Dumipensa ang National Police Commission (NAPOLCOM) kung bakit dalawa lamang sa SAF 44 ang inirekomenda nilang mabigyan ng medal of valor o Medalya ng Kagitingan.
Ayon kay Atty. Ed Escueta, Vice Chairman ng NAPOLCOM, dumaan sa masusing pagtimbang ng lupon ng mga eksperto sa gawain ng uniformed personnel ang paggawad ng Medalya ng Kagitingan kina Senior Inspector Gadnat Tabdi at Police Officer 2 Romeo Cempron.
Hindi anya ito pangmamaliit sa kabayanihan ng iba pang miyembro ng SAF 44 kundi nagkataon na dalawa lamang ang nakapasok sa criteria para sa tatanggap ng medal of valor, ang pinamamataas na parangal na puwedeng igawad sa isang pulis.
Binigyang diin ni Escueta na kinikilala ng pamahalaan ang kabayanihan ng SAF 44 kaya’t lahat sila ay tatanggap ng medalya ng kabayanihan.
By Len Aguirre
