Ipinatigil ng Pasig Regional Trial Court Branch 152 ang pagpapatupad ng National Capital Region Wage Order Number 27, na nagtatakda ng 85-pesos minimum wage hike sa Metro Manila.
Epektibo ang T.R.O. o Temporary Restraining Order simula pa nitong Hulyo a-bente kwatro hanggang Agosto a-trese, habang nakatakda naman ang pagdinig sa hiling na preliminary injunction sa Agosto 13.
Inihain ang petisyon ng Readycon Trading and Construction Corporation at R-2 Builders Incorporated, na nagsabing magdudulot ang naturang wage hike ng malaking dagdag-gastos sa kanilang operasyon.
Iginiit ng Readycon na maaaring magdulot ang umento sa sahod ng pagbawas ng mga empleyado, paghinto ng operasyon, at paghina ng kakayahang kumuha ng mga bagong proyekto.
Gayunman, kinilala ng Pasig R.T.C. ang karapatan ng mga manggagawa sa makatarungang sahod at ng mga negosyo sa makatwirang kita habang dinidinig ang nasabing ligal na usapin.
Nauna nang ipinatupad nitong Hulyo a-bente singko ang paunang 60 pesos sa kabuuang 85 pesos wage increase sa Metro Manila, habang ang natitirang 25 pesos ay nakatakdang ipatupad sa Enero ng susunod na taon. | Sa panulat ni Jordan Gutierrez
