Lumakas na bilang tropical storm ang bagyong Kiyapo habang papalapit ito sa extreme Northern Luzon.
Itinaas ang Tropical Cyclone Wind Signal No. 2 sa Batanes, hilagang bahagi ng Cagayan kabilang ang Babuyan Islands, at Pagudpud, Ilocos Norte dahil sa inaasahang malalakas na hangin.
Ayon sa PAGASA, namataan ang sentro ng bagyo sa layong walongdaan dalawampung kilometro sa silangan ng Northern Luzon, taglay ang lakas ng hanging aabot sa animnapu’t limang kilometro bawat oras at bugso na hanggang walumpung kilometro bawat oras.
Nakitang kumikilos ito pa-kanluran-hilagang-kanluran sa bilis na tatlumpung kilometro bawat oras at inaasahang dadaan malapit sa Cagayan at Babuyan Islands.
Nagbabala ang PAGASA sa posibilidad ng malakas na pag-ulan sa Batanes, Cagayan, Apayao, at Ilocos Norte na maaaring magdulot ng pagbaha at pagguho ng lupa.
Naglabas din ng gale warning sa hilagang baybayin ng Northern Luzon kung saan delikado ang paglalayag dahil sa malalakas na alon at hangin.
Nagbabala rin ang PAGASA na maaaring lalo pang lumakas ang Tropical Storm Kiyapo at maging isang severe tropical storm matapos tumawid sa Babuyan Islands. Posible rin itong umabot sa typhoon category habang kumikilos sa West Philippine Sea bago magtungo sa southern mainland China. | Sa panulat ni Reabelle Medina.
