Nanawagan ang Ateneo Alumni Association sa mga estudyante at kapwa alumni ng Ateneo de Manila University na patuloy na makialam at makilahok sa nagpapatuloy na tensyon sa pulitika at lipunan.
Ayon sa grupo, nasa “kritikal na sangandaan” ang Pilipinas dahil nagiging teatro na umano ang buhay-publiko habang patuloy na naghihirap ang taumbayan dahil sa paghina ng ekonomiya.
Inaanyayahan din ng grupo ang publiko na tignan ang mga kasalukuyang krisis ng bansa sa lente ng pagpapahalaga ng mga Heswita, tulad ng “discernment,” o ang malalim na pagninilay; “magis” o ang paghahangad sa pagpapaigting sa pamantayan sa pamamahala; at ang “cura personalis,” o ang pangangalaga sa lahat ng aspeto ng buhay ng tao.
Nanawagan din ang grupo sa mga kapwa Atenista na lalo pang maging aktibo sa paghahangad sa pananagutan, manatiling mapagmatyag, at ituon ang pagkadismaya sa mainam na pagkilos. —sa panulat ni Anjo Riñon
