Pansamantalang ihihinto ng Department of Agriculture ang pagpasok sa bansa ng higit dalawandaang libong metric tons ng inaangkat na isda at inilipat ito sa huling quarter ng taon (Q4).
Ayon kay Agriculture Secretary Francisco Tiu Laurel Jr., papayagan lamang ang pagpasok ng naaprubahang volume na angkat na isda sa pag-uumpisa ng closed fishing season, dahil sapat at matatag pa ang kasalukuyang suplay mula sa mga lokal na mangingisda.
Dagdag pa ni Sec. Laurel, ang hakbang na ito ay bilang paghahanda sa posibleng epekto ng El Niño sa bansa.
Samantala, tiniyak naman ng kalihim na hindi mababawasan ang naaprubahang 250,000 metric tons na kabuuang angkat ng frozen fish at iba pang produktong-dagat na nakalaan para sa buong taon.—sa panulat ni Reabelle Medina mula kay Jenn Patrolla (Patrol 38)
