Isinusulong ni Parañaque 2nd District Rep. Brian Yamsuan ang tax exemption sa lahat ng incentives, rewards, bonus at donasyon na matatanggap ng mga national athlete at coach sa buong bansa.
Sa House Bill 9470, nais ni Yamsuan na hindi lamang mga medalist ang makinabang, kundi pati mga atletang lumalahok sa mga local at international competition kahit hindi nakapag-uwi ng medalya.
Layon nitong hikayatin ang mga pribadong sektor na suportahan ang mga atleta kung saan ang mga donasyon ay gagamitin lamang para sa training at gastusin sa kompetisyon na maaari umanong ibawas sa taxable income ng donor.
Ayon kay Yamsuan, karapatan ng mga atleta at coach na matanggap nang buo ang anumang rewards, bonus, o donasyon bilang pagkilala sa kanilang mga taon ng pagsasanay at sakripisyo para sa bansa.
Nanawagan si Yamsuan sa mga kapwa mambabatas na agad na maisabatas ang panukala bilang konkretong suporta ng Kongreso sa mga atleta at mga susunod na henerasyon ng Filipino sports champions at kanilang mga coach. | Sa panulat ni Geli Mendez
