Gumugulong na ang imbestigasyon ng Department of the Interior and Local Government laban sa ilang matataas na opisyal ng Bureau of Fire Protection (BFP) kaugnay ng sinasabing overpriced na pagbili ng mga fire safety equipment.
Ayon kay Interior Secretary Jonvic Remulla, nakatuon ang imbestigasyon sa mga umupong opisyal ng BFP sa Bids and Awards Committee noong nakaraang taon at ilang personnel ng Quezon City Fire Department.
Damay din anya sa imbestigasyon ang ilang opisyal ng National Capital Region Police Office NCRPO at mismong liderato ng BFP.
Nag-ugat ang imbestigasyon sa ibinunyag ni Sec. Remulla kamakailan na dalawang senior official ng BFP ang sinibak habang iniimbestigahan ang sinasabing 30-million peso kickback nila sa pagbebenta ng overpriced fire extinguishers sa isang condominium building sa Quezon City.
Binigyang-diin ni Sec. Remulla na nagtalaga na rin sila ng special task force at bumili ng mga body cameras na ipasusoot sa mga fire inspectors para ma-record ang kanilang mga transaksiyon.
