Ipinagmalaki ni Tanauan, Batangas Mayor Antonio Halili na epektibo ang isinasagawang “walk of shame” sa kanilang lugar.
Ginawa ni Halili ang pahayag matapos iparada ang 7 hinihinalang drug pusher na nahuli umanong nagbebenta ng droga.
Sa panayam ng DWIZ, binigyang diin ng alkalde na nabawasan ng naturang aksyon ang mga nakawan sa kanilang palengke at maging ang mga rapist.
“Simula nung maipasyal natin ang mga magnanakaw sa palengke ay natigil ang nakawan sa palengke na dati ay araw-araw so simula nun natigil na, so masasabi kong maganda ang resulta. Ang nagiging problema na lang sa mga palengke ngayon ay mga minors, nangungupit, yun na lang so far.” Pahayag ni Halili.
Bahagi ng pahayag ni Tanauan, Batangas Mayor Antonio Halili
Walk Of Shame
Matatandaang muling nagsagawa ng walk of shame si Tanauan City Mayor Antonio Halili sa Batangas.
Nakadikit ang karatulang “Ako ay Pusher, Huwag Tularan”, pinarada sa palengke ang pito katao na umano’y tulak ng droga sa lugar.
Dalawa sa mga ipinarada ay babae.
Sa kabila ng pagkondena ng Commission on Human Rights, nanindigan si Halili na ipagpapatuloy niya ang kanyang ginagawa matiyak lamang ang katahimikan sa kanyang nasasakupan.
Hindi ito ang unang pagkakataon na nagsagawa ng walk of shame ang alkalde ng Tanauan.
March 2014, pinalakad ang lalaking nagnakaw umano ng tuyo.
Sinundan ito noong June 2015 kung saan isang lalaking pinaghihinalaang nagnakaw ng kable ng kuryente ang pinalakad sa palengke.
Nito lamang Abril ng kasalukuyang taon, nakatikim din ng walk of shame ang umano’y rapist.
By Jelbert Perdez | Meann Tanbio | Ratsada Balita
Photo Credit: abs-cbn
