Kinumpirma ng Department of Health (DOH) na isang posibleng kaso ng Middle East Respiratory Syndrome Corona Virus (MERS-CoV) ang minomonitor sa Northern Mindanao Medical Center, Cagayan de Oro.
Agad namang pinawi ng DOH ang pangamba ng mga residente sa posibleng pagkalat ng sakit sa lalawigan.
Sinabi ni Health Spokesperson Lyndon Lee Suy, may kakayahan ang nasabing ospital na pangalagaan at tugunan ang pangangailangang medikal ng pasyente na ngayon ay nasa isang isolated room.
Bumiyahe umano sa Singapore ang pasyente at pagbalik ng bansa ay kinakitaan ito ng sintomas ng sakit, una itong dinala sa isang pribadong ospital.
Sinabi naman ni Dr. Ramon Moreno ng NMMC na hindi pa kumpirmado kung positibo sa MERS-CoV ang pasyente ngunit kinunan na ito ng fluid sample para sa screening.
Tiniyak din ng NMMC na nakahanda naman ang kanilang pasilidad na bigyan ito ng kaukulang medikasyon sakaling magpositibo man ang nasabing pasyente sa MERS-CoV.
By Mariboy Ysibido