Pinag-aaralan na ng Department of Agriculture o DA ang pagpapatupad ng maximum suggested retail prices o MSRP para sa sibuyas, karne ng baboy, at carrots upang mapigilan ang pagtaas ng presyo ng mga ito bago magsimula ang holiday season.
Ayon kay Agriculture Secretary Francisco Tiu Laurel Jr., target ng kagawaran na ipatupad ang MSRP sa mga nasabing produkto pagdating ng katapusan ng Nobyembre o Disyembre a-uno.
Binigyang-diin ni Secretary Tiu Laurel na ang hakbang ay ipatutupad sa imported pork at carrots.
Gayunman, parehong imported at lokal na sibuyas naman ang sakop ng MSRP, matapos mabunyag ang umano’y pagpapasa ng imported na sibuyas bilang lokal upang mapataas ang presyo nito.
Itatakda ang MSRP para sa imported pork belly o liempo sa 370 pesos kada kilo, habang ang pork shoulder o kasim at pork ham o pigue mula sa abroad ay may presyong 340 pesos kada kilo.
Nasa 120 pesos kada kilo naman ang presyo ng local at imported na pulang sibuyas, dilaw na sibuyas, at carrots.
Ipapatupad ang nasabing hakbang hanggang January 2026.
—Sa panulat ni Daniela De Guzman
