Naaresto na kahapon ng mga otoridad ang suspek sa pagpatay sa 24 anyos na babaeng industrial engineer sa Malolos, Bulacan.
Ayon kay Bulacan Police Chief, Col. Charlie Cabradilla, dakong alas-5 ng hapon nasakote ang 30 anyos na suspek na nagtatago sa bahay ng kaniyang kamag-anak.
Kinilala ang suspek sa alysa na Darwin De Jesus o Hernandez, residente ng Barangay Tabang.
Agad na dinala si Darwin sa Bulacan Police Provincial Office para sa interogasyon at nahaharap sa kasong robbery with homicide.
Noong sabado pa nawawala ang biktimang si Princess Dianne Dayor pero kalauna’y natagpuang patay sa masukal na bahagi ng boundary ng Guiguinto at Malolos.
Tinangka umanong gahasain ng suspek si Dayor pero nauwi sa pagpatay at pagnanakaw.
Una nang inihayag ng pulisya na posibleng kilala ng biktima ang suspek na residente rin sa lugar.
