Natukoy na ng mga otoridad ang suspek sa pagpatay sa dalagitang si Princess Marie Dumantay sa Bustos, Bulacan noong nakaraang linggo.
Ayon kay PNP spokesperson, Col. Jean Fajardo, nakausap na ng mga otoridad ang mga witness sa kaso na kaibigan nilang si Princess.
Batay sa ipinakitang larawan ng PNP, positibong tinukoy ng mga kaibigan ng 15- anyos na biktima ang suspek dahil ito ang huling kasama ni Dumantay nang mawala ito.
Nakilala umano ng dalagita ang suspek sa social media at sumama na rito kahit hindi pa lubusang kakilala.
Nasangkot na noon ang hindi pa pina-pangalanang suspek sa Rape case at paglabag sa Special Protection of Children Against Abuse, Exploitation, and Discrimination Act.
Sa ngayon, nahaharap na sa kasong Murder ang suspek habang hinihintay pa ang resulta ng autopsy sa biktima.
