Iniutos ng Department of National Defense sa Armed Forces of the Philippines na palawigin ang Direct Commission Program nito upang makahikayat ng mga highly-qualified na propesyonal at mapaigting ang teknolohikal na kapabilidad at gawing multidisciplinary ito.
Ayon sa DND, layunin ng direktiba na palakasin ang recruitment at commissioning ng mga qualified na Advanced ROTC graduates, deserving enlisted personnel, at mga highly-skilled professionals sa larangan ng cyber operations, artificial intelligence, engineering, aviation, communications, research and development, at iba pang teknolohiyang kinakailangan para sa pagmo-modernisa at pagpapalawig sa sandatahang lakas.
Kabilang din sa direktiba ng kagawaran ang pagtataguyod ng mga paraan para ma-commission ang mga enlisted personnel bilang mga military officer, maglagay ng makatwirang accommodation para sa mga qualified na PWD na may mahalagang misyon sa defense community, at mag-develop ng napapanahong pagsasanay at career development program para sa mga sundalong na-recruit sa mga nabanggit na programa, habang isinasaalang-alang ang mga panuntunan, patakaran, at ang professional, operational, at security standards ng AFP.
