Isinalaysay ni retired Judge Jaime Santiago na agad na naglunsad ng imbestigasyon ang National Bureau of Investigation (NBI) nang mag-viral noong Nobyembre 2024 ang Zoom meeting ni Vice President Sara Duterte.
Ayon kay Atty. Santiago, una nilang ipinasuri sa NBI Cybercrime Unit kung tunay ang kumakalat na video o kung posibleng gawa lamang ito ng artificial intelligence (AI).
Aniya, kasunod ng pagkalat ng video ay sunod-sunod ding naglabas ng pahayag ang ilang matataas na opisyal ng pamahalaan, kabilang sina former executive secretary Lucas Bersamin at Ombudsman Jesus Crispin “Boying” Remulla. Maging si Pangulong Ferdinand “Bongbong” Marcos Jr. aniya ay nagpahayag na hindi palalampasin ang anumang banta na maaaring may pananagutang kriminal.
Dahil dito, sinabi rin ni Atty. Santiago na agad na nagsagawa ng imbestigasyon ang NBI alinsunod sa mandato nito.
Inatasan aniya ang NBI Cybercrime Division, sa pangunguna ni Agent John Mark Calilung, na beripikahin ang pagiging tunay ng video at tiyaking mapreserba ang digital evidence. Nakipag-ugnayan din umano ang NBI sa Facebook, na nagbigay ng kinakailangang certification at tumulong sa pagpreserba ng kaugnay na datos para sa imbestigasyon.
