Binawian ng buhay ang isang rider habang sugatan ang dalawa pa matapos araruhin ng truck ang nasa sampung sasakyan sa bayan ng Dasmariñas, Cavite.
Kinilala ang biktima na si Junel Daclis habang ang mga sugatan ay sina Rodel Terrence Mejia at Butch Del Carmen.
Ayon sa report ng Dasmariñas Police Station, naganap ang insidente sa kahabaan ng Daño St. Intersection ng nasabing lugar.
Sa kuha ng CCTV footage, nakahinto ang mga sasakyan na kinabibilangan ng mga motorsiklo, kotse at truck dahil nakapula ang traffic light.
Dito biglang humarurot ang truck at inararo ang mga sasakyan.
Samantala, nadakip at nahaharap ngayon ang drayber ng truck sa patung-patong na kaso. – sa panulat ni Airiam Sancho
