Walang epekto sa magiging gameplay ng defending NBA champion Golden State Warriors sa Game 5 ng finals kontra Cleveland Cavaliers ang suspension kay Draymond Green.
Aminado sina Coach Steve Kerr at Klay Thompson na sa halip kabahan sa suspension kay Green ay posibleng magbigay ito sa kanila ng lakas ng loob at motivation.
Ayon kay Kerr, kung tutuusin ay marami rin silang mga magagaling na bench player gaya na lamang ng kanilang ipinakita sa Game 1 kung saan pinangunahan ni Shaun Livingstone ang Warriors upang masungkit ang unang panalo sa best of seven series.
Posibleng paglaruin din ng mas matagal ang 7 foot center na si Andrew Bogut o isabak sa court ang bench player at forward na si James Michael Mcadoo para sa Warriors.
Kumpiyansa rin anya sila na masusungkit na ng team ang kanilang ikalawang kampyonato bukas lalo’t liyamado na sila sa kartadang 3-1 bukod pa sa homecourt advantage.
Magugunitang tinawagan ng flagrant foul si Green matapos nitong tamaan sa bandang singit si Cavaliers star Lebron James sa nalalabing 2 minutes at 48 seconds ng 4th quarter sa Game 4 noong Sabado na nauwi naman sa 1 game suspension.
By Drew Nacino
Photo Credit: (Jose Carlos Fajardo/Bay Area News Group)
