Patay ang dalawang taong gulang na lalaki makaraang gahasain at pagsasaksakin ng kanyang sariling tiyuhin na sinasabing sabog sa iligal na droga sa Muntinlupa City.
Agad namang naaresto ang suspek na kinilalang si Edgardo Mendoza, 29 na taong gulang na kalauna’y umaming isinilid ang bangkay ng pamangkin sa duffle bag at iniwan sa isang parking area sa South Station sa Barangay Alabang, dakong alas tres kahapon.
Ayon kay Southern Police District Director, Chief Supt. Tomas Apolinario, una nang sinabi ni Mendoza na pansamantala nitong iniwan ang bata sa isang hindi kilalang babae para mag-banyo pero makalipas ang ilang minuto ay hindi na umano nakita ang pamangkin.
Gayunman, nagsuspetsa anya ang mga pulis lalo’t may mga nakitang bakas ng dugo at pintura sa pantalon ng suspek.
Inamin ni Mendoza na ipinagpa-alam niya sa kanyang kapatid na ina ng biktima na mamamasyal lamang pero dinala ang pamangkin sa isang motel sa Alabang kung saan pinainom ito ng gatas na may pintura at kalauna’y ginahasa bago pagsasaksakin.
Samantala, aminado naman ang kapatid ni Mendoza na minsan na itong naging adik sa shabu.
