Patuloy na makakaapekto sa ilang bahagi ng bansa ang low-pressure area (LPA) na namataan sa silangan ng Northeastern Mindanao at ang southwest monsoon o habagat ngayong Linggo, na magdadala ng pag-ulan at posibleng pagbaha, ayon sa Philippine Atmospheric, Geophysical and Astronomical Services Administration (PAGASA).
Nasa tinatayang 890 kilometro silangan ng Northeastern Mindanao ang LPA. Sa ulat ng PAGASA, may posibilidad itong maging bagyo sa mga susunod na araw at maliit ang posibilidad na ito ay maging bagyo sa loob ng 24 oras.
Inaasahang magdadala ito ng maulap na kalangitan na may kalat-kalat na pag-ulan at thunderstorms sa Eastern Visayas, Caraga, at Davao Region, kung saan nagbabala ang ahensya sa posibleng flash floods at landslides dahil sa katamtaman hanggang malalakas na pag-ulan.
Samantala, apektado rin ng habagat ang Ilocos Region, Zambales, Bataan, Occidental Mindoro, at Palawan, na posibleng makaranas ng kaparehong kondisyon ng panahon at panganib ng pagbaha at pagguho ng lupa.
Maulap hanggang bahagyang maulap na papawirin na may mga pulo-pulong pag-ulan o thunderstorms naman ang inaasahan sa Metro Manila at sa natitirang bahagi ng bansa, habang nagbabala ang PAGASA na maaaring magdulot pa rin ng flash floods o landslides ang malalakas na thunderstorms.
