Binansagang “pro-dynasty bill” ni Dapat Isa Lang Co-Convenor Atty. Alex Lacson ang House Bill 8389 na isinusulong nina House Speaker Faustino “Bojie” Dy III at House Majority Leader Ferdinand “Sandro” Marcos III, na pareho anyang nagmula sa mga dinastiya.
Ayon kay Atty. Lacson, nagmula sa isang dinastiya ang walo sa kada sampung mambabatas sa dalawang kapulungan ng Kongreso, at nasa walumpung porsyento naman sa lahat ng mga lokal na pamahalaan sa buong bansa; na ayon sa kanya, ay ang pinaka-ugat ng sistematikong katiwalian sa bansa.
Dahil dito, naniniwala ang abogado na panahon na upang magpasa ng isang tunay na anti-dynasty law sa pamamagitan ng people’s initiative.
Dagdag pa ni Atty. Lacson, ilulunsad ng Dapat Isa Lang ang isang “National Day of Signing” sa Hunyo a-dose, o Araw ng Kalayaan, upang isulong ang kanilang bersyon ng anti-dynasty law, na target nilang maisumite sa Commission on Elections sa katapusan ng taon.
Limitado lang din anya ang papel ng Comelec sa pagbe-beripika ng mga lagda sa people’s initiative. —sa panulat ni Anjo Riñon
