Gumagawa na ng mga paraan ang Energy Regulatory Commission (ERC) upang maibsan ang mataas na singil sa kuryente sa gitna ng nararanasang red at yellow alert sa Luzon at Visayas.
Ayon kay ERC Chairman, Atty. Francis Saturnino Juan, maaari nilang ipag-utos sa Meralco na i-refund ang sobrang singil mula sa consumers upang mabawasan ang posibleng epekto ng serye ng red at yellow alert.
Partikular na tinukoy ng ahensya ang sobrang singil sa distribution charge ng Meralco kaugnay ng aplikasyon nito para sa actual weighted average tariff sa mga nakalipas na taon.
Gayunman, aminado si Juan na pawang Meralco customers lamang ang makikinabang sa naturang hakbang at hindi ang mga subscribers ng mga regional electric cooperative.
Hindi pa rin anya matiyak kung magkano ang magiging refund at kung maaari itong ipatupad bago ilabas ang June billing pero sa kasalukuyan ay nagre-refund ang nasabing power distributor ng 14 billion pesos sa mga consumers o katumbas ng 25 centavos na bawas sa kada kilowatt hour.
Sa labas naman ng Meralco franchise area at Visayas o Mindanao, sinabi ni Juan na makatutulong ang utay-utay na pagbabayad ng bill maging ang “no disconnection” policy.
