Nareskyu ng Armed Forces of the Philippines-Western Command (AFP-WESCOM) ang siyam na indibidwal na kinabibilangan ng tatlong tauhan ng Philippine Coast Guard (PCG), dalawang miyembro ng Philippine Navy, at apat na tauhan ng Tubbataha Ranger Station sa Tubbataha Reef, Cagayancillo na sakop ng Palawan.
Ito’y matapos makaranas ng sama ng panahon ang naturang lugar kung saan, hinampas at winasak ng malakas na hangin at malalaking alon ang Tubbataha Head Quarters.
Ayon sa mga tauhan ng WESCOM, nakatanggap sila ng report mula sa nabanggit na lugar, dahilan para agad na rumesponde ang kanilang mga tauhan sakay ng Philippine Navy BRP Gregorio del Pilar para sagipin ang mga biktima.
Sa ngayon, ligtas na ang mga nabanggit na biktima habang patuloy pang nagsasagawa ng operasyon ang AFP-WESCOM sa lugar.