Sinampahan ng mga kasong kriminal at administratibo ng Bureau of Fisheries and Aquatic Resources o BFAR ang mga Taiwanese nationals na iligal na nangingisda sa mga isla ng Babuyan Claro na sakop ng Calayan Group of Islands.
Ito’y makaraang mahuli ang isang barkong pangisda na F/B Der Maan Fure Number 3 na may watawat ng Pilipinas ngunit napag-alamang mga Taiwanese ang sakay at nakarehistro ang barko sa Taiwan.
Batay sa quick response team report ng BFAR, namataan ang nasabing barkong pangisda may 17 nautical miles hilagang silangan ng Babuyan Claro.
Kinilala rin ang mga nahuling Taiwanese nationals na sina Lin Dah Gwo at Wu Jeng Shyong na kasalukuyang nasa kostudiya ng Philippine Coast Guard sa Port Irene sa Cagayan.
Kasabay nito, sinabi ni BFAR Director Atty. Asis Perez, wala siyang nakikitang lamat sa relasyon ng Pilipinas at ng Taiwan dahil kapwa responsable naman ang dalawang bansa sa paghawak sa usapin.
By Jaymark Dagala