Patay ang dalawang katao matapos malunod nang manalasa ang bagyong Obet sa Lalawigan ng Cagayan.
Ang mga biktima ay kinilala na sina Rene Candinato, at maybahay nitong si Nessy na kapwa mangingisda at residente ng Barangay Centro, Abulug.
Sinabi ni PDRRMO Cagayan head Ruelie Rapsing, nangisda umano ang mag-asawa dakong alas-4 ng madaling araw sa kabila ng masamang panahon.
Nakita ang bangkay ni Rene malapit sa dalampisan sa Brgy. Masisit sa Bayan ng Sanchez Mira samantalang natagpuan naman malapit sa dalampasigan ng Barangay Tokitok, Sanchez Mira ang katawan ng kanyang misis. Dinala pa ang mga biktima sa ospital ngunit binawian na ito ng buhay.
Sa datos 822 pamilya na kinabibilangan ng 2,786 indibidwal ang lumikas sa walong bayan kabilang ang Pamplona, Abulug, Santa Praxedes, Camaliugan, Aparri, Ballesteros, Sanchez Mira at Allacapan. —sa panulat ni Maze Aliño – Dayundayon