Nanlulumo ang TV host at dating Ateneo volleyball player na si Gretchen Ho sa sinapit ng dalawang basketbolista ng Ateneo de Manila University.
Nabatid na nalunod sina Rene Clert Baterbonia at Divine Adili sa gitna ng pagsasanay umano ng Ateneo Blue Eagles sa isang dalampasigan sa Dipaculao, Aurora.
Ayon kay Ho, lubhang masakit para sa kanya na may kinalaman sa kanyang dating paaralan ang naturang insidente, at inaanyayahan niyang hayaang magluksa ang pamilya ng mga biktima.
Umaasa rin ang dating Lady Eagle na magiging komprehensibo ang imbestigasyong pangungunahan ng Philippine Sports Commission, at isasapubliko ang resulta ng mga ito sa tamang panahon.
Gayunman, naniniwala si Ho na lalo lang titindi ang spekulasyon at maling naratibo kung mananatiling tahimik ang pamunuan ng Ateneo, kaya nananawagan siya sa unibersidad na gawin ang nararapat na hakbang tungkol sa insidente. | Anjo Riñon
