng Boracay Foundation, dapat bilisan ng mga kinauukulan ang pag-aksyon upang mabigyan ng katiyakan ang mga biyahero na ligtas pa ring lumabas at pumasok sa bansa.

Paliwanag pa ni Graf, dumaragsa na ang mga nagtatanong sa kanilang foreign counterparts hinggil sa usapin dahil sa nababalitaan nila ito sa social media.

Kung hindi masosolusyunan, iginiit ni Graf na mababalewala ang kampaniya ng pamahalaan gayundin ng mga pribadong kumpaniya na manghikayat ng mga turista sa bansa kung hindi mapipigilan ang lumalalang problema.

By  Jaymark Dagala