Inaasahang tututukan ni Pangulong Ferdinand Marcos Jr. sa kanyang ika-limang State of the Nation Address ang mga isyu sa ekonomiya, korapsyon, at mga hamon na direktang nararamdaman ng publiko.
Ayon kay SONA speech writer Jose Butch Dalisay, mahalagang ipaliwanag ng Pangulo sa publiko ang sitwasyon ng bansa, kabilang ang mga nagawa, kakulangan, at mga plano ng administrasyon.
Binigyang-diin ni Dalisay na dapat maglaman ang SONA ng kongkretong hakbang at pag-asa sa mga mamamayan, partikular sa mga suliranin ng bansa, gaya ng pagtaas ng presyo ng mga bilihin, kakulangan sa imprastraktura, transportasyon, at pagpapanumbalik ng tiwala ng publiko sa pamahalaan sa halip na matuon sa isyu ng impeachment.
Bukod dito, mahalaga rin anyang kilalanin ng Pangulo ang mga hamon at pagkukulang ng administrasyon, habang ilalahad ang malinaw na direksyon ng bansa at ang mga hakbang upang makamit ito sa nalalabing panahon ng kanyang panunungkulan.—sa panulat ni Reabelle Medina
