Hiniling ng Makabayan Bloc sa Kamara na imbestigahan ang 20 milyong pisong tulong umano na ibinigay sa mga katutubong AGTA na naninirahan sa lugar kung saan balak itayo ang kontrobersyal na KALIWA dam.
Ito’y makaraang ibunuyag ng AGTA-DUMAGAT leader na si Marcelino Tenan sa pagdinig ng House Committee on Indigenous Cultural Communitites and Indigenous Peoples na binigyan umano ng Free, Prior and Informed Consent (FPIC) ang nasa 6 na katutubong grupo gayundin ng nabanggit na halaga ng pera mula sa Metropolitan Waterworks and Sewerage System (MWSS).
Paliwanag naman ni MWSS Deputy Administrator Leonor Cleofas, kinakailangang makuha ng project contractor na China Energy Engineering Corp. (CEEC) ang lahat ng kinakailangang permits at clearances bago masimulan ang construction works.
Nilinaw pa ni Cleofas na wala pang nasisimulang hakbang ang Chinese Contractor dahil nagsasagawa pa lamang ang CEEC ng surveys at geological investigation upang makabuo ng detailed engineering design para sa dam.
Pero ayon kay BayanMuna Partylist Rep. Carlos Zarate, tila isang uri ng padulas ang ibinigay na ito ng MWSS sa mga katutubo upang mapapayag nila ang mga ito na umalis sa kanilang ancestral domain at maisakatuparan nang ganap ang kanilang proyekto.
Pero ayon sa lider katutubo na si Thelma Aumentado, ang pera ay bahagi ng tulong ng MWSS sa tribo na naapektuhan ng konstruksiyon ng isa pang proyekto, ang Angat-Umiray project sa Quezon.