Pinagtibay ng Kamara ang isang resolusyon para sa pakikiramay at suporta sa mga biktima ng magnitude 7.8 na lindol sa Mindanao.
Sa isinagawang special session, in-adopt sa plenaryo ng Kamara ang House Resolution 1131 na inakda nina House Speaker Faustino Dy III, House Majority Leader Sandro Marcos, at House Minority Leader Marcelino Libanan bilang pagpapakita ng pinakamalalim na pakikiramay, taos-pusong malasakit, at matatag na suporta sa mga biktima ng sakuna partikular sa General Santos City at Sarangani.
Batay sa pinakahuling ulat, umabot na sa 68 ang nasawi, 33 ang nawawala, habang daan-daan naman ang sugatan.
Malawak din ang pinsala sa mga pampublikong imprastraktura, gusali, mga bahay, tulay, kalsada, at iba pang pasilidad sa mga apektadong lugar.
Nakapaloob sa resolusyon ang pagkilala ng Kamara sa maagap na pagtugon ng pamahalaan upang matulungan ang mga naapektuhang komunidad.
Matatandaang kamakailan lamang ay personal ding bumisita si Speaker Dy sa Mindanao upang personal na suriin at alamin ang sitwasyon sa mga lugar na sinalanta ng lindol at maghatid ng tulong sa mga residente.
Patuloy naman ang panawagan ng Kamara ng sama-samang pagkilos, pagkakaisa, at suporta sa relief, rehabilitasyon, recovery efforts, at pagpapalakas ng katatagan ng mga komunidad na pinadapa ng lindol.
